ന്യൂദല്ഹി: ഭീകരവാദത്തിന് മാപ്പുനല്കില്ലെന്ന നിലപാട് ആവര്ത്തിച്ച് കേന്ദ്രസര്ക്കാര്. പാര്ലമെന്റ് ആക്രമിച്ച് തകര്ക്കാനെത്തിയവരെ തടഞ്ഞ് വീരമൃത്യുവരിച്ചവരെ രാജ്യം ഒരിക്കലും മറക്കില്ലെന്ന് കേന്ദ്രആഭ്യന്തരമന്ത്രി രാജ്നാഥ്സിങ് പറഞ്ഞു. പാര്ലമെന്റ് ആക്രമണത്തിന്റെ വാര്ഷികാചരണത്തില് പങ്കെടുത്ത ശേഷം സംസാരിക്കുകയായിരുന്നു രാജ്നാഥ്സിങ്.
ഭീകരവാദത്തിനെതിരെ അതിശക്തമായ നിലപാടാണ് എന്ഡിഎ സര്ക്കാര് സ്വീകരിച്ചിരിക്കുന്നത്. ഭാരതത്തെ കൂടുതല് ശക്തവും സുരക്ഷിതവുമായ രാജ്യമാക്കിത്തീര്ക്കാനാണ് സര്ക്കാരിന്റെ ശ്രമം. പാര്ലമെന്റിന് നേരേ നടന്ന ഭീകരാക്രമണം പരാജയപ്പെടുത്തിയ ആ ധീര ജവാന്മാര്ക്ക് അഭിവാദ്യങ്ങള് അര്പ്പിക്കുന്നു. അവരുടെ ഉന്നതമായ ത്യാഗത്തെ രാജ്യം ഒരിക്കലും മറക്കില്ല, രാജ്നാഥ്സിങ് പറഞ്ഞു.
പാര്ലമെന്റ് അങ്കണത്തിലെ സ്മാരകത്തില് പ്രധാനമന്ത്രി നരേന്ദ്രമോദി അടക്കമുള്ള പ്രമുഖര് പുഷ്പാഞ്ജലി അര്പ്പിച്ചു. ഭീകരാക്രമണത്തില് കൊല്ലപ്പെട്ട സുരക്ഷാ ഉദ്യോഗസ്ഥരുടെ കുടുംബാംഗങ്ങളുമായും പ്രധാനമന്ത്രി കൂടിക്കാഴ്ച നടത്തി.
2001 ഡിസംബര് 13നാണ് അഞ്ച് ആയുധധാരികളായ ഭീകരര് കാറില് പാര്ലമെന്റിനകത്തേക്ക് കുതിച്ചെത്തി വെടിയുതിര്ത്തത്. പാര്ലമെന്റ് മന്ദിരത്തിനുള്ളിലേക്ക് കടക്കാനുള്ള അവരുടെ ശ്രമം സുരക്ഷാ സൈനികര് ചെറുത്തു തോല്പ്പിച്ചു. സുരക്ഷാ ചുമതലയുള്ള 9പേരാണ് ഭീകരരെ തടഞ്ഞു നിര്ത്തുന്നതിനിടെ കൊല്ലപ്പെട്ടത്.
ദല്ഹി പോലീസിലെ അഞ്ചുപേരും സിആര്പിഎഫിലെ വനിതാ ഉദ്യോഗസ്ഥയും പാര്ലമെന്റിലെ രണ്ട് വാച്ച് ആന്റ് വാര്ഡുമാരും ഒരു പൂന്തോട്ട ജോലിക്കാരനുമാണ് ആക്രമണത്തില് കൊല്ലപ്പെട്ടത്. പാര്ലമെന്റ് മന്ദിരത്തില് കയറുന്നതിന് മുമ്പായി തന്നെ ഭീകരരെ എല്ലാം സുരക്ഷാ സൈനികര് കൊലപ്പെടുത്തിയിരുന്നു.
