കറുകച്ചാല്: കറുകച്ചാല് പഞ്ചായത്തില് കുന്നിടിച്ച് മണ്ണെടുക്കുന്നതും തണ്ണീര്ത്തടം നികത്തുന്നതും വ്യാപിക്കുന്നു. ജനങ്ങളുടെ പരാതിക്കു മുന്നില് കോടതി ഉത്തരവുണ്ട് എന്ന പേരില് മാഫിയകള്ക്ക് കുടപിടിക്കുകയാണ് പഞ്ചായത്തും അധികാരികളും.
രാത്രികാലങ്ങളില് ലോഡുകണക്കിന് മണ്ണിറക്കി വെട്ടിക്കാവുങ്കല് തണ്ണീര്ത്തടം നികത്തി ഗെയ്റ്റും സ്ഥാപിച്ചു കഴിഞ്ഞു മാഫിയ.രാത്രിയിലെ നിയമവിരുദ്ധ നടപടികളുടെ ശേഷിപ്പുകള് പുലര്ച്ചെ ടാങ്കര് ലോറിയില് വെള്ളമിറക്കി റോഡു കഴുകി ഇല്ലാതാക്കുകയും ചെയ്യുന്നു.
നിര്മ്മാണത്തിന് അനുമതി നല്കണമെന്ന ഉത്തരവാണ് മാഫിയ കോടതിയില് നിന്നും നേടുന്നത്.ഇതിന്റെ മറവിലാണ് മണ്ണിറക്കി തണ്ണീര്ത്തടം നികത്തുന്നത്. എന് എസ് എസ് പടിക്കുസമീപം ചതിറല് ഭാഗത്തും വന്തോതില് മണ്ണെടുപ്പ് തുടരുന്നു. 14,15 വാര്ഡുകളിലെ കുന്നുകളാണ് മണ്ണ് മാഫിയ നിര്ബാധം ഇടിച്ചുകൊണ്ടുപോകുന്നത്. നെടുമറ്റംകുന്ന്, മഴുവനാടി വേമ്പന്താനം പള്ളിക്കുസമീപം സെറ്റില്മെന്റ് കോളനിയോട് ചേര്ന്നു കിടക്കുന്ന കുന്നും ഇടിച്ചു നിരത്തുകയാണ്. മഴുവനാടി ഹരിജന് സെറ്റില്മെന്റ് കോളനി നിവാസികളുടെ കുടിവെള്ളം മുട്ടിക്കുന്ന കുന്നിടിക്കാന് തടയണമെന്ന് നാട്ടുകാര് അധികാരികളോട് ആവശ്യപ്പെട്ടിട്ടും ഫലമില്ല. ടോറസ്സ് ലോറികള് തലങ്ങും വിലങ്ങും ഓടുന്നതുമൂലം എന്എസ്്എസ്പടി പാലമറ്റം റോഡിലും എംഎല് എപടി റോഡിലും ചെളിവെള്ളവും മണ്ണും കലര്ന്ന് യാത്ര ദുരിതമാക്കിയിരിക്കുകയാണ്.
സമീപപ്രദേശങ്ങളില് പോടിശല്യവും രൂക്ഷമാണ്. കറുകച്ചാല് പഞ്ചായത്തിലെ 14-ാം വാര്ഡില്പ്പെട്ട കുളത്തുങ്കല് ഭാഗത്ത് മണ്ണെടുക്കാന് വന്നവരെ നാട്ടുകാര് തടഞ്ഞു. ഇതിനെതിരെ കറുകച്ചാല് പഞ്ചായത്ത് ആര്ഡിഎ എന്നിവര്ക്ക് പരാതി നല്കി. രാത്രികാലങ്ങളില് അനധികൃതമായി കടത്തുന്ന മണ്ണുലോറികള് കസ്റ്റഡിയിലെടുക്കാന് ജില്ലാ കലക്ടറുടെ നിര്ദ്ദേശപ്രകാരം താലൂക്ക് തലത്തില് നെറ്റ് സ്വാഡുകള് രൂപീകരിച്ചിട്ടുണ്ടെങ്കിലും ഒന്നും ഫലപ്രദമല്ല.
