ന്യൂദല്ഹി: റെയില്വേ പുറമ്പോക്കിലെ കയ്യേറ്റം ഒഴിപ്പിച്ച റെയില്വേയുടെ നടപടിക്കെതിരെ ദല്ഹി സര്ക്കാര് രംഗത്തെത്തി. തണുപ്പുകാലത്ത് കയ്യേറ്റങ്ങള് ഒഴിപ്പിക്കരുതെന്നാവശ്യപ്പെട്ടാണ് ദല്ഹി സര്ക്കാര് റെയില്വേയ്ക്കെതിരെ രംഗത്തെത്തിയത്.
എന്നാല് റെയില്വേ പുറമ്പോക്കിലെ ചേരികളില് കുടില്കെട്ടി താമസിക്കുന്നവരുടെ പുനരധിവാസത്തിനായി 11കോടി രൂപ റെയില്വേ ദല്ഹി സര്ക്കാരിന് കീഴിലുള്ള ദല്ഹി സ്ലം അര്ബന് ഇംപ്രൂവ്മെന്റ് ബോര്ഡിന് കൊടുത്തതാണെന്നും നിരവധി തവണ നോട്ടീസ് നല്കിയ ശേഷമാണ് ചേരികള് ഒഴിപ്പിക്കുന്നതെന്നും റെയില്വേ മറുപടി നല്കി. റെയില്വേ പാലീച്ച നടപടിക്രമങ്ങളും സംഭവത്തിന്റെ ഗൗരവവും മുഖ്യമന്ത്രിയെ നേരിട്ട് ധരിപ്പിക്കുമെന്ന് ദല്ഹി ഡിവിഷണല് മാനേജര് അരുണ് അറോറ പറഞ്ഞു.
പടിഞ്ഞാറന് ദല്ഹിയിലെ റെയില്വേ പാളത്തോട് ചേര്ന്ന് നിര്മ്മിച്ച 1200 ചേരികളാണ് പൊളിച്ചു നീക്കാന് കഴിഞ്ഞ ദിവസം റെയില്വേ ശ്രമം ആരംഭിച്ചത്. പോലീസിന്റെയും കേന്ദ്രസേനയുടേയും റെയില്വേ പോലീസിന്റെയും നേതൃത്വത്തിലായിരുന്നു ചേരികള് മാറ്റാനുള്ള ശ്രമം. മൂന്നു തവണ നോട്ടീസ് നല്കുകയും അവസാന കാലാവധി മാര്ച്ചില് അവസാനിക്കുകയും ചെയ്ത ശേഷമായിരുന്നു റെയില്വേയുടെ നടപടി.
ദല്ഹിയില് മാത്രം വിവിധ ഇടങ്ങളിലായി റെയില്വേ പുറമ്പോക്കിലെ ചേരികളില് 47,000 വീടുകളുണ്ടെന്നാണ് കണക്ക്. തണുപ്പുകാലത്ത് റെയില്വേ ഓപ്പറേഷന്സിനെ പാളത്തോടു ചേര്ന്നുള്ള ചേരികള് ഗുരുതരമായി ബാധിക്കുകയാണ്. ഇതിനു പുറമേയാണ് റെയില് പാളങ്ങള് ശുചീകരിക്കണമെന്ന ഹരിതട്രിബ്യൂണലിന്റെ ഉത്തരവ്. റെയില്വേയുടെ ഉടമസ്ഥതയിലുള്ള പ്രദേശത്തെ ഏറ്റവും വലിയ പ്രശ്നം മാലിന്യങ്ങളാണ്. ചേരികളാണ് റെയില്പാളത്തിലും മറ്റും മാലിന്യങ്ങള് കുമിഞ്ഞുകൂടാന് കാരണം. കഴിഞ്ഞ ദിവസം പാളത്തിലെ മാലിന്യത്തിന്റെ പേരില് റെയില്വേയ്ക്ക് കോടതിപിഴയും ഈടാക്കിയിരുന്നു. ഇതിന്റെ അടിസ്ഥാനത്തിലാണ് പാളങ്ങളും റെയില്പുറമ്പോക്കുകളും കയ്യേറ്റങ്ങളില് നിന്നും ഒഴിപ്പിക്കാനുള്ള ശ്രമങ്ങള് ആരംഭിച്ചത്.
അതിനിടെ ശനിയാഴ്ച രാത്രി പടിഞ്ഞാറന് ദല്ഹിയിലെ ചേരി ഒഴിപ്പിക്കുന്നതിനിടെ ആറുമാസം പ്രായമായ കുഞ്ഞ് മരിച്ചത് വിവാദമായി. രക്ഷിതാക്കള് വീട്ടുസാധനങ്ങള് മാറ്റുന്നതിനിടെ പുതപ്പ് കുഞ്ഞിന്റെ മുഖത്തേക്ക് വീണ് ശ്വാസം മുട്ടിയാണ് കുഞ്ഞ് മരിച്ചത്. എന്നാല് ചേരി ഒഴിപ്പിക്കല് നടപടി ആരംഭിക്കുന്നതിന് മുമ്പാണ് കുഞ്ഞ് മരിച്ച സംഭവമെന്നും വീട്ടുകാര് സാധനങ്ങള് മാറ്റുന്നതിനിടെയാണ് കുഞ്ഞിന് അപകടം സംഭവിച്ചതെന്നും റെയില്വേയും പോലീസും അറിയിച്ചു.
