കണ്ണൂര്: പട്ടയം ലഭിക്കാനുളള ദീര്ഘകാലത്തെ കാത്തിരിപ്പിന് വിരാമമാകുന്നു. ലാന്റ് ട്രിബ്യൂണല് ഓഫീസുകളില് നിരവധി കേസുകള് കെട്ടികിടക്കുന്ന പശ്ചാത്തലത്തില് അവ സമയബന്ധിതമായി തീര്പ്പാക്കാന് വിവിധ സ്പെഷ്യല് തഹസില്ദാര്മാര്ക്ക് അധിക ചുമതല നല്കാന് എഡിഎം ഒ.മുഹമ്മദ് അസ്ലമിന്റെ അധ്യക്ഷതയില് ചേര്ന്ന യോഗം തീരുമാനിച്ചു. കേസുകള് സംബന്ധിച്ച വിവരങ്ങള് അറിയിക്കുവാന് എഡിഎം നിര്ദ്ദേശിച്ചു. കൂത്തുപറമ്പ് ലാന്റ് ട്രിബ്യൂണലിനു കീഴില് 9833 കേസുകളും പയ്യന്നൂരിന് കീഴില് ഐഎ കേസുകളടക്കം 3992 കേസുകളുമാണുളളത്. ഓരോ വര്ഷവും ലഭിച്ച കേസുകളും വര്ഷാടിസ്ഥാനത്തില് വിഭജിച്ച് നല്കും.
കൂത്തുപറമ്പ് ലാന്റ് ട്രിബ്യൂണലിനു കീഴില് 2000 മുതല് 2010 വരെയുളള 2152 കേസുകള് തലശ്ശേരി ആര്ആര് തഹസില്ദാര്, 2011 മുതല് 12 വരെയുളള 2192 കേസുകള് തലശ്ശേരി എല് എഎന്എച്ച് 2 സ്പെഷ്യല് തഹസില്ദാര്, 2013-14 ലെ 2400 കേസുകള് കണ്ണൂര് എല്എഎന് എച്ച് 2 സ്പെഷ്യല് തഹസില്ദാര് എന്നിവര്ക്ക് വിഭജിച്ചു നല്കും. ഇതിനുശേഷമുളള കേസുകള് കൂത്തുപറമ്പ് ലാന്റ് ട്രിബ്യൂണല് തഹസില്ദാര് കൈകാര്യം ചെയ്യും.
പയ്യന്നൂര് ലാന്റ് ട്രിബ്യൂണലിനു കീഴില് പയ്യന്നൂര് മേഖലയിലെ കേസുകള് പയ്യന്നൂര് എല് ടി തഹസില്ദാര് നേരിട്ടും മറ്റുളളവ തുല്യമായി എല്എ (എന്എച്ച്എ1), യൂണിറ്റ് നമ്പര്-11, തളിപ്പറമ്പ് സ്പെഷ്യല് തഹസില്ദാര്ക്കും, എല്എ (എന്എച്ച്എ1), യൂണിറ്റ് നമ്പര്-1 തളിപ്പറമ്പ് സ്പെഷ്യല് തഹസില്ദാര്ക്കും നല്കാനും യോഗത്തില് തീരുമാനമായി.
ഓഫീസ് പ്രവര്ത്തനത്തിനാവശ്യമായ ഫണ്ടും വാഹന സൗകര്യവും അനുവദിക്കും. ജീവനക്കാരുടെ അഭാവം നികത്തും. കേസുകള് മാറ്റിയ വിവരം മാധ്യമങ്ങള് മുഖേന അറിയിക്കും.
