വെള്ളൂര്: ഈ തെരഞ്ഞെടുപ്പ് വെള്ളൂര് ഗ്രാമപഞ്ചായത്ത് നിവാസികള്ക്ക് ഒരു മോചനമാര്ഗമാണ്. കാലങ്ങളായി പഞ്ചായത്ത് ഭരണം നിയന്ത്രിക്കുന്ന മാഫിയാ സംഘത്തില് നിന്നുള്ള മോചനമാര്ഗമാണ് ജനങ്ങള് ആഗ്രഹിക്കുന്നത്. ഇരുപത് വര്ഷത്തിനിടയില് ഒരു വികസന പദ്ധതിപോലും നിര്ദ്ദേശിക്കാന് കഴിയാത്ത പഞ്ചായത്ത് ഭരണസമിതിയാണ് നാളിതുവരെയായി ഉണ്ടായിരുന്നത്. ബജറ്റ് പോലും കൃത്യമായി അവതരിപ്പിക്കാന് പഞ്ചായത്ത് കമ്മറ്റിക്ക് കഴിയാറില്ലെന്നതിന്റെ സാക്ഷ്യപത്രമാണ് 2010-11,2011-12, 2012-13 വര്ഷങ്ങളിലെ ഓഡിറ്റ് റിപ്പോര്ട്ട് പഞ്ചായത്ത് ജനറല് കമ്മറ്റി കൂടുന്നതിന്റെ മിനിറ്റ്സ് പോലും എഴുതി സൂക്ഷിക്കാറില്ലെന്ന് ഓഡിറ്റ് റിപ്പോര്ട്ട് പറയുന്നു. വികസന പ്രവര്ത്തനങ്ങള്ക്കായി ലഭിക്കുന്ന സര്ക്കാര് വിഹിതങ്ങള് ചെലവഴിക്കുന്നതില് ഗുരുതരമായ അലംഭാവംമൂലം ഗ്രാന്റിനത്തില് വന്നഷ്ടമാണ് സംഭവിച്ചിരിക്കുന്നത്.
നാട്ടിലെ മുറുക്കാന്കടകള്ക്ക്പോലും ബാധകമാക്കിയ നികുതി ലൈസന്സ് പരിധിയിലേക്ക് റിസോര്ട്ടിനെ ഉള്പ്പെടുത്താന് ഭരണസമിതി തയ്യാറായിട്ടില്ല എന്നത് പഞ്ചായത്തംഗങ്ങള് മുന്നണിഭേദമില്ലാതെ നടത്തുന്ന അഴിമതിക്ക് ഉദാഹരണമാണ്. കേരളകോണ്ഗ്രസ് മാണി വിഭാഗത്തിന്റെ ഉന്നതനേതാവായ ജനപ്രതിനിധിയുടെ ബിനാമി സ്ഥാപനമാണിതെന്ന ആരോപണവുമുണ്ട്. ഈ സ്വകാര്യ റിസോര്ട്ടിലേക്കുള്ള പഞ്ചായത്തിലേക്ക് സറണ്ടര് ചെയ്യാത്ത വഴിയുടെ നിര്മ്മാണത്തിനായി എംപി ഫണ്ട് വിനിയോഗിച്ചതായുമറിയുന്നു. മൂവാറ്റുപുഴയാറ്റില് നിന്നും മണല്വാരി വില്പ്പന നടത്തിയതിലും വന്ക്രമക്കേടുകള് നടക്കുന്നതായി ഓഡിറ്റ് റിപ്പോര്ട്ടില് പറയുന്നു. ഇത്രയേറെ ക്രമക്കേടുകളും കെടുകാര്യസ്ഥതയുമുള്ള പഞ്ചായത്ത് ഭരണത്തില് ഒരു മെമ്പര്ക്ക് പോലും അഭിപ്രായ വ്യത്യാസമില്ലായിരുന്നു എന്നാണ് ജനങ്ങള് പറയുന്നത്. ഈ കാട്ടുകള്ളന്മാരില് നിന്നും വെള്ളൂരിനെ രക്ഷിക്കാനുള്ള അവസരമാണ് ഈ തെരഞ്ഞെടുപ്പെന്ന് അവര് കരുതുന്നു.
