ചേര്ത്തല: സിനിമാലോകത്തിന്റെ നിഗൂഢതയിലെവിടെയോ പോയ്മറഞ്ഞ വയലാറിന്റെ കചദേവയാനിയെ കാത്തിരിക്കുകയാണ് രാഘവപ്പറമ്പ് കോവിലകം. കവിയായും സിനിമാഗാന രചയിതാവും ഒക്കെയായി മലയാളി മനസ്സില് ചിരപ്രതിഷ്ഠ നേടിയ വയലാര് രാമവര്മ്മ എഴുതിയ ഒരേയൊരു തിരക്കഥയാണ് കചദേവയാനി. ചെമ്മീന് സിനിമയുടെ നിര്മ്മാതാവ് കണ്മണി ബാബുവിന് പുരാണത്തിലെ കചദേവയാനിമാരുടെ കഥ എന്. ശങ്കരന്നായരുടെ സംവിധാനത്തില് സിനിമയാക്കണമെന്ന് ആഗ്രഹം തോന്നി.
പുരാണങ്ങളിലും ഇതിഹാസങ്ങളിലുമൊക്കെ വയലാര് രാമവര്മ്മയ്ക്കുണ്ടായിരുന്ന അഗാധമായ ജ്ഞാനം കണ്ടാവണം, സംവിധായകനും നിര്മ്മാതാവിനും വയലാര് തന്നെ തിരക്കഥ നിര്ബന്ധം പിടിച്ചു. അവരുടെ സ്നേഹവായ്പുകള്ക്കു മുമ്പില് ഒടുവില് കവിയും വഴങ്ങി. പുരാണകഥയെഴുതാന് ഏകാഗ്രമായ അന്തരീക്ഷം വേണ്ടതുകൊണ്ട് അദ്ദേഹം തെരെഞ്ഞെടുത്തത് പീച്ചി ഡാമിനോട് ചേര്ന്നുള്ള സര്ക്കാര് ഗസ്റ്റ് ഹൗസായിരുന്നു.
ഗസ്റ്റ് ഹൗസിലെ ഒരുമാസത്തെ താമസത്തിനിടയില് കചദേവയാനി പൂര്ത്തിയായി. നായകനായി അദ്ദേഹം മനസില് കണ്ടത് കമലാഹാസനെയായിരുന്നു. സംവിധായകനും നിര്മ്മാതാവും ആവശ്യം അംഗീകരിക്കുകയും ചെയ്തു. പക്ഷേ കചദേവയാനി വെള്ളി വെളിച്ചം കണ്ടില്ലെന്ന് മാത്രമല്ല തിരക്കഥ പോലും എവിടെയോ അപ്രത്യക്ഷമായി. അദ്ദേഹത്തിന്റെ മരണശേഷം പലരെയും ബന്ധപ്പെട്ടെങ്കിലും ആര്ക്കും ഉത്തരം നല്കാനായില്ല. ഇടയ്ക്ക് ഭാരതി തമ്പുരാട്ടിക്ക് ലഭിച്ച അജ്ഞാതന്റെ കത്തില് തിരക്കഥ തിരുവനന്തപുരത്തെ ഒരു ബാങ്കില് ഒരു ലോക്കറില് സൂക്ഷിച്ചിട്ടുണ്ടെന്ന് സൂചിപ്പിച്ചിരുന്നു.
അതനുസരിച്ച് ആ വഴിക്കും അന്വേഷണങ്ങള് ഏറെ നടത്തിയെങ്കിലും തിരക്കഥ കണ്ടെത്താനായില്ല.
