ബി. പ്രമോദ്കുമാര്
പുനലൂര്: കിഴക്കന് വനമേഖലയില് ചൂടിന്റെ കാഠിന്യമേറിയതും കുടിവെള്ളത്തിന്റെ ലഭ്യത കുറഞ്ഞതുമൂലം കാട്ടുമൃഗങ്ങള് കുടിവെള്ളത്തിനും ഭക്ഷണത്തിനുമായി ജനവാസ മേഖലയില് എത്തിത്തുടങ്ങി. കഴിഞ്ഞയാഴ്ച ശെന്തുരുണിയില് കാട്ടാനകളും കാട്ടുപോത്തുമൊക്കെ വെള്ളത്തിനും ഭക്ഷണത്തിനായി എത്തിയത് ജനങ്ങളെ പരിഭ്രാ ന്തരാക്കിയിട്ടുണ്ട്.
ശെന്തരുണിയില് ബോട്ടിംഗ് നിലച്ചത് എല്ലാ ദിവസവും കാട്ടുമൃഗങ്ങളുടെ വരവ് ഈ മേഖലയിലേക്ക് കൂടാന് കാരണമായിട്ടുണ്ട്. ഒരുകാലത്ത് ജില്ലയുടെ ഭൂവിസ്തൃതിയില് മൂന്നിലൊന്നും വനപ്രദേശമായിരുന്നു. കിഴക്കുഭാഗത്തുള്ള പശ്ചിമഘട്ട പ്രദേശമാണ് വനഭൂമിയില് ഭൂരിഭാഗവും. 81438 ഹെക്ടര് വനഭൂമിയുണ്ടായിരുന്ന ഇവിടെ നിത്യഹരിത വനങ്ങളും തേക്ക് പ്ലാന്റേഷനുകളുമായിരുന്നു.
മനുഷ്യന് നാട് വിട്ട് കാട്ടിലേക്ക് കയറിയതോടെ വനത്തിന്റെ ഏറിയ ഭാഗവും വന നശീകരണത്തോടെ ഇല്ലാതെയായി. ക്രമേണ ഇവിടെ പ്രകൃതി വിഭവങ്ങളുടെ ലഭ്യത കുറഞ്ഞു. കിഴക്കന് വനമേഖലയില് വനത്തിനുള്ളില് സ്ഥിതിചെയ്യുന്ന പ്രദേശങ്ങളാണ് അച്ചന്കോവില്, റോസ്മല, ചെമ്പനരുവി, കുളത്തൂപ്പുഴ, വില്ലുമല എന്നീ സ്ഥലങ്ങള്. ഇവിടെയുള്ളവര് അറിഞ്ഞും അറിയാതെയും വനനശീകരണത്തിന് കൂട്ടുനിന്നതോടെ ഇവിടുത്തെ വന സൗന്ദര്യം പൂര്ണമായും നശിച്ചു. മൃഗങ്ങളുടെയും പക്ഷിജാലകങ്ങളുടെയും ആവാസ വ്യവസ്ഥ തകര്ന്നതും കാട്ടുമൃഗങ്ങള് നാട്ടിലേക്ക് ഇറങ്ങാന് കാരണമായി.
മുമ്പ് കൊടുംവേനലില് മൃഗങ്ങള്ക്ക് കാട്ടില് തന്നെ ഭക്ഷണവും കുടിവെള്ളവും കണ്ടെത്താന് കഴിയുമായിരുന്നു. മനുഷ്യന്റെ കാട്ടിലേക്കുള്ള കടന്നുകയറ്റം ഇതൊക്കെ താറുമാറാക്കി. തെന്മലയിലെ ശെന്തുരണി വനമേഖലയെ 1984 ന് വന്യജീവി സങ്കേതമായി പ്രഖ്യാപിച്ചവര് ഇക്കോടൂറിസത്തിന്റെ പേരില് മൃഗങ്ങളുടെ ആവാസ വ്യവസ്ഥയെ തന്നെ താറുമാറാക്കുകയായിരുന്നു.
ഇവിടെ ആന, കാട്ടുപോത്ത്, കാട്ടുപൂച്ച, സിംഹവാലന്കുരങ്ങ് കരിങ്കുരങ്ങ്, മുള്ളന് പന്നി തുടങ്ങി നിരവധി കാട്ടുമൃഗങ്ങളുണ്ടായിരുന്നു. എന്നാല് ഇന്ന് ഇതിന്റെയൊക്കെ എണ്ണം ഗണ്യമായി കുറഞ്ഞുവെന്നാണ് പഠനങ്ങള് സൂചിപ്പിക്കുന്നത്.
കഴിഞ്ഞ വര്ഷം കാട്ടാനകളും കാട്ടുപന്നികളും നാട്ടിലിറങ്ങിയതോടെ ലക്ഷങ്ങളുടെ കൃഷിനാശമാണ് കിഴക്കന്മേഖലയിലുണ്ടായത്. കൂടാതെ പുലിയുടെ ആക്രമണത്തില് വളര്ത്തുമൃഗങ്ങളും ഏറെ കൊല്ലപ്പെട്ടു.
അടുത്തകാലത്തായിട്ടാണ് കാട്ടുമൃഗങ്ങളുടെ അക്രമണം ജനവാസ മേഖലയിലേക്ക് വ്യാപകമായത്. എന്നാല് വന നശീകരണമാണ് ഇതിന്റെ മുഖ്യകാരണമെന്നറിയാവുന്ന അധികൃതര് ഇതൊന്നും ശ്രദ്ധിക്കാതെ കിടക്കുകയാണ്.
