മെമുവിന് പുന്നപ്രയില്‍ സ്റ്റോപ്പ് അനുവദിക്കണം

ആലപ്പുഴ: റെയില്‍വേക്കു ബാദ്ധ്യതയായി ജനങ്ങള്‍ക്ക് പ്രയോജനമില്ലാത്ത തരത്തില്‍ രാത്രി 7.30ന് എറണാകുളത്തുനിന്നും ആലപ്പുഴ വഴി കൊല്ലം വരെ സര്‍വ്വീസ് നടത്തുന്ന 66309 നമ്പര്‍ മെമുവിനും വെളുപ്പിന് 00.10ന് കൊല്ലത്തുനിന്നും എറണാകുളത്തേക്ക് സര്‍വ്വീസ് നടത്തുന്ന 66310 നമ്പര്‍ മെമുവിനും പുന്നപ്ര അടക്കമുള്ള എല്ലാ റെയില്‍വേ സ്റ്റേഷനുകളിലും സ്റ്റോപ്പ് അനുവദിക്കണമെന്ന് പുന്നപ്ര റെയില്‍വേ പാസഞ്ചേഴ്‌സ് അസോസിയേഷന്‍ ആവശ്യപ്പെട്ടു.

രാത്രി 9.30ന് കായംകുളത്തുനിന്നും ആലപ്പുഴയ്‌ക്കുള്ള 56378 നമ്പര്‍ പാസഞ്ചര്‍ ട്രെയിനിന് പുന്നപ്രയില്‍ നേരത്തെ ഉണ്ടായിരുന്ന സ്റ്റോപ്പ് പുനഃസ്ഥാപിക്കണമെന്നും പുന്നപ്ര റെയില്‍വേ സ്റ്റേഷനും പ്ലാറ്റ്‌ഫോമും ആധുനിക സൗകര്യങ്ങളോടെ നവീകരിക്കണമെന്നും അസോസിയേഷന്‍ ആവശ്യപ്പെട്ടു.

2010 നവമ്പറില്‍ പുന്നപ്ര റെയില്‍വേ സ്റ്റേഷന്‍ സന്ദര്‍ശിച്ച മുന്‍ കേന്ദ്രമന്ത്രി കെ.സി. വേണുഗോപാല്‍ പുന്നപ്ര റെയില്‍വേ സ്റ്റേഷന്‍ വികസനത്തിനായി മുപ്പതുലക്ഷം രൂപ അനുവദിച്ചതായി പ്രഖ്യാപിച്ചെങ്കിലും നടപ്പായില്ലെന്ന് കണ്‍വീനര്‍ ഡി. ഭുവനേശ്വരന്‍ പറഞ്ഞു.