ചേര്ത്തല: തണ്ണീര്മുക്കം ബണ്ടില് നിന്ന് നീക്കുന്ന ഉപയോഗശൂന്യമായ ഭാഗങ്ങള് റോഡരികില് കൂട്ടിയിടുന്നത് യാത്രക്കാര്ക്ക് ഭീഷണിയാകുന്നു. ബണ്ട് തുടങ്ങുന്ന ഭാഗത്ത് റോഡരികിലും, കെടിഡിസി റിസോര്ട്ടിന്റെ സ്ഥലത്തുമായാണ് തുരുമ്പടിച്ച ഷട്ടറുകളുടെ ഭാഗങ്ങള് അലക്ഷ്യമായി കൂട്ടിയിട്ടിരിക്കുന്നത്. സര്ക്കാരിന്റെ ഉടമസ്ഥതയിലുള്ള ഷട്ടറുകള് ലേലം ചെയ്യുവാനുള്ള ചുമതല ഇറിഗേഷന് വകുപ്പിനാണ്. ബന്ധപ്പെട്ട അധികാരികള് ഇതിനായുള്ള പ്രാരംഭ നടപടികള് പോലും ആരംഭിച്ചിട്ടില്ലെന്നാണ് സൂചന.
ബണ്ടിലെ കാലപ്പഴക്കമേറിയ ഷട്ടറുകള് മാറ്റി പുതിയ സ്റ്റീല് ഷട്ടറുകള് സ്ഥാപിക്കുന്ന ജോലികള് ഒരുമാസം മുന്പാണ് തുടങ്ങിയത്. 52 ഷട്ടറുകളാണ് പുനസ്ഥാപിക്കുന്നത്. 46 കോടി രൂപയാണ് ഇതിനായി വകയിരുത്തിയിട്ടുള്ളത്. ഇതില് പകുതിയോളം ഷട്ടറുകളാണ് ഇപ്പോള് മാറ്റുന്നത്. ബാക്കിയുള്ളവ പിന്നീട് ചെയ്യാനാണ് ധാരണയായിട്ടുളളത്. ഓരുവെള്ള ഭീഷണി തടയുന്നതിനായി മുപ്പതിന് ഷട്ടറുകള് പൂര്ണമായി താഴ്ത്തേണ്ടതുണ്ട്.
സമയബന്ധിതമായി പണിപൂര്ത്തീകരിക്കുന്നതിനായി ബില് നിന്ന് നീക്കം ചെയ്യുന്ന ഷട്ടറിന്റെ ഭാഗങ്ങള് കൂറ്റന് യന്ത്രങ്ങളുടെ സഹായത്തോടെ രാത്രി കാലങ്ങളില് റോഡിലെ ആളൊഴിഞ്ഞ ഭാഗങ്ങളില് കൂട്ടിയിടുകയാണ് കരാറേറ്റെടുത്തിരിക്കുന്നവര് ചെയ്യുന്നത്.
അഞ്ചോളം ഭാഗങ്ങളില് ഇത്തരത്തില് ഷട്ടറുകള് കൂട്ടിയിട്ടിട്ടുണ്ട്. വഴിവിളക്കുകള് ഇല്ലാത്തതിനാല് രാത്രികാലങ്ങളില് ഇരുചക്രവാഹനങ്ങള് അപകടത്തില് പെടുന്നത് പതിവായി.
