മാവേലിക്കര: ജനപ്രതിനിധികള് അതാത് പ്രദേശങ്ങളില് വികസനത്തിന് ഊന്നല് നല്കി ബിജെപിയുടെ രാഷ്ട്രീയ മുഖങ്ങളായി മാറണമെന്ന് ബിജെപി സംസ്ഥാന ഉപാദ്ധ്യക്ഷന് എം.ടി. രമേശ് പറഞ്ഞു.
ഏഴ് ജില്ലകളിലെ നഗരസഭാംഗങ്ങളുടെ ശിബിരത്തിന്റെ സമാപനത്തില് സംസാരിക്കുകയായിരുന്നു അദ്ദേഹം. ബിജെപിയുടെ വിജയം ജനങ്ങളില് പ്രതീക്ഷ നല്കിയിരിക്കുകയാണ്. ജനങ്ങളുടെ ഈ വിശ്വാസത്തിന് അനുസരിച്ച് പ്രവര്ത്തിക്കാന് അംഗങ്ങള് ഓരോരുത്തരും തയ്യാറാകണം. ഗ്രാമങ്ങളെ അപേക്ഷിച്ച് നഗരങ്ങളില് ബിജെപിയുടെ പ്രവര്ത്തനം ദുര്ബലമായിരുന്നു. എന്നാല് കഴിഞ്ഞ തെരഞ്ഞെടുപ്പോടെ നഗരസഭകളും ബിജെപിയോട് ആഭിമുഖ്യം പുലര്ത്തിയിരിക്കുകയാണ്. ഇവിടെയുള്ള ജനങ്ങള് ബിജെപി ജയിക്കണമെന്നും, ഭരിക്കണമെന്നും ആഗ്രഹിക്കുന്നു.
വരുന്ന നിയമസഭാ തെരഞ്ഞെടുപ്പ് കഴിയുന്നതോടെ കേരളത്തില് ഉണ്ടാകുന്ന രാഷ്ട്രീയ മാറ്റം നിര്ണ്ണായകമായിരിക്കുമെന്നും അദ്ദേഹം കൂട്ടിച്ചേര്ത്തു. ജില്ലാ ജനറല് സെക്രട്ടറി കെ.സോമന് അദ്ധ്യക്ഷത വഹിച്ചു. സംസ്ഥാന സെക്രട്ടറി എ.ജി. ഉണ്ണികൃഷ്ണന്, ജില്ലാ പ്രസിഡന്റ് വെള്ളിയാകുളം പരമേശ്വരന് എന്നിവര് പ്രസംഗിച്ചു. ശിബിരത്തിന്റെ ഉദ്ഘാടനം രാവിലെ സംസ്ഥാന പ്രസിഡന്റ് വി.മുരളീധരന് നിര്വ്വഹിച്ചു. തുടര്ന്ന് നടന്ന ക്ലാസുകള്ക്ക് ഫാക്കല്റ്റി അംഗം ഷാജി ജോര്ജ്ജ്, റിട്ട.ഡെപ്യൂട്ടി ഡയറക്ടര് വി.ജി.രാമചന്ദ്രന് എന്നിവര് നേതൃത്വം നല്കി. വികസനം ലക്ഷ്യമാക്കി ഭരണകാര്യങ്ങള് എങ്ങനെ നിര്വ്വഹിക്കണമെന്നും, ജനങ്ങളോടും, പാര്ട്ടിയോടുമുള്ള ബന്ധം എങ്ങനെ കാത്തുസൂക്ഷിക്കണമെന്നുമായിരുന്നു ക്ലാസുകളിലെ പ്രധാന ചര്ച്ചകള്.
