തിരുവനന്തപുരം: രോഗിയായ ഓട്ടോ ഡ്രൈവര്ക്ക് സ്റ്റാന്ഡില് പ്രവേശിക്കാന് വിലക്ക്. നെല്ലിമൂട് ഓട്ടോ സ്റ്റാന്ഡിലാണ് സംഭവം. നെല്ലിമൂട് കഴൂര് ശ്രീപുരം പുത്തന്വീട്ടില് കിണറുവെട്ടിയ വിള പുത്തന്വീട്ടില് വി. ശിശുപാല(44)നാണ് ഓട്ടോ സ്റ്റാന്ഡില് വിലക്ക്. 23 വര്ഷമായി ചുമട്ടുതൊഴിലാളിയായിരുന്ന ശിശുപാലന് മൂന്നുവര്ഷം മുമ്പ് ലോഡിംഗിനിടെ ഒരപകടത്തില് കഴുത്തിന് സാരമായി ക്ഷതമേറ്റു. ഇതേ തുടര്ന്ന് ചികിത്സയിലായിരുന്ന ശിശുപാലന് കഴിഞ്ഞവര്ഷമാണ് ഉപജീവനത്തിനായി ഓട്ടോറിക്ഷ വാങ്ങിയത്. ഭാര്യയും മൂന്നു പെണ്കുട്ടികളുമടങ്ങുന്ന കുടുംബത്തിന്റെ ചെലവും ചികിത്സാചെലവും ശിശുപാലനെ മാത്രം ആശ്രയിച്ചാണ്. ആര് ടി ഒയില് നിന്ന് നെല്ലിമൂട് സ്റ്റാന്ഡിലേക്കുള്ള പെര്മിറ്റും ശിശുപാലന് കിട്ടി. എന്നാല് ഓട്ടോയുമായി എത്തിയ ശിശുപാലനെ സ്റ്റാന്ഡിലുള്ളവര് തടയുകയായിരുന്നു.
സിഐടിയു, ഐഎന്ടിയുസി, എഐടിയുസി നിയന്ത്രണത്തിലുള്ള ഓട്ടോ സ്റ്റാന്ഡിലെ തൊഴിലാളികളാണ് ശിശുപാലന് വിലക്കേര്പ്പെടുത്തിയത്. ഒരു കിലോമീറ്റര് പരിധിക്കുള്ളില് താമസിക്കുന്നവര്ക്ക് മാത്രമേ ഓട്ടോ സ്റ്റാന്ഡില് പ്രവേശനം അനുവദിക്കൂ എന്നതാണ് സ്റ്റാന്ഡിലുള്ളവരുടെ നിലപാട്. ഇതിനെതിരെ നെയ്യാറ്റിന്കര പോലീസ് സ്റ്റേഷന്, ആര് ടി ഒ, മനുഷ്യാവകാശ കമ്മീഷന്, മുഖ്യമന്ത്രി എന്നിവര്ക്ക് പരാതി നല്കിയിട്ടും യാതൊരു തീര്പ്പുമുണ്ടായില്ലെന്ന് ശിശുപാലന് പറയുന്നു.
