കാഞ്ഞിരപ്പള്ളി: കാഞ്ഞിരപ്പള്ളി ബസ്സ്റ്റാന്റിലെ ശുദ്ധജല സ്രോതസ്സുകള് ഉപേക്ഷിച്ച നിലയില്. വേനല് രൂക്ഷമായതോടെ കാഞ്ഞിരപ്പള്ളി സ്വകാര്യ ബസ്സ്റ്റാന്റില് കുടിവെള്ളമില്ല. സ്റ്റാന്റിലെത്തുന്ന യാത്രക്കാര് ദാഹമകറ്റാന് പണം നല്കി കുപ്പിവെള്ളത്തെ ആശ്രയിക്കുമ്പോഴാണ് ഉള്ള കിണറുകള് നന്നാക്കാത്തത്. സ്റ്റാന്റില് ജലമെത്തിക്കുന്നതിനായി പണി തീര്ത്ത കിണര് ഇപ്പോള് ഉപയോഗശൂന്യമാണ്. തൊട്ടട്ടുത്തായി വര്ഷങ്ങള്ക്ക് മുന്പ് പണി തീര്ത്ത കുഴല് കിണറില് വെള്ളമുണ്ടെങ്കിലും ജലമെടുക്കാന് പറ്റുന്നില്ലായെന്ന് കച്ചവടക്കാര് പറയുന്നു. ലക്ഷങ്ങള് മുടക്കി നിര്മ്മിച്ച കുഴല്കിണറിന്റെ ഹാന്റില് തകരാറിലായെന്ന കാരണത്താല് വര്ഷങ്ങളായി ഉപയോഗ ശൂന്യമായിരിക്കുകയാണ്. ജലക്ഷാമം അകറ്റുന്നതിനായി നിരവധി പദ്ധതികളും ധനസഹായവുമൊക്കെ അനുവദിക്കുന്ന സാഹചര്യത്തിലാണ് ഇത്തരത്തില് ശുദ്ധജലസോത്രസുകള് ഉപേക്ഷിച്ച നിലയില് കിടക്കുന്നത്.
ബസ്സ്റ്റാന്റ് മേഖലയില് നൂറിലധികം കടകളാണ് പ്രവര്ത്തിക്കുന്നത്. ഇവിടെയുള്ള കച്ചവടക്കാര്ക്കും കടകളിലെ ജീവനക്കാര്ക്കും ശുദ്ധജലം പണം നല്കി വാങ്ങേണ്ട അവസ്ഥയിലാണ്. സമീപവാസികളാവട്ടെ കുടിവെള്ളം തേടി ദൂരസ്ഥലങ്ങളിലേയ്ക്കും പോകേണ്ടി വരും. സ്റ്റാന്റിനുള്ളില് തന്നെ കുടിവെള്ളക്ഷാമത്തിന് പരിഹാരമായി കുഴല്കിണര് ഉണ്ടെങ്കിലും ഫലപ്രദമാക്കാത്തത് അധികൃതരുടെ അനാസ്ഥയാണെന്ന് ആരോപണമുണ്ട്. ജില്ലാ ഭരണകൂടത്തിന്റെ വരള്ച്ചാ ദുരിതാശ്വാസ പദ്ധതിയില് ഉള്പ്പെടുത്തി കുഴല്കിണറില് മോട്ടോര് ഘടിപ്പിച്ച് ശുദ്ധജലം ലഭ്യമാക്കണമെന്നാണ് നാട്ടുകാരുടെയും വ്യാപാരികളുടെയും ആവശ്യം.
