ഇന്ത്യന് ഇടതുപക്ഷം അവസാന പ്രതീക്ഷയിലാണ്. അണയാന് പോകുന്ന തീ ആളിക്കത്തിച്ച് രാഷ്ട്രീയ മുതലെടുപ്പ് നടത്താന് കഴിയുമോ എന്നവര് പരീക്ഷിക്കുന്നു. ചില സംസ്ഥാനസര്ക്കാരുകളുടെ പിടിപ്പുകേടുകൊണ്ട് സംഭവിക്കാന് പാടില്ലാത്തത് സംഭവിക്കുമ്പോള് അത് നരേന്ദ്രമോദിയുടെ തലയില് ചാര്ത്താന് ചില ‘കാളപ്പോരാളികള്’ ശ്രമിക്കുന്നു. പാലിന്റെ രുചി നാവിന്തുമ്പിലുള്ളവര് പശുവിനെകൂടി വെട്ടിവിഴുങ്ങണമെന്ന് വാശിപിടിക്കില്ല. കാരണം അത് ചില കുടുംബങ്ങളുടെ അന്നമാണ്.
കഴിഞ്ഞ ലോക്സഭാ തെരഞ്ഞെടുപ്പില് തകര്ന്നടിഞ്ഞ സമാജ്വാദി പാര്ട്ടി ഉത്തര്പ്രദേശില് ഇപ്പോള് ഹൈന്ദവപ്രീണനത്തിലാണ്. അയോധ്യാക്ഷേത്രനിര്മാണത്തെ എതിര്ത്തിരുന്ന അവര് പെട്ടെന്ന് ക്ഷേത്രങ്ങള് പണിയുന്നതുള്പ്പെടെയുള്ള തന്ത്രങ്ങളെടുത്ത് പയറ്റുകയാണ്.
സംഘപരിവാര് ഭൂരിപക്ഷ പ്രീണനം നടത്തിയാണ് ഭാരതത്തില് വിജയിച്ചുനില്ക്കുന്നത് എന്ന അബദ്ധധാരണ ഇടതുപക്ഷവും കോണ്ഗ്രസും ആസൂത്രിതമായി അവരുടെ മാധ്യമങ്ങള് വഴി പ്രചരിപ്പിക്കുന്നു. പക്ഷെ ഹൈന്ദവതയെ പ്രീണിപ്പിക്കാന് ആര്ക്കും സാധ്യമല്ല.
കാരണം ബുദ്ധിമാന്മാരാല് സമ്പന്നമാണ് അതിന്റെ സാംസ്കാരികത. ആയിരക്കണക്കിന് വര്ഷങ്ങളായി പല പ്രലോഭനങ്ങളും കാണുന്നു. എന്നിട്ടും തനിമയോടെ പിടിച്ചുനില്ക്കുന്നത് അതിന്റെ വിശുദ്ധികൊണ്ടാണ്. മതശാസനയുടെ അതിപ്രസരമില്ലാതെ സ്വതന്ത്രമായ ചില ഓര്മ്മപ്പെടുത്തലുകള് മാത്രം നടത്തിക്കൊണ്ട്, കാലത്തിനനുസരിച്ച് കര്മയോഗം സ്വീകരിച്ചുകൊണ്ട് എല്ലാവര്ക്കുമൊപ്പം സഞ്ചരിക്കുന്നു. അത് മനസിലാക്കി അതിന്റെ സാംസ്കാരിക തനിമ ഉള്ക്കൊള്ളുന്നവര് വിജയിക്കുന്നു. അതിനെ പരാജയപ്പെടുത്താന് ശ്രമിക്കുന്നവര് സ്വയം പരാജയപ്പെടുന്നു.
മോഹന്കുമാര്,
പോത്തന്കോട്
