ചേര്ത്തല: രാജ്യത്തെ ഉന്നത വിദ്യാഭ്യാസ കേന്ദ്രങ്ങള് ഭീകരവാദസംഘടനകളുടെ താവളമായി മാറുകയാണെന്ന് ഭാരതീയ വിചാരകേന്ദ്രം സംസ്ഥാന സംഘടനാ സെക്രട്ടറി കാ.ഭാ. സുരേന്ദ്രന്. സംഘപരിവാര് സംഘടനകളുടെ നേതൃത്വത്തില് ചേര്ത്തലയില് നടത്തിയ ദേശരക്ഷാ സംഗമം ഉദ്ഘാടനം ചെയ്യുകയായിരുന്നു അദ്ദേഹം. രാഷ്ട്രതന്ത്രജ്ഞര് ഉയര്ന്നുവരേണ്ട സ്ഥാപനങ്ങളില് നിന്ന് രാജ്യദ്രോഹികളാണ് വളര്ന്നുവരുന്നത്.
സ്വാതന്ത്ര്യസമര സേനാനികള്ക്കും ഭാരതത്തിന്റെ വീരപുരുഷന്മാര്ക്കും പകരം രാജ്യദ്രോഹികളാണ് ജവഹര്ലാല് നെഹ്രു സര്വകലാശാലയില് ആഘോഷിക്കപ്പെടുന്നത്. രാഷ്ട്രത്തോടുള്ള അസഹിഷ്ണുതയാണ് അവിടെ വളരുന്നത്. വിദ്യാര്ത്ഥികളുടെ സ്വതന്ത്ര ചിന്തയെന്നാല് വിഘടനവാദം നടത്തുന്നവരുടെ ചിന്തയായി മാറി. ഇവരെ തിരുത്തി നേര്വഴിക്കു നടത്തേണ്ടതിനു പകരം ഇത്തരക്കാരെ വളര്ത്തുന്ന നിലപാടാണ് ഇടതു വലതു മുന്നണികള് സ്വീകരിക്കുന്നത്. ലോകം മുഴുവന് അസഹിഷ്ണുതയുടെയും വിദ്വേഷത്തിന്റെയും തത്ത്വം പ്രചരിപ്പിച്ച കമ്യൂണിസ്റ്റുകാര് സഹിഷ്ണുതയുടെ പ്രവാചകന്മാരായി മാറിയിരിക്കുകയാണ്.
സ്വന്തം പാര്ട്ടിയിലുള്ളവരെ പോലും വിദ്വേഷത്തിന്റെ പേരില് കൊന്നുതള്ളുന്നവരുടെ സഹിഷ്ണുതയാണ് കമ്യൂണിസ്റ്റുകളുടേതെന്നും അദ്ദേഹം പറഞ്ഞു. ആര്എസ്എസ് താലൂക്ക് സംഘചാലക് എം.ടി. ശശികുമാര് അദ്ധ്യക്ഷത വഹിച്ചു. ജില്ലാ കാര്യവാഹ് എസ്. ജയകൃഷ്ണന്, താലൂക്ക് കാര്യവാഹ് ജയശങ്കര്, ബിഎംഎസ് ജില്ലാ ജോയിന്റ് സെക്രട്ടറി എന്. വേണുഗോപാല്, ബിജെപി നിയോജകമണ്ഡലം വൈസ് പ്രസിഡന്റ് അരുണ് കെ. പണിക്കര് എന്നിവര് സംസാരിച്ചു.
