ലണ്ടന്: ഇംഗ്ലീഷ് പ്രീമിയര് ലീഗില് ഒന്നാം സ്ഥാനത്തുള്ള ആഴ്സണലിന് സ്റ്റോക്ക് സിറ്റിയുടെ സമനില ഷോട്ട്. ഇന്നലെ പുലര്ച്ചെ സമാപിച്ച കളി ഗോള്രഹിത സമനിലയില് കലാശിച്ചു. പന്തടക്കത്തില് ആഴ്സണലിനായിരുന്നു മുന്തൂക്കമെങ്കിലും ഷോട്ടുകള് പായിക്കുന്നതില് മുന്നിട്ടുനിന്നത് സ്റ്റോക്ക് സിറ്റി താരങ്ങളായിരുന്നു. അവര് പായിച്ച 14 ഷോട്ടുകളില് ആറെണ്ണം ഗോളിലേക്ക് നീങ്ങിയെങ്കിലും ഗണ്ണേഴ്സ് ഗോളിയെ കീഴടക്കാന് കഴിഞ്ഞില്ല. സമനിലയില് കലാശിച്ചെങ്കിലും 44 പോയിന്റുമായി ആഴ്സണലാണ് ഒന്നാമത്.
അതേസമയം മറ്റൊരു കളിയില് മാഞ്ചസ്റ്റര് യൂണൈറ്റഡ് എവേ മത്സരത്തില് 1-0ന് ലിവര്പൂളിനെ കീഴടക്കി. 78-ാം മിനിറ്റില് ക്യാപ്റ്റന് വെയ്ന് റൂണിയാണ് യുണൈറ്റഡിന്റെ വിജയഗോള് നേടിയത്. ഫെല്ലാനിയുടെ ഹെഡ്ഡര് ക്രോസ്ബാറില് തട്ടി തിരിച്ചുവന്നതാണ് റൂണി വലയിലേക്ക് തിരിച്ചുവിട്ടത്.
അതേസമയം ലിവര്പൂള് മുന്നേറ്റങ്ങള്ക്ക് മുന്നില് വിലങ്ങുതടിയായി നിന്നത് യുണൈറ്റഡ് ഗോളി ഡി ഗിയയായിരുന്നു. ഗോളെന്നുറപ്പിച്ച് നാല് ഷോട്ടുകളാണ് ഡി ഗിയയുടെ മെയ്വഴക്കത്തിന് മുന്നില് വിഫലമായത്. വിജയത്തോടെ യുണൈറ്റഡ് 22 മത്സരങ്ങളില് നിന്ന് 37 പോയിന്റുമായി അഞ്ചാം സ്ഥാനത്തേക്കുയര്ന്നു.
കഴിഞ്ഞ ദിവസം നടന്ന മത്സരങ്ങളില് മാഞ്ചസ്റ്റര് സിറ്റിയും ടോട്ടനവും മികച്ച വിജയം സ്വന്തമാക്കി. സിറ്റി മറുപടിയില്ലാത്ത നാല് ഗോളുകള്ക്ക് ക്രിസ്റ്റല് പാലസിനെ തകര്ത്തപ്പോള് സണ്ടര്ലാന്ഡിനെതിരെ ടോട്ടനത്തിന്റെ വിജയം ഒന്നിനെതിരെ നാല് ഗോളുകള്ക്കായിരുന്നു. മറ്റൊരു മത്സരത്തില് ലീസസ്റ്റര് സിറ്റി ആസ്റ്റണ് വില്ലയോട് 1-1 സമനില വഴങ്ങിയെങ്കിലും 44 പോയിന്റുമായി ഒന്നാം സ്ഥാനത്ത് തുടരുന്നു. അതേസമയം ചെല്സിയെ എവര്ട്ടണ് 3-3ന് സമനിലയില് തളച്ചു.
