കണ്ണൂര്‍: ബംഗളൂരു ബോംബ് സ്‌ഫോടനക്കേസില്‍ പരപ്പന അഗ്രഹാര ജയിലില്‍ കഴിയുന്ന തടിയന്റവിട നസീറിനു വേണ്ടി കണ്ണൂരിലെ സാക്ഷികളെ ഭീഷണിപ്പെടുത്തിയെന്ന് തിരിച്ചറിഞ്ഞ് എന്‍ഐഎ നിര്‍ദ്ദേശ പ്രകാരം കണ്ണൂര്‍ ടൗണ്‍ പോലീസ് കസ്റ്റഡിയിലെടുത്ത കണ്ണൂരിലെ തസ്ലീമിനെ എന്‍ഐഎക്ക് കൈമാറി. കഴിഞ്ഞ ദിവസം കൊച്ചി കോടതിയില്‍ വിചാരണയ്‌ക്ക് കര്‍ണ്ണാടക പോലീസ് ഹാജരാക്കിയ നസീറിന് കത്തുകളും മറ്റും കൈമാറിയതിന് പെരുമ്പാവൂര്‍ അല്ലപ്ര സ്വദേശി ഷഹനാസിനെ കൊച്ചി സിറ്റി പോലീസ് അറസ്റ്റ് ചെയ്തിരുന്നു. ഷഹനാസിനെ ചോദ്യം ചെയ്തപ്പോഴാണ് കേസിലെ സാക്ഷികളെ ഭീഷണിപ്പെടുത്തിയ സംഭവത്തില്‍ തസ്ലീമിന് പങ്കുണ്ടെന്ന് വെളിവായത്. ബംഗളൂരു സ്‌ഫോടനക്കേസില്‍ നസീറിന്റെ കൂട്ടുപ്രതിയായ വ്യക്തിയുടെ സഹോദരനാണ് തസ്ലീം. തസ്ലീമുമായി ചേര്‍ന്നാണത്രെ ഷഹനാസ് സാക്ഷികളെ ഭീഷണിപ്പെടുത്തിയത്. കണ്ണൂര്‍, കോഴിക്കോട്, എറണാകുളം എന്നിവിടങ്ങളില്‍ നടന്ന ബോംബ് സ്‌ഫോടനങ്ങളുമായി ബന്ധപ്പെട്ട് തടിയന്റവിട നസീറിനെ തെളിവെടുപ്പിന് ഈ സ്ഥലങ്ങളില്‍ കൊണ്ടുപോയിരുന്നു. അവിടെ നിന്ന് കസ്റ്റഡിയിലെടുത്ത സാധനങ്ങള്‍ക്ക് മഹസര്‍ സാക്ഷികളായി ഒപ്പിട്ടത് സര്‍ക്കാര്‍ ഉദ്യോഗസ്ഥരായിരുന്നു അവരെയാണ് നസീറിന്റെ നിര്‍ദ്ദേശ പ്രകാരം ഷഹനാസും തസ്ലീമും ഭീഷണിപ്പെടുത്തിയതെന്നാണ് അന്വേഷണ സംഘം കണ്ടെത്തിയിരിക്കുന്നത്.
കണ്ണൂരില്‍ ഔദ്യോഗിക സാക്ഷികളായ മൂന്നുപേരെയാണ് അവരുടെ വീടുകളില്‍ എത്തി ഭീഷണിപ്പെടുത്തിയതത്രേ. കേസിന്റെ വിചാരണവേളയില്‍ മഹസര്‍ സാക്ഷികള്‍ കൂറുമാറിയാല്‍ കേസ് അനുകൂലമായി മാറുമെന്ന ധാരണയിലാണ് ഭീഷണിമുഴക്കിയത്. ഷഹനാസില്‍ നിന്ന് ഇക്കാര്യം അറിഞ്ഞ എന്‍ഐഎ പോലീസ് തസ്ലീമിനെ പിടികൂടാന്‍ കണ്ണൂര്‍ പോലീസിന് നിര്‍ദ്ദേശം നല്‍കുകയായിരുന്നു.
തസ്ലീമിനെ കസ്റ്റഡിയിലെടുക്കുകയും തീവ്രവാദ ബന്ധമുണ്ടെന്ന് കണ്ടെത്തുകയും ചെയ്തതോടെ കണ്ണൂര്‍ വീണ്ടും തീവ്രവാദത്തിന്റെ പേരില്‍ ശ്രദ്ധിക്കപ്പെടുകയാണ്. ഏതാനും വര്‍ഷം മുമ്പ് കാശ്മീര്‍ റിക്രൂട്ട്‌മെന്റ് കേസിലുള്‍പ്പെടെ കണ്ണൂരിലുളളവര്‍ക്കുളള ബന്ധം പുറത്തുവരികയും തീവ്രവാദക്കേസുകളുമായി ബന്ധപ്പെട്ട് നിരവധി യുവാക്കള്‍ ജയിലില്‍ കിടക്കുകയും ചെയ്തിട്ടുണ്ട്.
