പൂച്ചാക്കല്: വിദ്യാഭ്യാസപരമായി പിന്നാക്കം നില്ക്കുന്ന അരൂക്കുറ്റിയില് സര്ക്കാര് കോളജ് തുടങ്ങണമെന്ന ആവശ്യത്തിന് പതിറ്റാണ്ടുകളുടെ പഴക്കം. പ്രീമൈറി മുതല് പ്ലസ്ടു വരെ പഠിക്കുന്നതിന് ഇവിടെ സൗകര്യമുണ്ടെങ്കിലും തുടര് പഠനത്തിന് കിലോമീറ്ററുകളോളം സഞ്ചരിക്കേണ്ട സ്ഥിതിയാണ്. തുറവൂര് വിദ്യാഭ്യാസ ഉപജില്ലയില് നാല്പത്തിയാറ് എല്പി സ്കൂളുകളും പതിനാല് ഹയര്സെക്കന്ഡറി വിദ്യാലായങ്ങളും പ്രവര്ത്തിക്കുന്നുണ്ട്. കൂടാതെ അണ് എയ്ഡഡ് വിദ്യാഭ്യാസ സ്ഥാപനങ്ങളുമുണ്ട്.
ഇവ കൂടുതലും തീരദേശ മേഖലകളിലാണ് പ്രവര്ത്തിക്കുന്നത്. പെരുമ്പളം ദ്വീപില് ഹയര് സെക്കന്ഡറി സ്കൂള് ഉണ്ടെങ്കിലും യാത്രാദുരിതം മൂലം വിദ്യാര്ത്ഥികള്ക്ക് എത്തിപ്പെടാന് കഴിയാത്ത അവസ്ഥയാണ്. പാണാവള്ളി, പെരുമ്പളം, അരൂക്കുറ്റി, പള്ളിപ്പുറം, തൈക്കാട്ടുശ്ശേരി എന്നീ പ്രദേശങ്ങളിലെ വിദ്യാര്ത്ഥികളാണ് ഉന്നത വിദ്യാഭ്യാസ പ്രവേശനം നേടുന്നതിനായി ക്ലേശിക്കുന്നത്. പ്ലസ്ടു പഠനം പൂര്ത്തിയാക്കിയ വിദ്യാര്ത്ഥികള് എറണാകുളം, ആലപ്പുഴ, കോട്ടയം തുടങ്ങിയ സ്ഥലങ്ങളില് വിദ്യാഭ്യാസ സ്ഥാപനങ്ങളെയാണ് തുടര് പഠനത്തിനായി ആശ്രയിക്കുന്നത്. കയര്, കര്ഷക, മത്സ്യ, മണല് തൊഴിലാളികളുടെ മക്കളാണ് പഠിക്കുവാന് ഏറെ ബുദ്ധിമുട്ട് അനുഭവിക്കുന്നത്. ഇവര് പുലര്ച്ചെ വീടുകളില് നിന്ന് പുറപ്പെടേണ്ട സ്ഥിതിയാണ്.
ബസ്ചാര്ജ്ജിനായി ഭാരിച്ച തുക കണ്ടെത്തേണ്ടി വരുന്നതും, കടുത്ത യാത്രാദുരിതവും വിദ്യാര്ഥികളില് പലരുടെയും ഉന്നത വിദ്യാഭ്യാസ നേടണമെന്ന് ആഗ്രഹത്തിന് കരിനിഴല് വീഴ്്ത്തുകയാണ്. ഏറെദൂരം യാത്രചെയ്യേണ്ടി വരുന്നതിനാല് ഭൂരിഭാഗം വിദ്യാര്ത്ഥികളും ഹോസ്റ്റലുകളിലും വീടുകളിവും വാടകയ്ക്ക് താമസിച്ചാണ് പഠിക്കുന്നത്. താലൂക്കിന്റെ വടക്കെ അറ്റമായ അരൂക്കുറ്റിയില് ഏക്കര് കണക്കിന് സര്ക്കാര് ഭൂമിയാണ് തരിശായി കിടക്കുന്നത്. ഇവിടെ കോളേജ് സ്ഥാപിക്കണമെന്നാണ് പ്രദേശവാസികളുടെ ആവശ്യം.
