ആറ്റം എന്നത് ഒരു സാങ്കല്പികനാമം മാത്രമാണ് എന്ന് മനസ്സിലാക്കാന് പറ്റും. അടിസ്ഥാനബലങ്ങള്ക്ക് അനുസൃതമായി സൂക്ഷ്മങ്ങളായ മൗലികകണങ്ങളുടെ കര്മ്മവ്യാപാരം സാധ്യതകളെ വച്ചുകൊണ്ട് നിര്ണ്ണയിക്കുമ്പോള് കിട്ടുന്ന ഒരു ആപേക്ഷിക ദേശകാലപരിധി മാത്രമാണ് ആറ്റം. ഈ കണങ്ങളുടെ എണ്ണവും ചലനവും വ്യാപാരവും ഓരോരോ പരിധിയില് വരുമ്പോള് ആ സ്പേസില് ഉണ്ടാകുന്ന വികാരങ്ങള് വ്യതസ്തമാകുന്നു. അപ്പോള് നമ്മള് ആ ആറ്റത്തിനെ മറ്റൊരു പേരിട്ടു വിളിക്കുന്നു.
ഹൈഡ്രജനും ഓക്സിജനും എല്ലാം വാസ്തവത്തില് ഒരേ മൗലിക കണങ്ങളുടെ വ്യത്യസ്ത ആവിഷ്ക്കരണം മാത്രമാകുന്നു. എപ്പോഴും ചലിച്ചുകൊണ്ടിരിക്കുന്ന ഈ മൗലികകണങ്ങള് ഊര്ജ്ജം തന്നെയാകുന്നു എന്ന് ആപേക്ഷികതാ സിദ്ധാന്തത്തിന്റെ വെളിച്ചത്തില് കാണാം. അപ്പോള് പ്രപഞ്ചം എന്നത് ദേശകാലങ്ങളില് ഉള്ള ഊര്ജ്ജത്തിന്റെ ആവിഷ്ക്കാരമെന്നു കാണാവുന്നതാണ്. ഊര്ജ്ജം സ്പേസിനെ ആശ്രയിച്ചു ബലത്തോട് ബന്ധപ്പെട്ടിരിക്കുന്നു. അതിനാല് സ്പേസില് ബലത്തിന്റെ വിക്ഷേപമാണ് ഇക്കാണുന്ന പ്രപഞ്ചമായി അറിയപ്പെടുന്നത്.
ഊര്ജ്ജം ആശ്രയിച്ചു നില്ക്കുന്ന ഈ സ്പേസിനു ആധാരമെന്താണ്? ആധേയമുണ്ടെങ്കില് ആധാരവും ഉണ്ടാകണമല്ലോ. ഇവിടെ സയന്സ് നിശ്ശബ്ദമാകുന്നു. സ്പേസ്ടൈം എന്നതിന് അപ്പുറം സയന്സിനു വിശദീകരിക്കാന് ആവില്ല. കാരണം സയന്സ് എന്നത് സ്വതന്ത്രമല്ല, അത് മനുഷ്യബുദ്ധിയെ ആശ്രയിച്ചു നില്ക്കുന്ന ഒരു വിജ്ഞാനശാഖമാത്രമാണ്. അതിനു പ്രമാണം ഗണിതസമവാക്യങ്ങളാല് വിശദീകരിക്കപ്പെടുന്ന പ്രത്യക്ഷാനുമാനങ്ങളാണ്.
തന്റെ ഇന്ദ്രിയവ്യാപാരങ്ങള്ക്ക് അതീതമായ ഒന്നിനെയും മനുഷ്യനു പ്രത്യക്ഷമായോ പരോക്ഷമായോ അറിയുവാന് കഴിവില്ലാത്തതുകൊണ്ട് സയന്സിന്റെ അന്വേഷണം അവിടെ നിശ്ചലമാകുന്നു. യുക്തിയും അനുഭവവും ഒരുപോലെ യോജിക്കുമ്പോള് ആണ് വിചാരം ശാസ്ത്രീയമാകുന്നത്. സയന്സില് യുക്തി ചേരുമ്പോള് അനുഭവം ഇല്ലാതെയാവുകയും. അനുഭവം ഉള്ള വിഷയങ്ങളില് സയന്സിന്റെ യുക്തി പരാജയപ്പെടുകയും ചെയ്യുന്നത് അറിവുള്ളതാണല്ലോ.
തുടരും – ഭാഗം 4: സൂക്ഷ്മപഠനം
