കാഞ്ഞിരപ്പള്ളി: ശബരിമല തീര്ത്ഥാടകരുടെ സൗകര്യങ്ങള് വര്ദ്ധിപ്പിക്കുന്നതോടനുബന്ധിച്ച് എരുമേലി കേന്ദ്രമാക്കി വിദ്യാര്ത്ഥി പങ്കാളിത്തത്തോടെ പുത്തന് സാങ്കേതിക വിദ്യകളുപയോഗിച്ച് നടപ്പാക്കാവുന്ന പദ്ധതികള് ജില്ലാ കളക്ടര് യു.വി. ജോസിന്റെ അധ്യക്ഷതയില് കാഞ്ഞിരപ്പള്ളി അമല്ജ്യോതി എന്ജിനീയറിംഗ് കോളേജില് ചേര്ന്ന യോഗം ചര്ച്ച ചെയ്തു.
വിവിധ സംസ്ഥാനങ്ങളില് നിന്നെത്തുന്ന ലക്ഷകണക്കിന് തീര്ത്ഥാടകരില് നിന്ന് അടിസ്ഥാനപരമായ ആവശ്യങ്ങള് മനസ്സിലാക്കുക, തീര്ത്ഥാടകരില് നിന്നും തദ്ദേശവാസികളില് നിന്നും അഭിപ്രായങ്ങള് ശേഖരിച്ച് ഹ്രസ്വ-ദീര്ഘകാല പദ്ധതികള് ആസൂത്രണം ചെയ്യുക, നിര്ദ്ദേശങ്ങള് ക്രോഡീകരിച്ച് ജില്ലാകളക്ടര്ക്ക് റിപ്പോര്ട്ട് നല്കുക തുടങ്ങിയവ അമല്ജ്യോതി എന്ജിനീയറിംഗ് കോളേജിനെ യോഗം ചുമതലപ്പെടുത്തി. ശുചിത്വ അവബോധന ബാനറുകള്, വെയ്സ്റ്റ് ബിന്നുകള്, ശുദ്ധജലവിതരണത്തിനായി സഞ്ചരിക്കുന്ന ശുദ്ധജലസ്റ്റാളുകള് തുടങ്ങിയവയും നിര്ദ്ദേശങ്ങളില് ഉള്പ്പെടുന്നു.
ജില്ലാ കളക്ടര് യു.വി. ജോസിനെ കൂടാതെ ഡപ്യൂട്ടി കളക്ടര് മോഹനന് പിള്ള, ശുചിത്വമിഷന് കോട്ടയം ജില്ലാ കോ-ഓര്ഡിനേറ്റര് പി.എസ്. ഷിനോ, അമല്ജ്യോതി എന്ജിനീയറിംഗ് കോളേജ് മാനേജര് ഫാ. വറുഗീസ് പരിന്തിരിക്കല്, പ്രിന്സിപ്പല് ഡോ. ജോസ് കണ്ണമ്പുഴ, ഇലക്ട്രി സിറ്റി ബോര്ഡ് മുന് ചീഫ് എന്ജിനീയര് പ്രൊഫ. കെ.ജെ. തോമസ്, ഫാ. റൂബിന് തോട്ടുപുറം, സിസ്റ്റര് ക്ലാരമ്മ റോസറി, ഡോ. മിനി മാത്യു, പ്രൊഫ. ജോര്ജ് മോഹന് എന്നിവര് ചര്ച്ചകള്ക്ക് നേതൃത്വം നല്കി.
