തിരുവനന്തപുരം: ഹിന്ദുവും ഹിന്ദുത്വവും തമ്മിലുള്ള ബന്ധം ഇസ്ലാമും ഇസ്ലാമിക് സ്റ്റേറ്റും തമ്മിലുള്ളത് മാത്രമാണെന്നു വി.ടി. ബല്റാമിന്റെ ഫേസ്ബുക്ക് പോസ്റ്റ്. ‘വിവാദമോ…! എന്ത് വിവാദം, ഏത് വിവാദം’ എന്ന ശീര്ഷകത്തിലാണ് പോസ്റ്റ്.
ഹിന്ദുത്വം എന്നത് സംഘപരിവാര് എന്ന അസ്സല് ഫാസിസ്റ്റ് സംഘടനയുടെ രാഷ്ട്രീയ പ്രത്യയശാസ്ത്രത്തിന്റെ പേരാണെന്നും അതിന് ഇന്നാട്ടിലെ സാധാരണക്കാരായ ഹിന്ദുമത വിശ്വാസികളുടെ നിഷ്ക്കളങ്ക വിശ്വാസങ്ങളും സാംസ്കാരിക പാരമ്പര്യങ്ങളുമായി പുലബന്ധം പോലുമില്ല. ഇക്കാര്യം ഞാന് മാത്രമല്ല, കാര്യ വിവരമുള്ള എത്രയോ അധികം ആളുകള് എത്രയോ കാലമായി പറഞ്ഞു വരികയാണെന്നും പോസ്റ്റില് ബല്റാം പറയുന്നു.
രാഷ്ട്രപിതാവ് മഹാത്മാഗാന്ധിയെ വധിച്ച കേസില് പ്രതിയായിരുന്ന ഹിന്ദു മഹാസഭ നേതാവ് വി.ഡി. സവര്ക്കര് ആണ് ഹിന്ദുത്വം എന്ന ഈ വാക്കിനും രാഷ്ട്രീയാശയത്തിനും രൂപം നല്കിയത്. ഗാന്ധി ഘാതകരുടെ പ്രത്യയശാസത്രമായ ഹിന്ദുത്വത്തെ ഇവിടത്തെ സാധാരണ ഹിന്ദുക്കളുടെ തലയില് കെട്ടിയെഴുന്നെള്ളിക്കാനും അതിനെ എതിര്ക്കുന്നവരെ മുഴുവന് ഹിന്ദു വിരോധികളായി ബ്രാന്ഡ് ചെയ്യാനും ആണ് ആര്എസ്എസ് ശ്രമിക്കുന്നതെന്നും ബല്റാം ആരോപിച്ചു.
ബഹുസ്വരതകളോടും വൈവിധ്യങ്ങളോടും സഹിഷ്ണുത പുലര്ത്തുക മാത്രമല്ല, അവയെ എല്ലാം ഉള്ക്കൊള്ളുകയും അംഗീകരിക്കുകയും ചെയ്യുന്ന വിശാലമാനവികതയാണ് യഥാര്ത്ഥ ഭാരതീയ പാരമ്പര്യമായും ഹൈന്ദവ സംസ്ക്കാരമായും നാം കണ്ടെടുക്കേണ്ടതും മുന്നോട്ടു കൊണ്ടുപോകേണ്ടതും. അതിനു പകരം ഭാരതത്തിലെ ദളിതരേയും ന്യൂനപക്ഷങ്ങളേയും ശത്രുപക്ഷത്ത് നിര്ത്തി, ഉത്തരേന്ത്യന് ബ്രാഹ്മണ്യത്തിന്റെ മൂല്യവ്യവസ്ഥകളിലൂന്നി, അക്രമോത്സുകമായ തീവ്രവര്ഗീയത വളര്ത്തുന്ന നവനാസി ആശയമാണ് ഹിന്ദുത്വം. അതിനു ചേരുന്ന താരതമ്യം ഐഎസുമായിട്ട് തന്നെയാന്നെന്നും ബല്റാം ഫേസ്ബുക്കില് കുറിച്ചു.
പ്രതികരിക്കാൻ ഇവിടെ എഴുതുക: