തിരുവനന്തപുരം: തിരുവനന്തപുരത്ത് അടിയന്തരമായി കൈക്കൊള്ളേണ്ട റെയില്വെ വികസനത്തെക്കുറിച്ച് അനന്തപുരി വികസനസമിതി കേന്ദ്ര റെയില്വെ മന്ത്രിക്ക് നിവേദനം നല്കി. നിവേദനത്തില് ചൂണ്ടിക്കാണിച്ചിരിക്കുന്ന ആവശ്യങ്ങള് ഈ വര്ഷത്തെ റെയില്വെ ബജറ്റില് ഉള്പ്പെടുത്തി പ്രാവര്ത്തികമാക്കണമെന്ന് അനന്തപുരി വികസന സമിതി പ്രസിഡന്റ് പി. അശോക് കുമാര് ആവശ്യപ്പെട്ടു.
തിരുവനന്തപുരം ആസ്ഥാനമായി സൗത്ത് വെസ്റ്റ് റെയില്വെ സോണ് സ്ഥാപിക്കണമെന്നതാണ് നിവേദനത്തിലെ പ്രധാന ആവശ്യം. കേരളത്തെയും തമിഴ്നാട്ടിലെ കന്യാകുമാരി, തിരുനെല്വേലി തുടങ്ങിയ തെക്കന് ജില്ലകളെയും ഉള്പ്പെടുത്തി വേണം സോണ് സ്ഥാപിക്കേണ്ടതെന്നും നിവേദനത്തില് ചൂണ്ടിക്കാണിക്കുന്നു.
കേരളത്തിലെ തീവണ്ടി ഗതാഗതത്തിന്റെ സുഗമമായ നടത്തിപ്പിന് അത്യന്താപേക്ഷിതമായ കൊച്ചുവേളി ടെര്മിനല് നിര്മാണം ഉടന് പൂര്ത്തീകരിക്കുക, തിരുവനന്തപുരം സെന്ട്രലിലെ മെയിന്റനന്സ് യാര്ഡ് അടിയന്തരമായി നേമത്തുള്ള റെയില്വെയുടെ സ്വന്തം സ്ഥലത്തേക്ക് മാറ്റി സ്ഥാപിക്കുക, കൊച്ചുവേളിക്ക് അനുവദിച്ച ഇലക്ട്രിക് ലോക്കോഷെഡ് എത്രയും വേഗം പ്രവര്ത്തനമാരംഭിക്കുക, കേരളത്തിലെ റെയില്വെ വികസനം ഏകോപിപ്പിക്കാന് അനുവദിച്ച റെയില്വെ നിര്മാണ വിഭാഗം ചീഫ് എന്ജിനീയര് ഓഫീസും കോ-ഓര്ഡിനേറ്ററുടെ ഓഫീസായ ചീഫ് അഡ്മിനിസ്ട്രേറ്റീവ് ഓഫീസും തിരുവനന്തപുരത്ത് പുനഃസ്ഥാപിക്കുക, ടെക്നോപാര്ക്കിലെ ജീവനക്കാര്ക്കു കൂടി പ്രയോജനകരമാകും വിധം കഴക്കൂട്ടത്തെ റെയില്വെ വികസന പ്രവര്ത്തനങ്ങള് ത്വരിതപ്പെടുത്തുക, ഗുഡ്സ് വണ്ടികള്ക്കു വേണ്ടി കഴക്കൂട്ടത്ത് രണ്ട് അഡീഷണല് ലൈനുകളിട്ട് ലൈന് കപ്പാസിറ്റി വര്ധിപ്പിക്കുക, തിരുവനന്തപുരത്തു നിന്ന് ഹൈദരാബാദിലേക്ക് പോകുന്ന ശബരി എക്സ്പ്രസിന് കഴക്കൂട്ടത്ത് സ്റ്റോപ്പ് അനുവദിക്കുക, കൊച്ചുവേളി, നേമം സ്റ്റേഷനുകള്ക്ക് തിരുവനന്തപുരം നോര്ത്ത്, തിരുവനന്തപുരം സൗത്ത് എന്ന് പുനര്നാമകരണം ചെയ്യുക, വര്ഷങ്ങള്ക്കു മുമ്പ് സര്വെ പൂര്ത്തിയായ പുനലൂര്-തിരുവനന്തപുരം-നെടുമങ്ങാട് ലൈനിന്റെ നിര്മാണത്തിനുള്ള തുക ബജറ്റില് ഉള്പ്പെടുത്തുക, കൊച്ചുവേളിയിലേക്ക് മാറ്റിയ തിരുവനന്തപുരത്തെ ഗുഡ്സ് യാര്ഡ് പുനഃസ്ഥാപിക്കുക, കൊച്ചുവേളിയില് പ്രവര്ത്തിച്ചിരുന്ന ഭാരത് പെട്രോളിയം, ഇന്ത്യന് ഓയില്, ഹിന്ദുസ്ഥാന് പെട്രോളിയം എന്നിവയുടെ ഓയില് സ്റ്റോറേജ് ഡിപ്പോകള് തുറന്നു പ്രവര്ത്തിപ്പിക്കാന് നടപടി സ്വീകരിക്കുക തുടങ്ങിയ ആവശ്യങ്ങള് നിവേദനത്തില് ഉന്നയിച്ചിട്ടുണ്ട്.
