എം.ഡി. ബാബുരഞ്ജിത്ത്
കരുനാഗപ്പള്ളി: പൊരുതിജയിച്ച മണ്ണില് ജനനായകന് ഉജ്ജ്വലസ്വീകരണം. കയ്യേറ്റത്തിനും കടന്നുകയറ്റത്തിനുമെതിരെ കാല്നൂറ്റാണ്ട് മുമ്പ് സമരം ചെയ്ത് സ്വതന്ത്രമാക്കിയ പുതിയകാവ് ക്ഷേത്രമൈതാനത്ത് ബിജെപി സംസ്ഥാനപ്രസിഡന്റ് കുമ്മനം രാജശേഖരന് ഊഷ്മളവരവേല്പ്. നാട്ടില് ഇന്ന് അരങ്ങേറിക്കൊണ്ടിരിക്കുന്ന അസമത്വത്തിനും പൊരുത്തക്കേടുകള്ക്കുമെതിരെ ജനമനഃസാക്ഷി ഉണര്ത്തുകയാണ് തന്റെ ലക്ഷ്യമെന്ന് കുമ്മനം പറഞ്ഞു. എല്ലാവരുടെയും ആരാധനാലയങ്ങള് സംരക്ഷിക്കപ്പെടണം. അതത് ആരാധനാലയങ്ങളുടെ പരിസരപ്രദേശങ്ങള് എന്തുചെയ്യണമെന്ന് തീരുമാനിക്കാനുള്ള അവകാശം ആ സമുദായത്തിനുണ്ട്. ആരോപണം ഉന്നയിക്കുന്നവര് പറഞ്ഞകാര്യങ്ങള്ക്കുമേല് പുകമറ സൃഷ്ടിച്ച് ജനശ്രദ്ധ തിരിക്കാനാണ് ശ്രമിക്കുന്നതെന്ന് അദ്ദേഹം പറഞ്ഞു.
കലുഷിതവും അസ്വസ്ഥജനകവുമായ അന്തരീക്ഷത്തിലൂടെയാണ് കേരളം കടന്നുപോകുന്നത്. ബലാത്സംഗങ്ങളും അക്രമങ്ങളും ഉള്പ്പെടെ നാടിനെ ഞെട്ടിക്കുന്ന സംഭവങ്ങളാണ് നടക്കുന്നത്. അവകാശങ്ങള് നിഷേധിക്കപ്പെട്ട പൗരസമൂഹത്തിന്റെ പ്രശ്നങ്ങള്ക്ക് പരിഹാരമുണ്ടാകണമെന്നും കുമ്മനം പറഞ്ഞു.
പുതിയകാവ് ക്ഷേത്രത്തിലെത്തിയ കുമ്മനം രാജശേഖരനെ പൂര്ണകുംഭം നല്കിയാണ് ക്ഷേത്രം ഭാരവാഹികള് സ്വീകരിച്ചത്. അദ്ദേഹത്തോടൊപ്പം ബിജെപി ജില്ലാ പ്രസിഡന്റ് എം.സുനില്, സംസ്ഥാനസെക്രട്ടറിമാരായ അഡ്വ.ജെ.ആര്.പത്മകുമാര്, ബി.രാധാമണി, രാജിപ്രസാദ്, ദക്ഷിണമേഖലാ സംഘടനാസെക്രട്ടറി ജി.ഗോപിനാഥ്, ജില്ലാ ജനറല്സെക്രട്ടറി മാലുമേല് സുരേഷ്, ജില്ലാ കമ്മറ്റിയംഗം കെ.എല്. തങ്കമണി തുടങ്ങിയവരും ഉണ്ടായിരുന്നു. ആര്എസ്എസ് ഗ്രാമജില്ലാ സമ്പര്ക്കപ്രമുഖ് എ. വിജയന്, ക്ഷേത്രസംരക്ഷണസമിതി ജില്ലാ ജോയിന്റ് സെക്രട്ടറി പുതിയകാവ് കാര്ത്തികേയന്, ക്ഷേത്രം ഭാരവാഹികളായ രവികുമാര്, പ്രസന്നന്, സുഭദ്ര ടീച്ചര്, കമലമ്മ എന്നിവര് പരിപാടിയില് പങ്കെടുത്തു.
