അങ്കമാലി: അങ്കമാലി മേഖലയില് ഇതരസംസ്ഥാന തൊഴിലാളികള് താമസിക്കുന്ന സ്ഥലങ്ങളില് മലേറിയ പടരുന്നു. അങ്കമാലി ടൗണിലും പരിസരത്തും ഇതരസംസ്ഥാന തൊഴിലാളികള് താമസിക്കുന്നിടത്താണ് നഗരസഭ ഹെല്ത്ത് വിഭാഗം മലേറിയ കണ്ടെത്തിയത്. ടൗണ് കോളനിയിലെ താമസ കേന്ദ്രത്തില് നടത്തിയ പരിശോധനയില് രണ്ട് ഇതരസംസ്ഥാന തൊഴിലാളികളികളില് മലേറിയ കണ്ടെത്തിയിട്ടുണ്ട്. ഇവരെ അങ്കമാലി താലൂക്ക് ആശുപത്രിയില് പ്രവേശിപ്പിച്ചു. ഇവരുടെ കൂടെ താമസിച്ചിരുന്ന ഒരാള് കഴിഞ്ഞയാഴ്ച മലേറിയ പിടിപ്പെട്ട് തൃശൂര് മെഡിക്കല് കോളജില് മരിച്ചിരുന്നു.
അങ്കമാലിയില് തട്ടുകട മുതല് സ്റ്റാര് ഹോട്ടലുകളില് വരെ ഇതരസംസ്ഥാന തൊഴിലാളികളാണ് പണിയെടുക്കുന്നത്. ഇവരില് ആര്ക്കും തന്നെ ഹെല്ത്ത് കാര്ഡില്ലെന്ന് പറയുന്നു. മലേറിയ തിരിച്ചറിഞ്ഞ ഉടന് നഗരസഭ ഹെല്ത്ത് വിഭാഗത്തിന്റെ നേതൃത്വത്തില് ഇതരസംസ്ഥാന തൊഴിലാളികളുടെ ക്യാമ്പുകളില് പരിശോധന ആരംഭിച്ചതായും, ഫോഗിംഗ് ഉള്പ്പെടെയുള്ള ശുചിത്വ നടപടികള്ക്ക് തുടക്കമിട്ടതായും നഗരസഭ ചെയര്പേഴ്സണ് എം.എ. ഗ്രേസി അറിയിച്ചു. ഹോട്ടലുകളില് ജോലി ചെയ്യുന്ന തൊഴിലാളികള്ക്ക് പരിശോധന നടത്തി അടിയന്തിരമായി ഹെല്ത്ത് കാര്ഡ് എടുക്കണമെന്ന് ഉടമകള്ക്ക് നിര്ദേശം നല്കിയതായും ചെയര്പേഴ്സണ് പറഞ്ഞു.
ടൗണില് ജനങ്ങള് തിങ്ങിപാര്ക്കുന്ന കോളനികളില് വേണ്ടത്ര പ്രാഥമിക സൗകര്യങ്ങള് ഇല്ലാതെ ഇതരസംസ്ഥാന തൊഴിലാളികള്ക്ക് താമസ സൗകര്യം ഒരുക്കിയിട്ടുണ്ട്. വാടക വരുമാനം മാത്രം ലക്ഷ്യംവച്ച് ഇതരസംസ്ഥാനക്കാര്ക്ക് ജനവാസകേന്ദ്രത്തില് തുറന്നിരിയ്ക്കുന്ന ലേബര് ക്യാമ്പുകള് നഗരസഭയുടെ ആരോഗ്യ വിഭാഗത്തിന്റെ നിയന്ത്രണത്തിലാക്കി മലേറിയ ഉള്പ്പെടെയുള്ള പകര്ച്ചവ്യാധികള് കൂടുതല് പടരാതിരിക്കാന് അടിയന്തിര നടപടി സ്വീകരിക്കണമെന്ന് നാട്ടുകാര് ആവശ്യപ്പെട്ടു.
