കോഴിക്കോട്: നഗരത്തിലെ അരവിന്ദ് ഘോഷ് റോഡിന് സമീപം പഴയ ഇരുമ്പ് കച്ചവടം നടത്തുന്നവര് പഴയ വാഹനങ്ങള് പൊളിക്കാന് പൊതുസ്ഥലം അനുവദിക്കണമെന്ന ആവശ്യമുയര്ത്താന് തുടങ്ങിയിട്ട് വര്ഷങ്ങളായി. വലിയങ്ങാടി, കെ.പി കേശവമേനോന് റോഡ്, അരവിന്ദ്ഘോഷ് റോഡ്, ലോറി സ്റ്റാന്റ് റോഡ് എന്നിവിടങ്ങളിലായി ഇപ്പോള് വ്യാപിച്ചു കിടക്കുന്ന കച്ചവടക്കാര്ക്ക് സൗകര്യപൂര്വ്വം കച്ചവടം നടത്താന് ഒരു സ്ഥലമില്ല. തൃശൂരിലും തിരുവനന്തപുരത്തും ഉള്ള മാതൃകയില് ഒരു പൊതു സ്ഥലമാണ് ഇവര് ആവശ്യപ്പെടുന്നത്. സര്ക്കാര് അര്ദ്ധസര്ക്കാര്, ഇന്ഷുറന്സ് കമ്പനി, കോര്പ്പറേഷന്, കെഎസ്ആര്ടിസി എന്നീ സ്ഥാപനങ്ങളിലെ പഴയ വാഹനങ്ങളും ഇരുമ്പ് ഉരുപ്പടികളും പുറംതള്ളപ്പെടുന്ന ഉപയോഗപ്രദമായ ഒറിജിനല് സ്പെയര് പാര്ട്ടുകളും റീസൈക്ലിംഗ് ചെയ്യുകയാണ് ഇവിടെ. ഉപേക്ഷിക്കപ്പെടുന്ന വസ്തുക്കള് പുനര് ഉപയോഗത്തിന് തയാറാക്കുക വഴി വലിയൊരു സാമൂഹിക പ്രവര്ത്തനമാണ് ഇവര് നടത്തുന്നത്. എന്നിട്ടും വാഹനങ്ങള് പൊളിക്കാനായി ഒരു പൊതുസ്ഥലം നല്കണമെന്ന ആവശ്യം കോര്പ്പറേഷനും സര്ക്കാരും ഇതുവരെ പരിഗണിച്ചിട്ടില്ല. പലതവണ നിവേദനങ്ങളും മറ്റും നല്കിയിട്ടും യാതൊരു പ്രയോജനവും ഉണ്ടായിട്ടില്ലെന്ന് കച്ചവടക്കാര് പറയുന്നു. പുതിയ വാഹനങ്ങള്ക്ക് നികുതി നല്കിയാണ് ജനങ്ങള് വാങ്ങുന്നത്. അതേ വാഹനങ്ങള് പഴയതാവുമ്പോള് പഴയ ഇരുമ്പിന് തങ്ങളില് നിന്നും വീണ്ടും നികുതി ഈടാക്കുകയാണെന്ന പരാതിയും ഇവര് ഉന്നയിക്കുന്നു. ഈ മേഖലയില് പ്രവര്ത്തിക്കുന്ന വന്കിട കമ്പനികള്ക്ക് ഈ നികുതി വലിയ ബാധ്യത അല്ലെങ്കിലും ചെറുകിട കച്ചവടക്കാര്ക്ക് ഇത് ബാധ്യത സൃഷ്ടിക്കുന്നു. പഴയ ഇരുമ്പ്, ലോഹ വിപണിയെ ആശ്രയിച്ച് ആയിരത്തോളം കുടുംബങ്ങളാണ് ജീവിതമാര്ഗ്ഗം കണ്ടെത്തുന്നത്. ഇവിടെ പണിയെടുക്കുന്ന കയറ്റിറക്ക് തൊഴിലാളികളായി നൂറോളം കുടുംബങ്ങള് വേറെയുമുണ്ട്.വെറും ഒരു തൊഴില് മേഖല മാത്രമല്ലെന്നും പരിസ്ഥിതി സംരക്ഷണ പ്രവര്ത്തനമായി ഇത് അംഗീകരിക്കണമെന്നും, അമിത പ്രകൃതി ചൂഷണത്തിനു പകരം റീസൈക്ലിംഗ് എന്ന ഇരുപത്തിയൊന്നാം നൂറ്റാണ്ടിന്റെ സന്ദേശം തങ്ങളോടൊപ്പം ചേര്ന്ന് പ്രചരിപ്പിക്കണമെന്നും ഈ മേഖലയില് പ്രവര്ത്തിക്കുന്ന ഓള്ഡ് മെറ്റല് ഡീലേഴ്സ് അസോസിയേഷന് ആവശ്യപ്പെടുന്നു. സംഘടനയുടെ ഗോള്ഡന് ജൂബിലി ആഘോഷം ഡിസംബര് 26,27 തിയ്യതികളില് കോഴിക്കോട് ടൗണ്ഹാളില് നടക്കും. കുടുംബസംഗമം മന്ത്രി ഡോ. എം.കെ. മുനീര്, സമാപന സമ്മേളനം മേയര് വി. കെ. മമ്മദ്കോയ, ഐഡി കാര്ഡ് വിതരണം എം.പി കെ. രാഘവന് എന്നിവര് നിര്വഹിക്കുമെന്ന് വാര്ത്താ സമ്മേളനത്തില് കെ. ഹസ്സന്കോയ, എം.എ സത്താര്, പി.പി. ഇമ്പിച്ചി അബൂബക്കര് ഹാജി, പി. സലിം, പി.പി. നാസര്, എം.പി. നാസര്, കെ.വി. അബ്ദുള് റസാഖ് എന്നിവര് പറഞ്ഞു.
പൊളിക്കാന് ഒരു പൊതുസ്ഥലം തേടി
ബന്ധപ്പെട്ട വാര്ത്തകള്
പുതിയ വാര്ത്തകള്
ജന്മഭൂമി ഓണ്ലൈന്© Mathruka Pracharanalayam Limited.
Tech-enabled by Ananthapuri Technologies.