അമ്പലപ്പുഴ: സിനിമാമോഹം നല്കി കുട്ടികളെ വലയിലാക്കുന്ന സംഘം ജില്ലയില് വിലസുന്നു. വാഗമണ് സ്വദേശി ബിജുവിനെതിരെയാണ് പോലീസില് പരാതി ലഭിച്ചത്. കഴിഞ്ഞ ദിവസം ഒരു സംഘം ആലപ്പുഴ ബീച്ചിലെ റിസോര്ട്ടില് ബാലതാരങ്ങളെ സിനിമയില് അഭിനയിപ്പിക്കാനായി ഇന്റര്വ്യൂ നടത്തിയിരുന്നതായും സൂചനയുണ്ട്. സിനിമയില് അഭിനയിപ്പിക്കാമെന്ന് പറഞ്ഞ് അമ്പലപ്പുഴയിലെ ഒരാളില് നിന്നും പണം തട്ടിയന്നാരോപിച്ച് പോലീസില് കഴിഞ്ഞ ദിവസം പരാതി നല്കിയിരുന്നു. വാഗമണ് വിഷ്വല് മീഡിയയുടെ പുതിയ ചിത്രത്തിലേക്ക് ബാലതാരങ്ങളെ ആവശ്യമുണ്ടെന്ന് പറഞ്ഞാണ് വാഗമണ് കല്ലുമല സ്വദേശിയായ ബിജു എന്നയാള് കുട്ടിയുടെ മാതാപിതാക്കളുമായി ബന്ധപ്പെടുന്നത്. കരുമാടിയില് നടന്ന സിനിമാഷൂട്ടിങ് സ്ഥലത്തെത്തിയ ഇയാള് കുട്ടിയുമായി പരിചയപ്പെടുകയായിരുന്നു.
കുട്ടിയുടെ മാതാവിന്റെ ഫോണ്നമ്പര് വാങ്ങിയതിന് ശേഷം പലതവണ വിളിക്കുകയും കുട്ടിയെ സിനിമയില് അഭിനയിപ്പിക്കാമെന്ന് പറയുകയും ചെയ്തു. മകളെ സിനിമയില് അഭിനയിപ്പിക്കുന്നതിനോട് യോജിപ്പില്ലെന്ന് പറഞ്ഞെങ്കിലും ഇയാള് നിരന്തരം വിളിച്ചുകൊണ്ടിരുന്നു.
ബിജുമേനോനും ശോഭനയും അഭിനയിക്കുന്ന ചിത്രത്തിലേക്ക് ശോഭനയുടെ മകളായി അഭിനയിക്കാന് ഒരു ബാലനടിയെ ആവശ്യമുണ്ടെന്ന് പറഞ്ഞായിരുന്നു ഇവരെ സമീപിച്ചത്. ഇയാളുടെ നിര്ബന്ധത്തിനൊടുവില് കുട്ടിയെ അഭിനയിപ്പിക്കാന് മാതാപിതാക്കള് സമ്മതിച്ചു. കുട്ടിയുടെ വിവിധ മോഡലിലുള്ള ചിത്രങ്ങള് ആവശ്യപ്പെട്ടതനുസരിച്ച് അയച്ചുകൊടുത്തു. ദിവസങ്ങള്ക്ക് ശേഷം കുട്ടിയെ തിരഞ്ഞെടുത്തെന്നും അഭിനയിക്കാനുള്ള എഗ്രിമെന്റുകള് തയ്യാറാക്കാനായി കുറച്ചു തുക ആവശ്യപ്പെട്ടതനുസരിച്ച് എസ്ബിടി വാഗമണ് ശാഖയില് ഇയാളുടെ പേരിലുള്ള അക്കൗണ്ടിലേക്ക് പണം നിക്ഷേപിച്ചു.
അടുത്ത ദിവസം ഡയലോഗ് പഠിപ്പിക്കാനായി അമ്പലപ്പുഴയില് കുറച്ചുപേര് എത്തുമെന്നും ഇതിനായി കുറച്ചു തുക കൂടിവേണമെന്ന് യുവാവ് ആവശ്യപ്പെട്ടു. ഇതില് സംശയം തോന്നി അന്വേഷിച്ചപ്പോഴാണ് ഇയാളുടെ അക്കൗണ്ടിലേക്ക് നിരവധി പേര് ഇത്തരത്തില് പണം നിക്ഷേപിക്കുന്നതായ വിവരം അറിയുന്നത്. കഴിഞ്ഞ മാസം മാത്രം പലരില് നിന്നായി ലക്ഷങ്ങള് ഇയാളുടെ അക്കൗണ്ടിലേയ്ക്ക് എത്തിയതായി അറിയുന്നു.
സിനിമയില് അഭിനയിക്കാന് താല്പ്പര്യമില്ലെന്നും നല്കിയപണം തിരിച്ച് ആവശ്യപ്പെടുകയും ചെയ്തു. പലതവണ ഉറപ്പുനല്കിയെങ്കിലും പണം തിരിച്ചു നല്കിയില്ല. തുടര്ന്നാണ് പോലീസില് പരാതി നല്കിയത്. പോലീസ് ആവശ്യപ്പെട്ടിട്ടും ഇയാള് സ്റ്റേഷനില് ഹാജരാകാന് കൂട്ടാക്കിയിട്ടില്ല. സിനിമയില് അഭിനയിപ്പിക്കാമെന്ന് വാഗ്ദാനം നല്കി പണം തട്ടുകയും കൊച്ചുകുട്ടികളെ വലയിലാക്കുന്ന സംഘവുമായി ഇയാള്ക്ക് ബന്ധമുണ്ടെന്നാണ് പോലീസ് സംശയിക്കുന്നത്.
