ഇളങ്ങുളം: ഹരിത ജീവിതത്തിന്റെ പാഠങ്ങള്‍ വ്യത്യസ്തമായ ശൈലിയില്‍ അരങ്ങിന്റെ സാധ്യതകള്‍ ഉപയോഗിച്ച് ജനങ്ങളിലെത്തിക്കുകയാണ് ഇളങ്ങുളം ശ്രീധര്‍മശാസ്താ ദേവസ്വം സ്‌കൂളിലെ വിദ്യാര്‍ഥികള്‍. പ്രകൃതിയുടെ പച്ചപ്പും തെളിനീരുറവകളും മനുഷ്യന്റെ കടന്നുകയറ്റത്തിലൂടെ അന്യമാകുന്നത് അരങ്ങിലെത്തിക്കുകയാണ് ഒരു പുഴയുടെ ആത്മാവ് എന്ന നാടകത്തിലൂടെ. നാടകത്തിലൂടെ ഈ വിദ്യാര്‍ഥികള്‍ നാടിനെ വിസ്മയിപ്പിക്കുക തന്നെ ചെയ്തു. ഇളങ്ങുളം ശ്രീധര്‍മശാസ്താ ക്ഷേത്രത്തില്‍ നടന്ന ആദ്യപ്രദര്‍ശനവും പനമറ്റം ദേശീയ വായനശാലയുടെ 65-ാം വാര്‍ഷികാഘേഷത്തോടനുബന്ധിച്ചു നടന്ന രണ്ടാമത്തെ പ്രദര്‍ശനവും ഏറെ ശ്രദ്ധേയമായിക്കഴിഞ്ഞു.
43 മിനിറ്റ് ദൈര്‍ഘ്യമുള്ള നാടകത്തില്‍ മൂന്ന്, നാല് ക്ലാസുകളിലെ 25 കുട്ടികളാണു പങ്കെടുക്കുന്നത്. കേരളത്തിലെ തനതു നാടവേദിയടെ അമരക്കാരന്‍ ഓണതുരുത്ത് രാജശേഖരന്റെ സംവിധായനത്തില്‍ രണ്ടു മാസം നീണ്ട കഠിന പരിശീലനത്തിനൊടുവിലാണ് നാടകം അരങ്ങിലെത്തിയത്.
വിനോദയാത്രയ്‌ക്കു പോകുന്ന കുട്ടികള്‍ ദാഹിച്ചു വലയുന്നതും തുടര്‍ന്നു നദീദേവിയുടെ വിലാപം ശ്രദ്ധിക്കുകയും ചെയ്യുന്നു. കുന്നും മലകളും അരുവികളും പുല്‍മേടുകളുമുണ്ടായിരുന്ന ഒരു നാടായിരുന്നു ഇതെന്നും ഇവിടെ ഒരുനാള്‍ ഒരു പുഴ ഒഴുകിയിരുന്നുവെന്നും കുട്ടികള്‍ തിരിച്ചറിയുന്നു. അന്ധമായ നഗരവത്കരണവും പരിസ്ഥിതി നാശവും വരുത്തുന്ന വിനകള്‍ക്കെതിരേ കുഞ്ഞുങ്ങള്‍ തെളിക്കുന്ന കൈത്തിരിയോടെ നാടകത്തിനു ശുഭാന്ത്യമാകും. മലയും പുഴയും മഴക്കാടുകളും അരങ്ങിന്റെ ഭാഷയില്‍ വേദിയില്‍ അവതരിപ്പിച്ചതിനൊപ്പം കഥകളി, തിരുവാതിര, പടയണി, മോഹിനിയാട്ടം തുടങ്ങിയ കലാരൂപങ്ങളുടെ രംഗാവതരണത്തിലൂടെ കുട്ടികള്‍ സദസിനെ വിസ്മിയിപ്പിച്ചു. സ്‌കൂളിലെ മൂന്നാം ക്ലാസ് വിദ്യാര്‍ഥിനി ജാനകി ആര്‍. പിള്ളയാണ് നാടകത്തിനാവശ്യമായ നൃത്തച്ചുവടുകള്‍ ചിട്ടപ്പെടുത്തിയത്. പത്തു വയസില്‍ താഴെ പ്രായമുള്ള കുട്ടികളാണ് നാടകത്തില്‍ പങ്കെടുക്കുന്ന 25 പേരും. പ്രദേശത്തെ ഗ്രന്ഥശാലകള്‍, സന്നദ്ധസംഘടനകള്‍, ആരാധനാലയങ്ങള്‍ തുടങ്ങിയവയുമായി സഹകരിച്ച് പരമാവധി വേദികളില്‍ നാടകം അവതരിപ്പിക്കാനും അതുവഴി കൂടുതല്‍ ജനങ്ങളിലേക്ക് മഹത്തായ സന്ദേശം എത്തിക്കാനുമാണ് ലക്ഷ്യമിടുന്നതെന്നു സ്‌കൂള്‍ ഹെഡ്മിസ്ട്രസ് സുശീലാദേവി പറഞ്ഞു.
നഹരി കൈലാസം ചമയവും രംഗസംവിധാനവും നിര്‍വഹിക്കുന്നു. കഥകളിച്ചുവടുകള്‍ പരിശീലിപ്പിച്ചത് പി.എസ്. ശശിധരന്‍ നായരാണ്. വസ്ത്രാലങ്കാരം സുജ ബോബി. പിറ്റിഎ പ്രസിഡന്റ് എം.കെ. രാധാകൃഷ്ണന്‍ നായര്‍, മാതൃസംഗമം പ്രസിഡന്റ് അമ്പിളി രാജേഷ് തുടങ്ങിയവര്‍ പരിപാടികള്‍ക്കു നേതൃത്വം നല്‍കുന്നു.
