കോഴിക്കോട്: ലോകക്ഷയരോഗ ദിനാചരണത്തിന്റെ ജില്ലാതല ഉദ്ഘാടനം നാളെ രാവിലെ പത്തരയ്ക്ക് കോഴിക്കോട് ഐഎംഎ ഹാളില് നടക്കുമെന്ന് സംഘാടകര് വാര്ത്താസമ്മേളനത്തില് അറിയിച്ചു. സംസ്ഥാന ആരോഗ്യവകുപ്പ്, ജില്ലാ ടി ബി കേന്ദ്രം, ഐഎംഎ കോഴിക്കോട്, കാലിക്കറ്റ് ചെസ്റ്റ് ക്ലബ്, ജെ സി ഐ കാലിക്കറ്റ് എന്നിവയുടെ സംയുക്താഭിമുഖ്യത്തില് നടക്കുന്ന പരിപാടി കലക്ടര് എന് പ്രശാന്ത് ഉദ്ഘാടനം ചെയ്യും.
‘ഒരുമിക്കാം.. ക്ഷയരോഗം തുടച്ചുമാറ്റാം’ എന്നതാണ് ഇത്തവണത്തെ ക്ഷയരോഗ ദിനസന്ദേശം. കോഴിക്കോട് ഹെഡ് പോസ്റ്റ് ഓഫിസ് പരിസരത്ത് നിന്ന് രാവിലെ ഒമ്പത് മണിയോടെ നടക്കുന്ന ക്ഷയരോഗദിന സന്ദേശയാത്രയോടെ ദിനാചരണ പരിപാടികള്ക്ക് തുടക്കമാവും. ഡിസിപിഡി സാലി യാത്ര ഫഌഗ് ഓഫ് ചെയ്യും. ജില്ലാ മെഡിക്കല് ഓഫിസര് ഡോ. ആര്.എല് . സരിത അധ്യക്ഷയായിരിക്കുന്ന ഉദ്ഘാടന ചടങ്ങില് കോഴിക്കോട് ഗവ. മെഡിക്കല് കോളജ് പ്രിന്സിപ്പല് ഡോ. പി.വി. നാരായണന് മുഖ്യപ്രഭാഷണം നടത്തും. ആര്എന്ടിസിപി സ്റ്റേറ്റ് ടാക്സ് ഫോഴ്സ് ചെയര്പേഴ്സണ് ഡോ. ടി.പി. രാജഗോപാല് ടി ബി ദിനസന്ദേശം നല്കും. ഐഎഎ കാലിക്കറ്റ് പ്രസിഡന്റ് ഡോ. കെ.വി. രാജു ടി ബി സീല്, ഡോ. എ.കെ. അബ്ദുല് ഖാദറിന് നല്കി പ്രകാശനം ചെയ്യും.
ലോക ക്ഷയരോഗ ദിനമായ മാര്ച്ച് 24 ന് ജില്ലയില് വിപുലമായ ക്യാംപയിനുകള് സംഘടിപ്പിക്കും. ബോധവത്കരണത്തിന്റെ ഭാഗമായി ജില്ലയിലെ തെരഞ്ഞെടുത്ത കേന്ദ്രങ്ങളില് തെരുവ് നാടകങ്ങള് അവതരിപ്പിക്കും. വടകര ഐ എം എ ഹാളില് 24 ന് ബോധവല്കരണ സെമിനാറും അരങ്ങേറും. അഡീഷണല് ജില്ലാ മെഡിക്കല് ഓഫീസര് ഡോ. പിയൂഷ് നമ്പൂതിരിപ്പാട്, ഡോ. എ കെ അബ്ദുല് ഖാദര്, ഡോ. വിപിന് വര്ക്കി, എം പി മണി എന്നിവര് വാര്ത്താസമ്മേളനത്തില് സംബന്ധിച്ചു.
