എടത്വാ: ജില്ലാ പഞ്ചായത്ത് പ്രസിഡന്റിന്റെ ഉത്ഘാടന ചടങ്ങ് കോണ്ഗ്രസ് അംഗങ്ങള് കൂട്ടത്തോടെ ബഹിഷ്കരിച്ചു. തലവടി ഗവ. വൊക്കേഷണല് ഹയര് സെക്കന്ററി സ്കൂള് ശതാബ്ദി ആഘോഷ സമാപനം സമ്മേളനത്തിന്റെ ഉത്ഘാടന ചടങ്ങിലായിരുന്നു സംഭവം. ഇന്നലെ രാവിലെ 11ന് സമ്മേളനം മന്ത്രി രമേശ് ചെന്നിത്തല ഉത്ഘാടനം ചെയ്യുമെന്നാണ് അറിയിച്ചിരുന്നത്.
തിരുവനന്തപുരത്ത് നടക്കുന്ന അടിയന്തിര മീറ്റിങ്ങില് രമേശ് ചെന്നിത്തല പങ്കെടുക്കേണ്ടതുകാരണം ജില്ലാ പഞ്ചായത്ത് പ്രസിഡന്റ് ജി.വേണുഗോപാല് ഉത്ഘാടനം ഏറ്റെടുത്തു. അഡ്വ. ജേക്കബ് എബ്രഹാമിന്റെ സ്വാഗത പ്രസംഗവും സ്കൂള് ഹെഡ്മിസ്ട്രസ് സുഭദ്ര ദേവിയുടെ റിപ്പോര്ട്ട് അവതരണവും ജില്ലാ പഞ്ചായത്ത് അംഗം ബിനു ഐസക് രാജുവിന്റെ അധ്യക്ഷ പ്രസംഗവും കഴിയുന്നവരെ വേദിയില് ഇരുന്ന കോണ്ഗ്രസ് അംഗങ്ങളായ ജനപ്രതിനിധികളും നേതാക്കന്മാരും ജില്ലാ പഞ്ചായത്ത് പ്രസിഡന്റ് ഉത്ഘാടന പ്രസംഗത്തിന് എഴുന്നേല്ക്കവേ വേദി വിട്ടു പോകുകയായിരുന്നു.
സമീപത്ത് നടക്കുന്ന മറ്റൊരു പരിപാടിയില് പങ്കെടുക്കാനുണ്ടന്ന് അറിയിച്ചാണ് ബ്ലോക്ക്-ഗ്രാമപഞ്ചായത്ത് പ്രസിഡന്റുമാരും ബ്ലോക്ക് അംഗങ്ങളും കോണ്ഗ്രസ് നേതാക്കന്മാരും വേദിവിട്ടത്. കോണ്ഗ്രസ് അംഗങ്ങള് വേദിവിട്ടപ്പോള് സമീപത്ത് നടക്കുന്ന അതേചടങ്ങില് പങ്കെടുക്കേണ്ട കേരള കോണ്ഗ്രസ് അംഗങ്ങള് വേദിപങ്കിട്ടു.
കോണ്ഗ്രസ് അംഗങ്ങളുടെ കൂട്ട ബഹിഷ്കരണം ജനങ്ങളില് അതൃപ്തിയുണ്ടാക്കി. ഒരു വര്ഷമായി നടന്നുവരുന്ന ശതാബ്ദി ആഘോഷ ചടങ്ങിന്റെ സമാപനം കോണ്ഗ്രസ് അലങ്കോലമാക്കിയെന്നാണ് പ്രതിപക്ഷ ആരോപണം. സ്കൂളിലെ ആര്ട്ട് ഗാലറിയുടെ ഉത്ഘാടനം മുന് എം.എല്.എ ഡോ. കെ.സി.ജോസഫ് നിര്വ്വഹിച്ചു.
ജില്ല പഞ്ചായത്ത് അംഗം ബിനു ഐസക് രാജു അധ്യക്ഷത വഹിച്ചു. സ്കോളര്ഷിപ്പ് പ്രഖ്യാപനം കൊച്ചിന് യൂണിവേഴ്സിറ്റി മുന് വൈസ് ചാന്സിലര് എന്. ഉണ്ണികൃഷ്ണന് നായര് നിര്വ്വഹിച്ചു. ജോക്കബ് എബ്രഹം, അജിത്ത് കുമാര് പിഷാരത്ത്, വര്ഗീസ് പി. ചെറിയാന്, വി.അശോകന്, ശശികുമാര് ജി. വാര്യര്, ഡി.തുളസിദാസ്, ഉഷകുമാരി, സുജ പി.ആര്, സതീഷ് കുമാര്, പി.കെ. വേണുഗോപാല് എന്നിവര് പ്രസംഗിച്ചു.
