പിഞ്ചുകുഞ്ഞുങ്ങള് ഉള്പ്പെടെ ദശലക്ഷക്കണക്കിന് ജനങ്ങളെ ഭൂമുഖത്തുനിന്ന് തുടച്ചുമാറ്റിയേക്കാവുന്ന അത്യന്തം ഭീകരമായ ആ ദുരന്തം ഒരു പക്ഷെ ആസന്നമായി സംഭവിച്ചെന്നു വരില്ല. പക്ഷെ ഇന്നല്ലെങ്കില് നാളെ അത് സംഭവിച്ചുകൂടായ്കയില്ല. അണക്കെട്ട് തകര്ന്ന് ചൈനയിലെ ഒരു പ്രദേശം മുഴുവന് നരകനാശത്തിനു വിധേയമായ ചരിത്രം നമ്മുടെ മുമ്പിലുണ്ട്.
115 വര്ഷങ്ങള്ക്കു മുമ്പ് നിലവിലുണ്ടായിരുന്ന സാങ്കേതികവിദ്യയും കരിങ്കല്ലും കുമ്മായവും സുര്ക്കിയും മറ്റും ഉപയോഗിച്ചു നിര്മ്മിച്ച മുല്ലപ്പെരിയാര് അണക്കെട്ട് ഇത്രയും കാലം നിന്നത് തന്നെ നമ്മുടെ ഭാഗ്യം. നൂറ്റാണ്ടുകളെ അതിജീവിക്കുന്ന ഒരു ബഹുനിലസൗധംപോലെയല്ലല്ലോ നിരന്തരമായി അതിശക്തമായ ജലസമ്മര്ദ്ദത്തെ നേരിട്ടുകൊണ്ടിരിക്കുന്ന ഒരു അണക്കെട്ട്. ഒരു കെട്ടിടം കാലപ്പഴക്കംകൊണ്ട് തകര്ന്നകടിഞ്ഞാല് പോലും അതില് കഴിയുന്നവര്ക്ക് മാത്രമേ ജീവഹാനി സംഭവിക്കാന് സാധ്യതയുള്ളൂ. പക്ഷെ അതല്ല ഒരു അണക്കെട്ട് തകര്ന്നാല് സംഭവിക്കുന്നത്. മുല്ലപ്പെരിയാര് ഡാം തകര്ന്നാല് കേരള സംസ്ഥാനത്തിന്റെ ഗണ്യമായ ഒരു ഭാഗമായിരിക്കും ഒലിച്ചുപോകുക. ലക്ഷക്കണക്കിന് ജനങ്ങളോടൊപ്പം ആ പ്രദേശത്തുള്ള സംസ്കാരത്തിന്റെ മുദ്രകളായ സ്കൂളുകളും കോളേജുകളും ക്ഷേത്രങ്ങളും പള്ളികളും ജനവാസകേന്ദ്രങ്ങളും എല്ലാം നാമാവശേഷമാകും. എന്തിന്, സംഹാരതാണ്ഡവം കഴിഞ്ഞു ഹെലികോപ്ടറിലൂടെ വീക്ഷിച്ചാല് ആയിരത്താണ്ടുകളിലൂടെ വളര്ന്നു വികസിച്ച ഒരു സംസ്കാരം നിലനിന്നിരുന്ന പ്രദേശം ആയിരുന്നോ അവിടം എന്ന് അതിശയിച്ചുപോകും.
ഒരു പക്ഷെ ഒരു നൂറ്റാണ്ടുകൂടി ഈ അണക്കെട്ട് ഭദ്രമായി നിലനിന്നെന്നു വരാം. (ഭൂചലനസാധ്യത ഏറെയുള്ള ഇടുക്കി പ്രദേശത്ത്, പ്രാചീന സമ്പ്രദായത്തില് നിര്മ്മിച്ച ഒരു അണക്കെട്ടിനെ സംബന്ധിച്ച് പറയുമ്പോള് ആ പ്രതീക്ഷ അതിമോഹം എന്നേ പറയാന് കഴിയൂ). പക്ഷെ ഡെമോകഌസിന്റെ ആ വാളുപോലെ തലയ്ക്കു മുകളില് തൂങ്ങിക്കിടക്കുന്ന ആപല്സാധ്യത ജനങ്ങളില്, വിശേഷിച്ചു കുട്ടികളില് സൃഷ്ടിക്കുന്ന ആപല്ശങ്ക അധികാരികള് നിസ്സാരമായി തള്ളിക്കളയരുത്. അണക്കെട്ടിന്റെ ജലസംഭരണശേഷി സുരക്ഷിതമായ അളവില് സുമാര് 130 അടിയായി നിജപ്പെടുത്തി ബാക്കി ജലം സ്ഥിരമായി തുറന്നുവിട്ട് നദിയിലൂടെ അനുസ്യൂതമായ ജലപ്രവാഹം ഉറപ്പാക്കുന്നതായിരിക്കും ആശാസ്യം. അതാണ് വിദഗ്ധരുടെ അഭിപ്രായവും.
ഉദാസീനതയോ, വീക്ഷണവൈകല്യമോ? അതോ മാള്ത്തൂസിയന് സിദ്ധാന്തത്തിന്റെ സാധൂകരണത്തിനു വേണ്ടിയുള്ള കാത്തിരിപ്പോ? വിശ്വസിക്കാനാകുന്നില്ല!
പ്രൊഫ. എം. വി. എസ്. നമ്പൂതിരി, വൈസ് പ്രസിഡന്റ്, പമ്പാ പരിരക്ഷണ സമിതി
സോണിയ-രാഹുല്, മറ്റൊരു നേതാവില്ല
”യഹോവയല്ലാതെ മറ്റൊരു ദൈവമില്ല” എന്നുപറഞ്ഞുകേട്ടിട്ടുണ്ട്. മുന് കേന്ദ്രമന്ത്രി സല്മാന് ഖുര്ഷിദ് പറയുന്നു: ” സോണിയ അല്ലെങ്കില് രാഹുല് അല്ലാതെ കോണ്ഗ്രസില് ഒരു ബദല് നേതൃത്വത്തിനുള്ള വിദൂര സാധ്യതപോലുമില്ല. പ്രായംതിരുത്തിയ്ക്കും. കാരണം, സോണിയ-രാഹുല് കഴിഞ്ഞാല് പിന്നെ പ്രിയങ്കയുണ്ടല്ലോ കോണ്ഗ്രസിനെ നയിക്കാന്. അതും കഴിഞ്ഞാലോ? ഉണ്ടല്ലോ പ്രിയങ്കാ പുത്രന്/പുത്രി. അക്കാര്യത്തില് കോണ്ഗ്രസുകാര് മഹാഭാഗ്യവാന്മാര് തന്നെ. തങ്ങളെ നയിക്കാനുള്ള അവകാശം അവര് ഒരു കുടുംബത്തിന് പതിച്ചു നല്കിയിരിക്കുകയാണല്ലോ.
മന്മോഹന് സിങ്ങിനെ പ്രധാനമന്ത്രിയാക്കാന് തീരുമാനിച്ചപ്പോള് കോണ്ഗ്രസിനകത്തുള്ളവരും പുറത്തുള്ളവരും ഞെട്ടിപ്പോയെന്നും സല്മാന് ഖുര്ഷിദ് വെളിപ്പെടുത്തുന്നു. ഞെട്ടാനുള്ള സ്വാതന്ത്ര്യം അനുവദിച്ചത് ഭാഗ്യം.
ഏതെങ്കിലും കാരണവശാല് കുടുംബാംഗങ്ങള്ക്കു പ്രധാനമന്ത്രിയാകാന് പറ്റിയില്ലെങ്കില് അവരുടെ ബിനാമി ആ സ്ഥാനത്തിരിക്കും. ചുമ്മാതെ ഞെട്ടാനല്ലാതെ ആര്ക്കും ചോദ്യം ചെയ്യാന് അവകാശമില്ല. ഇതുപോലെ ചില സങ്കടങ്ങളോക്കെ ശരത് പവാറും ഈയിടെ ഏറ്റുപറഞ്ഞു. കുടുംബവാഴ്ചയും ജനാധിപത്യവും സമരസപ്പെട്ടു പോകുന്ന കാഴ്ച അത്ഭുതപ്പെടുത്തുന്നതു തന്നെ. ആഴത്തില് പഠനവിഷയമാക്കേണ്ട ഒരു പ്രതിഭാസമാണിത്.
കെ.വി.സുഗതന്, ആലപ്പുഴ
