ഇളങ്ങുളം: ശ്രീധര്‍മശാസ്താ ക്ഷേത്രമൈതാനിയില്‍ കാത്തുനിന്ന ആയിരങ്ങളുടെ മനം നിറച്ച് ഗജവീരന്മാര്‍ അണി നിരന്നു. തിരുവുത്സവത്തിനു സമാപനം കുറിച്ച് ആറാട്ട് ഉത്സവദിനമായ ഇന്നലെ ഗജരാജസംഗമവും ആനയൂട്ടും ആനപ്രേമികളുടെ മനം നിറച്ചു.
ആറാട്ട് എഴുന്നള്ളത്തിന് ഇളങ്ങുളേശ്വരന്റെ പൊന്‍തിടമ്പേറ്റാനെത്തിയ ഗജരാജന്‍ ഗുരുവായൂര്‍ കേശവന്‍കുട്ടിയെ കൂരാലിയില്‍ നിന്ന് സ്വീകരിച്ചാനയിച്ചു. കിഴക്കേപന്തലില്‍ നടന്ന ആനയൂട്ടും ഗജരാജസംഗമവും ക്ഷേത്രം തന്ത്രി പുലിയന്നൂര്‍മന നാരായണന്‍ അനുജന്‍ നമ്പൂതിരിപ്പാട് ഉദ്ഘാടനം ചെയ്തു. ഇളങ്ങുളം ഗജരാജസംഗമത്തിന്റെ തുടക്കം മുതല്‍ നിറസാന്നിധ്യമായ മേളപ്രമാണിമാര്‍ രാമപുരം ശ്രീകുമാര്‍ എസ്. വാര്യര്‍, രാധാകൃഷ്ണമാരാര്‍ എന്നിവരെ ഇളങ്ങുളം ദേവസ്വം ചടങ്ങില്‍ ആദരിച്ചു.
വൈകിട്ട് ആറാട്ടെഴുന്നള്ളത്ത് ക്ഷേത്രത്തിന് മുന്‍വശത്തുള്ള ആല്‍ത്തറയ്‌ക്കല്‍ എത്തിയപ്പോള്‍ പുതിയതായി നിര്‍മിച്ച കാണിക്ക മണ്ഡപത്തിന്റെ ഉദ്ഘാടനവും സമര്‍പ്പണവും ക്ഷ്രേത്രം തന്ത്രി നിര്‍വഹിച്ചു. ഇതേത്തുടര്‍ന്ന് 11 ഗജവീരന്മാര്‍ അണിനിരന്ന ആറാട്ട് എതിരേല്‍പ്പും കുടമാറ്റവും താളമേളങ്ങളുടെ വിസ്മയവും പൂരപ്പെരുമയൊരുക്കി.
ഗുരൂവായൂര്‍ കേശവന്‍കുട്ടി, തോട്ടുചാലില്‍ ബോലോനാഥ്, കാഞ്ഞിരക്കാട്ട് ശേഖരന്‍, ഉണ്ണിപ്പള്ളി ഗണേശന്‍, തൈമുറിയില്‍ കുട്ടികൃഷ്ണന്‍, നായരമ്പലം രാജശേഖരന്‍, മുള്ളത്ത് ഗണപതി, നന്തിലാത്ത് ഗോപാലകൃഷ്ണന്‍, നന്തിലാത്ത് പദ്മനാഭന്‍, മൂന്നാര്‍ ഗണേശന്‍, വെണ്മണി നീലകണ്ഠന്‍, മംഗലാംകുന്ന് ശരണമയ്യപ്പന്‍ എന്നീ 12 ഗജവീരന്മാര്‍ ആനയൂട്ടില്‍ അണിനിരന്നു.
ഉപദേവാലയമായ മരുതുകാവില്‍ വെള്ളിയാഴ്ച ഉത്സവം നടക്കും. വൈകിട്ട്് 6ന് പുഷ്പാഭിഷേകം. രാത്രി 9ന് കുഭകുടനൃത്തം, താലപ്പൊലി, കളമെഴുത്തും പാട്ടും. 930ന് ഗാനമേള.
