ആലപ്പുഴ: ജില്ലയിലെ പല പോലീസ് സ്റ്റേഷനുകളിലും ഉദ്യോഗസ്ഥര് ഇടനിലക്കാരായി നിന്ന് വന് സാമ്പത്തിക നേട്ടമുണ്ടാക്കുന്നതായി സ്പെഷ്യല് ബ്രാഞ്ച് റിപ്പോര്ട്ട്. ഇതുസംബന്ധിച്ച് പലതവണ ഉന്നത പോലീസ് ഉദ്യോഗസ്ഥര്ക്ക് റിപ്പോര്ട്ട് നല്കിയെങ്കിലും നടപടി ഉണ്ടാകാത്ത സാഹചര്യത്തില് കേസന്വേഷണങ്ങള് പലതും പാതിവഴിയില് നിലയ്ക്കുകയാണ്. ആലപ്പുഴ നഗരത്തിലേതടക്കം പല പോലീസ് സ്റ്റേഷനുകളിലും സിഐമാരാണ് ഒത്തുതീര്പ്പുകള്ക്ക് നേതൃത്വം നല്കുന്നതെന്നാണ് സ്പെഷ്യല് ബ്രാഞ്ചു റിപ്പോര്ട്ട്.
പ്രമാദമായ കേസുകള്പോലും ഇത്തരത്തില് പോലീസ് സ്റ്റേഷനില്വച്ച് അട്ടിമറിക്കപ്പെടുകയാണ്. സമൂഹത്തില് വളരെ മാന്യത നടിക്കുന്ന ചില സിഐ മാര്ക്കെതിരെയും ആരോപണം ഉയര്ന്നിട്ടുണ്ട്.
ആലപ്പുഴ നഗരത്തിലെ ഒരു സിഐക്കെതിരെയും ആക്ഷേപമുണ്ട്. മൂന്നു മാസം മുമ്പാണ് ഈ ഉദ്യോഗസ്ഥനെതിരെ ഇന്റലിജന്റ്സ് വിഭാഗം റിപ്പോര്ട്ട് നല്കിയത്. പല സ്റ്റേഷനുകളിലും തഴക്കവും പഴക്കവും ചെന്ന ചില ഉദ്യോഗസ്ഥരാണ് കേസുകള്ക്ക് ഇടനിലക്കാരാകാന് തയ്യാറാകുന്നത്. ഒത്തുതീര്പ്പിന്റെ വിഹിതം കൃത്യമായി സ്റ്റേഷന്റെ ചുമതലയുള്ള ഉദ്യോഗസ്ഥനു നല്കുകയും ചെയ്യും. അതിനാല്തന്നെ പരാതികളും ഉണ്ടാകാറില്ല. സ്റ്റേഷന് പരിധിയില് പ്രവര്ത്തിക്കുന്ന റിസോര്ട്ടുകള്, ഹോംസ്റ്റേകള്, ഹൗസ് ബോട്ടുകള്, മറ്റു ചില സ്ഥാപനങ്ങള് എന്നിവിടങ്ങളില് നിന്ന് പ്രതിമാസം കൃത്യമായി പടിയും പിരിച്ചെടുക്കാറുണ്ട്. സത്യസന്ധരായ ഉദ്യോഗസ്ഥരെപോലും വഴിതെറ്റിക്കാന് ദീര്ഘനാള് സര്വ്വീസിലുള്ള പോലീസുകാര്ക്ക് കഴിയുന്നുണ്ട്.
ചില സ്റ്റേഷനുകളിലെത്തുന്ന കേസുകള് പലതും കോടതിയില് എത്താതായതോടെയാണ് ഇതുസംബന്ധിച്ച് അന്വേഷണം നടത്തിയതെന്നറിയുന്നു. പണമിടപാടു സംബന്ധിച്ച് കേസുകളില് ബഹുഭൂരിപക്ഷവും ഇത്തരത്തില് ഒത്തുതീര്പ്പാവുകയാണ്. ഒരേ സ്റ്റേഷനില്ത്തന്നെ നിരവധി വര്ഷങ്ങളായി പ്രവര്ത്തിക്കുന്ന ചില പോലീസുകാരാണ് ഇടനിലക്കാരില് പലരും. പൊതു ജനങ്ങള് ഇതുവരെ പരാതികളുമായി രംഗത്തെത്താത്തതിനാല് ഇക്കൂട്ടരുടെ പ്രവര്ത്തനം നിര്ബാധം തുടരുകയാണ്.
