കണ്ണൂര് ജില്ലയിലെ തളിപ്പറമ്പില് വിശ്രമ ജീവിതം നയിക്കുന്ന കെ.സി. കണ്ണന് (കടച്ചികണ്ണന്) ഇന്ന് ‘സര്വ മംഗള പുരസ്കാരം’ സമര്പ്പിക്കുകയാണ.് എഴുപതിറ്റാണ്ട് കാലം കണ്ണൂര്ജില്ലയുടെ സാമൂഹ്യ രാഷ്ട്രീയ മണ്ഡലത്തില് നിറഞ്ഞുനിന്ന ‘കണ്ണേട്ടന്’ ഒരുപക്ഷേ പുതിയ തലമുറയ്ക്ക് അപരിചിതനായിരിക്കും.
രാഷ്ട്രീയ സ്വയംസേവകസംഘത്തിന്റെ മൂശയില് രൂപംകൊണ്ട ഈ പൊതുജനസേവകന് പത്തുവര്ഷത്തോളം ഭാരതീയ ജനസംഘത്തിന്റെ ജില്ലയിലെ കരുത്തുറ്റ നേതാവായിരുന്നു. കെ.ജി. മാരാര്ജിക്കൊപ്പമാണ് അദ്ദേഹം പാര്ട്ടിയെ നയിച്ചത്. ഇരുവരുടെയും വ്യക്തിത്വം വ്യത്യസ്തം. മാരാര്ജി പൊതുസമ്മേളനങ്ങളില് ജനങ്ങളെ ആകെയും കയ്യിലെടുക്കുകയും പ്രവര്ത്തകരെ ആവേശഭരിതരാക്കുകയും ചെയ്തിരുന്നുവെങ്കില് പൊതുസമ്മേളനങ്ങളിലെ പ്രസംഗങ്ങളില് ഒട്ടും താല്പര്യം കണ്ണേട്ടനുണ്ടായിരുന്നില്ല. ജില്ലാ സംഘടനാ സെക്രട്ടറി എന്നനിലയില് എല്ലാ പ്രവര്ത്തകരുടെയും പേരുചൊല്ലി വിളിക്കാനുള്ള അടുപ്പം കണ്ണേട്ടന് വളര്ത്തിയെടുത്തു.
കലാലയ ബിരുദങ്ങളോ രാഷ്ട്രീയത്തിലെ കൗശലങ്ങളോ ഇല്ലെങ്കിലും രാഷ്ട്രീയ പ്രവര്ത്തകരെ വളര്ത്തിയെടുക്കുന്നതില് അനിതര സാധാരണമായ മികവ് അദ്ദേഹം പ്രകടിപ്പിച്ചു. സംഘടനയില് മുഴുവന് സമയപ്രവര്ത്തനത്തില് ഏര്പ്പെട്ടവര്ക്ക് ഭക്ഷണത്തിന് വകയൊരുക്കാനും വസ്ത്രങ്ങള്ക്ക് സംവിധാനവും ഉണ്ടാക്കിക്കൊടുക്കാന് അദ്ദേഹം ശ്രദ്ധിച്ചു. ആത്മാര്ത്ഥതയും അര്പ്പണശീലവുമായിരുന്നു മുതല്ക്കൂട്ട്. റോഡുവക്കിലൂടെ നടന്നുപോകവെ വാഹനം ഇടിച്ച് സാരമായി പരിക്കേറ്റ് മൂന്നുമാസത്തോളം കിടപ്പിലായപ്പോള് മാത്രമായിരുന്നു അദ്ദേഹത്തിന്റെ വിശ്രമകാലം. പരിക്ക് ഭേദമാകുംമുന്പ് തന്നെ അദ്ദേഹം തന്റെ കര്മ്മഭൂമിയില് സജീവമായി.
സഹപ്രവര്ത്തകരുടെ മികവിനെ കലവറയില്ലാതെ അഭിനന്ദിക്കും. എന്നാല് ഏല്പ്പിച്ച ജോലിയില് വീഴ്ചവരുത്തിയാല് കണക്കിന് കിട്ടുകയും ചെയ്യും. ആരുടെ മുന്നിലും അഭിപ്രായം തുറന്നുപറയാനും വേണ്ടിവന്നാല് വഴക്കിടാനും അദ്ദേഹത്തിന് മടിയില്ല. കെ.ജി.മാരാര്ജിയോടുപോലും അതിന് തയ്യാറായ സന്ദര്ഭങ്ങള് നിരവധി.
പരമേശ്വര്ജിയുടെ പ്രേരണയാല് ജനസംഘത്തിന്റെ മുഴുവന് സമയ പ്രവര്ത്തകനായ കണ്ണേട്ടന് ഭാരതീയ ജനതാ പാര്ട്ടിയില് കൈത്തറി സെല്ലിന്റെ സംസ്ഥാന കണ്വീനറായിരുന്നിട്ടുണ്ട്. തളിപ്പറമ്പ് പൂക്കോത്ത് തെരുവിലെ നിര്ധന കുടുംബത്തില് ജനിച്ച കണ്ണേട്ടന്റെ ഉപജീവനമാര്ഗവും കുലത്തൊഴിലായിരുന്നു. തളിപ്പറമ്പ് അര്ബന് ബാങ്ക് ഡയറക്ടര്, പൂക്കോത്ത് ക്ഷേത്രസമിതി പ്രസിഡന്റ്, തളിപ്പറമ്പ് വീ വേര്ത്ത് സൊസൈറ്റി പ്രസിഡന്റ്, ഭാരതീയ വിചാരകേന്ദ്രം സംഘടനാ സെക്രട്ടറി, തൃശ്ചംബരം വിവേകാനന്ദ സ്കൂള് സെക്രട്ടറി എന്നീ പദവികളെല്ലാം വഹിച്ചിട്ടുള്ള കണ്ണേട്ടന് ശതാഭിഷേക വേളയില് ലഭിക്കുന്ന ‘സര്വ മംഗല’ പുരസ്കാരം അവസരോചിതവും അര്ഹിക്കുന്ന അംഗീകാരവുമാണ്. കണ്ണേട്ടന് പുരസ്കാരം നല്കുന്നതോടെ സര്വമംഗള ചാരിറ്റബിള് ട്രസ്റ്റിനും മികവുണ്ടാവുകയാണ്.
