ന്യൂദല്ഹി: സര്ക്കാര് സേവനങ്ങള്ക്ക് ആധാര് കാര്ഡ് നിര്ബന്ധമാക്കിക്കൊണ്ടുള്ള ആധാര് ബില് പാര്ലമെന്റ് പാസാക്കി. ആധാര് ബില്ലിന്മേല് രാജ്യസഭ കൊണ്ടുവന്ന ഭേദഗതികള് വോട്ടിനിട്ട് തള്ളിക്കൊണ്ടാണ് ലോക്സഭ ബില് പാസാക്കിയത്. കോണ്ഗ്രസ് അംഗം ജയറാം രമേശ് കൊണ്ടുവന്ന അഞ്ചു ഭേദഗതികളാണ് ഇന്നലെ രാത്രി ലോക്സഭ തള്ളിയത്.
ലോകത്തെ ഏറ്റവും വലിയ ബയോമെട്രിക് ഡേറ്റാബാങ്കായ ആധാറിലെ വിവരങ്ങള് കേന്ദ്രഏജന്സികള്ക്ക് പരിശോധിക്കാന് അനുമതി നല്കുന്നതാണ് പുതിയ ആധാര് ബില്. നേരത്തെ ലോക്സഭ പാസാക്കിയ ബില്ലില് രാജ്യസഭ ഇന്നലെ രാവിലെ ചില ഭേദഗതികള് കൊണ്ടുവന്നിരുന്നു. കേന്ദ്രസര്ക്കാരിന് ഭൂരിപക്ഷം കുറവായ രാജ്യസഭയില് 64നെതിരെ 76 വോട്ടുകള്ക്കാണ് പ്രതിപക്ഷ ഭേദഗതികള് സഭ പാസാക്കിയത്.
ഇതോടെയാണ് ലോക്സഭ വീണ്ടും ആധാര് ബില് പരിഗണിച്ച് രാജ്യസഭയുടെ നിര്ദ്ദേശങ്ങള് ശബ്ദവോട്ടോടെ തള്ളിയത്. ധനബില്ലില് ഭേദഗതി കൊണ്ടുവരാന് രാജ്യസഭയ്ക്ക് അധികാരമില്ലെന്നിരിക്കെ ലോക്സഭ പാസാക്കിയതോടെ ബില് നിയമമായി.
അഞ്ചു ഭേദഗതികളാണ് ജയറാം രമേശ് ഇന്നലെ രാജ്യസഭയില് അവതരിപ്പിച്ചത്. ബില്ലിന്റെ പൊതുസ്വഭാവത്തെ ഇല്ലാതാക്കുന്ന ഭേദഗതികള് പ്രതിപക്ഷം രാജ്യസഭയില് പാസാക്കിയതോടെ ഇതംഗീകരിക്കേണ്ടതില്ലെന്ന നിലപാടിലേക്ക് കേന്ദ്രസര്ക്കാര് എത്തിച്ചേരുകയായിരുന്നു. ഇതേ തുടര്ന്ന് ലോക്സഭ വീണ്ടും ആധാര് ഭേദഗതികള് പരിഗണിച്ച് വോട്ടിനിട്ട് തള്ളി.
പാര്ലമെന്റിന്റെ ബജറ്റ് സമ്മേളനത്തിന്റെ ആദ്യഘട്ടം ഇന്നലെ സമാപിച്ചു. ബജറ്റ് സമ്മേളനത്തിന്റെ രണ്ടാം ഘട്ടം ഏപ്രില് 25ന് രാവിലെ 11 മണിക്ക് സമ്മേളിക്കുമെന്ന് സ്പീക്കര് സുമിത്ര മഹാജന് അറിയിച്ചു.
രാജ്യസഭയില് നേരത്തെ ധനമന്ത്രി അരുണ് ജെയ്റ്റ്ലിക്കെതിരെ ജയറാം രമേശും സീതാറാം യെച്ചൂരിയും വാക്പോര് നടത്തി. നിങ്ങള് പറയുന്നത് അഭിപ്രായ സ്വാതന്ത്ര്യവും ഞങ്ങള് പറയുന്നത് അസഹിഷ്ണുതയുമെന്ന് ചിത്രീകരിക്കുന്നത് ചൂണ്ടിക്കാട്ടിയായിരുന്നു ജയ്റ്റ്ലിയുടെ മറുപടി. വ്യക്തികളുടെ സ്വകാര്യത സംരക്ഷിച്ചുകൊണ്ടുമാത്രമേ ആധാര് നിയമഭേദഗതി നടപ്പാക്കൂ എന്നും ജെയ്റ്റ്ലി സഭയെ അറിയിച്ചു.
കേന്ദ്രസര്ക്കാരിനെ ഭരിക്കാന് അനുവദിക്കാതിരിക്കാന് നിഷേധാത്മക നിലപാടാണ് പ്രതിപക്ഷ പാര്ട്ടികള് സ്വീകരിക്കുന്നതെന്ന് പാര്ലമെന്ററികാര്യമന്ത്രി വെങ്കയ്യ നായിഡു കുറ്റപ്പെടുത്തി. രാഷ്ട്രപതിയുടെ നയപ്രസംഗത്തില് മത്സരിക്കാന് സ്ഥാനാര്ത്ഥികള്ക്ക് വിദ്യാഭ്യാസയോഗ്യത വേണമെന്നതില് ഭേദഗതികള് വരുത്തിയ രാജ്യസഭയിലെ പ്രതിപക്ഷ നടപടി ചൂണ്ടിക്കാട്ടിയായിരുന്നു വെങ്കയ്യയുടെ വിമര്ശനം. റിയല് എസ്റ്റേറ്റ് ബില് പാര്ലമെന്റില് പാസാക്കാനായത് കേന്ദ്രസര്ക്കാരിന്റെ നേട്ടമാണെന്നും പാര്ലമെന്ററികാര്യമന്ത്രി പറഞ്ഞു.
