ഹേ, രാവണ, നിങ്ങള് സംസാരഗതിയെ വിവേകപൂര്വം ചിന്തിക്കുക. രാക്ഷസീയബുദ്ധി സ്വീകരിക്കാതിരിക്കുക. സംസാരബന്ധനത്തില് നിന്നും വേര്പ്പെടുത്തുന്നതും ജീവികള്ക്ക് അത്യന്തം ഹിതകാരിണിയുമായ ദൈവഗതിയെ ആശ്രയിക്കുക. നിങ്ങള് ബ്രഹ്മാവിന്റെ അത്യുല്കൃഷ്ടമായ വംശത്തിലാണു ജനിച്ചത്. പുലസ്ത്യനന്ദനനായ വിശ്രവസ്സിന്റെ പുത്രനാണ് കുബേരന്റെ സഹോദരനാണ്. നിങ്ങള് ശരീരം, ബുദ്ധി, ആത്മാവ് ഇവ മൂന്നുംകൊണ്ടും രാക്ഷസനല്ല.
തത്ത്വചിന്തകൊണ്ട് നിങ്ങള് കാമക്രോധദ്വേഷലോഭമോഹാദികള് ഹൃദയത്തില്നിന്നും കളയുക. ബ്രഹ്മാവിന്റെ പൗത്രനാകയാല് രാക്ഷസസ്വഭാവം സ്വീകരിക്കാതിരിക്കുക. അസുരന്, ദേവന്, പക്ഷി, മൃഗം, സര്പ്പം എന്നീ ഭേദബുദ്ധികൊണ്ട് ദേഹമാണ് ആത്മാവെന്നുള്ള ബുദ്ധി ആദ്യം ഉപേക്ഷിക്കുക. പഞ്ചഭൂതാത്മകമായ പ്രകൃതിക്കും, ത്രിഗുണങ്ങള്ക്കും അധീനനാകുന്നതിനാല് ജീവനും ദേഹവും ആത്മാവല്ല എന്നറിയുക. ആത്മാവ് നിര്വികാരനാണ്. അതു ശരീരമല്ല. ശരീരം ബുദ്ധി, ഇന്ദ്രിയങ്ങള് ഇവയൊന്നും ആത്മാവമല്ല.
അതിനാല് ഇവയൊന്നും നിങ്ങളല്ല. അജ്ഞാനംകൊണ്ട് നിങ്ങളാണെന്നു തോന്നുകയാണ്. ആത്മാവ് ആനന്ദസ്വരൂപമാണ്. ജനനമരണങ്ങളില്ലാത്തതും, നിര്മ്മലവും, രണ്ടല്ലാത്തതും, നശിക്കാത്തതുമാണ്. അത് ഏകന്, പരന്, കേവലന്, ഉപമയില്ലാത്തവന്, അളക്കാന് കഴിയാത്തവന്, അവ്യക്തന്, ദുഃഖരഹിതന് മാത്രമല്ല നിര്ഗുണനും നിഷ്കളനും, ഒന്നിനോടും മമതയില്ലാത്തവനും നിര്മ്മലനും യമനിയമാദിസമ്പന്നന്മാരായ മഹര്ഷിമാരുടെയുള്ളില് വസിക്കുന്നവനും ആദ്യനും വിഭൂവുമാണ്. നിത്യനും ആകാരമില്ലാത്തവനും പരബ്രഹ്മവുമായ അതിനെ ബ്രഹ്മാവിഷ്ണു മഹേശ്വരന്മാര്ക്കുപോലും ശരിക്കറിയില്ല.
വേദാന്തചിന്തകൊണ്ടു മാത്രമേ ആത്മാവിനെ അറിയാന് കഴിയൂ. എന്നാല് അജ്ഞാനികള്ക്ക് ഈ സകലജഗത്തും മായനിറഞ്ഞതാണ്. അവര് ഇല്ലാത്തതെല്ലാം ഉള്ളതാണെന്നു കരുതുന്നു. ആത്മാവ് സച്ചിന്മയവും സത്യവും പണ്ടുപണ്ടേയുള്ളതുമാണ്. മറ്റെല്ലാം ജഡമാണ്. നശിക്കുന്നതാണ് ജനനമരണാദി ദുഃഖം നിറഞ്ഞതാണ്. പരമപുരുഷന്റെ മറിമായങ്ങള് അറിയുന്നതിന് വളരെ പ്രയാസമാണ്. അതിനാല് നിങ്ങള് ആത്മചിന്തനം നടത്തി ആത്മാവിനെ അറിഞ്ഞ് ആത്മശാന്തിയനുഭവിക്കുക.
