കരുനാഗപ്പള്ളി: ഇന്നലെവരെ പരസ്പരം മത്സരിച്ചവര് ഇപ്പോള് ബിജെപിയെ തോല്പിക്കാന് കൈകോര്ക്കുകയാണെന്ന് ബിജെപി ദക്ഷിണമേഖലാ സംഘടനാ സെക്രട്ടറി എല്.പത്മകുമാര്. എന്ഡിഎ കേരളത്തില് ഇടതുവലതു മുന്നണികള്ക്ക് ഭീഷണിയാണെന്ന് ഇരുകൂട്ടരും സമ്മതിച്ചുകഴിഞ്ഞതായി അദ്ദേഹം പറഞ്ഞു. ബിജെപി കരുനാഗപ്പള്ളി മണ്ഡലം കമ്മറ്റിയുടെ നേതൃത്വത്തില് നടന്ന ബൂത്തുപരി പ്രവര്ത്തക കണ്വെന്ഷന് ഉദ്ഘാടനം ചെയ്യുകയായിരുന്നു പത്മകുമാര്.
വിശ്രമമില്ലാതെ രാജ്യത്തിനുവേണ്ടി ജോലി ചെയ്യുന്ന പ്രധാനമന്ത്രി കേരളത്തിന്റെ വികസനസ്വപ്നങ്ങള്ക്ക് കലവറയില്ലാത്ത പിന്തുണയാണ് നല്കുന്നത്. നല്ല പദ്ധതികളുമായി സമീപിക്കൂ, അംഗീകാരം നല്കാം എന്ന കാഴ്ചപ്പാടാണ് കേന്ദ്രസര്ക്കാരിന്റേത്. അതുകൊണ്ടാണ് ഇത്രകാലം ഇല്ലാത്ത വികസന നേട്ടം രണ്ട് വര്ഷത്തെ ബിജെപി ഭരണത്തിലൂടെ കേരളത്തിന് ലഭിച്ചതെന്ന് പത്മകുമാര് പറഞ്ഞു. വിഴിഞ്ഞം പദ്ധതി, ഐഐടി, ആലപ്പുഴ-കൊല്ലം ബൈപ്പാസുകള്, പഴം-പച്ചക്കറി സംസ്കരണ യൂണിറ്റുകള്, റയില്വേ വികസനത്തിന് കേരളത്തില് അനുവദിക്കപ്പെട്ട പദ്ധതികള് തുടങ്ങിയവ ഉദാഹരണങ്ങളാണ്. തൊഴിലുറപ്പ് പദ്ധതിപ്രകാരം വേതനം 299 രൂപയാക്കി വര്ധിപ്പിച്ചതും മോദിസര്ക്കാരാണ്. എന്നാല് ഇത്തരത്തിലുള്ള ജനക്ഷേമപദ്ധതികള് മറച്ചുവച്ച് സര്ക്കാരിനെതിരെ നുണപ്രചാരണം നടത്തുകയാണ് മോദിവിരുദ്ധ രാഷ്ട്രീയക്കാരും മാധ്യമങ്ങളും ചെയ്യുന്നത്. എവിടെ എന്ത് അതിക്രമം നടന്നാലും അതിന് മോദി മറുപടി പറയണമെന്ന് പറയുന്നവര് അതിന്റെ മറ പിടിച്ച് മതവിദ്വേഷം പ്രചരിപ്പിക്കുകയാണ് ചെയ്യുന്നത്. പ്രവാചകനിന്ദയുടെ പേരില് മാപ്പുപറയുകയും കാലുപിടിക്കുകയും ചെയ്യുന്നവര് ദുര്ഗാദേവിയെ അപമാനിച്ച അവതാരകയെ സംരക്ഷിക്കുന്ന ഇരട്ടത്താപ്പാണ് കാട്ടിയത്. ഇത്തരം പ്രവര്ത്തികള്ക്കെതിരായ ജനരോഷം തെരഞ്ഞെടുപ്പില് പ്രതിഫലിക്കുമെന്ന് പത്മകുമാര് പറഞ്ഞു.
ജെഎന്യു കേന്ദ്രീകരിച്ച് നടന്ന ദേശവിരുദ്ധപ്രവര്ത്തനങ്ങള് ഇല്ലാതാക്കാനാണ് കേന്ദ്രസര്ക്കാര് ശ്രമിച്ചത്. അഫ്സല്ഗുരുവിനെ വാഴ്ത്തുന്നവരെ സംരക്ഷിക്കാനാണ് കോണ്ഗ്രസും ഇടതുപക്ഷവും പരിശ്രമിക്കുന്നത്. തമിഴ്നാടിലെ തെരഞ്ഞെടുപ്പുകൂടി കഴിയുന്നതോടെ ദേശീയപാര്ട്ടി എന്ന് അവകാശപ്പെടാന് പോലുമാകാത്ത അവസ്ഥയിലാവും സിപിഎമെന്നും അദ്ദേഹം ചൂണ്ടിക്കാട്ടി.
ബിജെപി മണ്ഡലം പ്രസിഡന്റ് എ.വിജയന് അദ്ധ്യക്ഷത വഹിച്ച യോഗത്തില് ബിജെപി ജില്ലാ പ്രസിഡന്റ് ജി.ഗോപിനാഥ്, സെക്രട്ടറി ലതാമോഹന്, ട്രഷറര് അനില് വാഴപ്പള്ളി, സംസ്ഥാന സമിതിയംഗം ഉത്തമന് ഉണ്ണൂലേത്ത്, മെഡിക്കല്സെല് സംസ്ഥാന സെക്രട്ടറി ഡോ.ബിജു, ആര്എസ്എസ് ജില്ലാകാര്യവാഹ് ആര്.ബാഹുലേയന്, ബൗദ്ധിക്ക് പ്രമുഖ് ആര്.രാജേഷ്, ബിജെപി നേതാക്കളായ ഹരികുമാര്, ശരത്, രാധാകൃഷ്ണപിള്ള എന്നിവര് സംസാരിച്ചു.
