കോട്ടയം: നരേന്ദ്രമോദി സര്ക്കാരിന്റെ ചിലവില് ഇടതുമുന്നണിയുടെ ജില്ലാ പഞ്ചായത്ത് പ്രകടന പത്രിക.
എല്ഡിഎഫ് കണ്വീനര് വൈക്കം വിശ്വന് കഴിഞ്ഞ ദിവസം പുറത്തിറക്കിയ പ്രകടന പത്രികയാണ് ഇടതുമുന്നണിയുടെ ഇരട്ടത്താപ്പ് പുറത്താക്കിയത്. പ്രകടന പത്രികയിലെ ചെറുകിട വിയവസായത്തെ സംബന്ധിച്ച ഭാഗത്ത് പറയുന്നത് ചെറുകിട വ്യവസായ യൂണിറ്റുകളുടെ നിലനില്പ്പിനും വളര്ച്ചയ്ക്കും ആവശ്യമായ വായ്പ ദേശീയ സര്ക്കാരിന്റെ മുദ്രാബാങ്കിന്റെ സഹായത്തോടെ ഏറ്റെടുക്കുമെന്നാണ്. പ്രധാനമന്ത്രി മുദ്രാ ബാങ്ക് പ്രഖ്യാപിച്ചതുമുതല് സിപിഎം നേതാക്കളും ദേശാഭിമാനിയും ഇതിനെതിരായ നിരന്തരപ്രചാരണത്തിലായിരുന്നു. മുദ്രാബാങ്ക് തട്ടിപ്പാണെന്ന ആരോപണം തൊണ്ടതൊടാതെ വിഴുങ്ങിയിട്ടാണ് ജില്ലാ പഞ്ചായത്ത് തെരഞ്ഞെടുപ്പ് പ്രകടന പത്രികയില് ഈ ബാങ്ക് പ്രയോജനപ്പെടുത്തി പദ്ധതികള് ആവിഷ്ക്കരിക്കുമെന്ന് പറയുന്നത്.
തൊഴില് രഹിതരായ ചെറുപ്പക്കാര്ക്കായുള്ള കേന്ദ്രത്തിന്റെ ശേഷി വികസനപദ്ധതിയും തങ്ങളുടേതായി അവതരിപ്പിക്കുവാന് പ്രകടന പത്രികയിലൂടെ ഇടതുമുന്നണി ശ്രമിക്കുന്നു. നരേന്ദ്രമോദി സര്ക്കാരിന്റെ സ്കില് ഡവലപ്പ്മെന്റ് പദ്ധതിയും പേരുമാറ്റി അവതരിപ്പിച്ചിരിക്കുന്ന പ്രകടന പത്രിക ഏറെ പരിഹാസ്യമാണെന്ന് രാഷ്ട്രീയ നിരീക്ഷകര് പറയുന്നു. ആഗോളതാപനം കുറയ്ക്കുന്നതിനുള്ള പദ്ധതികളും സ്വച്ഛഭാരത പദ്ധതിയും ഇടതുമുന്നണിയുടേതാക്കി അവതരിപ്പിക്കുവാന് പ്രകടന പത്രിക ശ്രമിക്കുന്നു. പ്രധാനമന്ത്രി നരേന്ദ്രമോദി ഡിജിറ്റല് ഇന്ത്യ പദ്ധതി പ്രഖ്യാപിച്ചപ്പോള് പരിഹസിച്ച സിപിഎം നേതൃത്വം നല്കുന്ന ഇടതുമുന്നണിയുടെ പ്രകടന പത്രികയില് ഐടി,വൈ-ഫൈ, ഓണ്ലൈന് സംവിധാനത്തിനുമെല്ലാം പ്രാധാന്യം ന്ലകിയിരിക്കുന്നു. നാളികേര കര്ഷകരെ സഹായിക്കുന്നതിനായി 20 അംഗങ്ങളുള്ള കേരസംഘങ്ങള് രജിസ്റ്റര് ചെയ്ത് ഈ സംഘങ്ങള് വഴി ധനസഹായങ്ങള് എത്തിച്ചുകൊടുക്കുന്ന പദ്ധതി കേന്ദ്രസര്ക്കാര് നടപ്പിലാക്കിയതാണ്. പ്രകടപത്രികയില് കേരസംഘം എന്നത് പേരുമാറ്റി നാളികേര ട്രസ്റ്റ് എന്നാക്കി അവതരിപ്പിച്ചിരിക്കുന്നു. പ്രകടന പത്രികയിലെ ഏറ്രഴും വിചിത്രമായ നിര്ദ്ദേശം ഓരുവെള്ളം കയറി കൃഷി നശിക്കുന്നത് തടയുന്നതിന് തണ്ണീര്മുക്കം ബണ്ട് പുതുക്കിപ്പണിയുമെന്നതാണ്. കേന്ദ്രസര്ക്കാര് ധനസഹായത്താല് കഴിഞ്ഞ 2 വര്ഷം മുമ്പ് ആരംഭിച്ചതാണ് തണ്ണീര്മുക്കം ബണ്ട് പുതുക്കിപ്പണിയല്. 250 കോടി രൂപ ചിലവ് പ്രതീക്ഷിക്കുന്ന ബണ്ടിന്റെ പുനര്നിര്മ്മാണ പ്രവര്ത്തനങ്ങള് അവസാനഘട്ടത്തിലാണ്. കൊല്ലം കൊടുങ്ങല്ലൂര് ദേശീയജലപാതയ്ക്കായുള്ള ബോട്ട്വേ ഉള്പ്പെടെയുള്ള പ്ലാന് അനുസരിച്ചാണ് ഇവിടെ നിര്മ്മാണ ജോലികള് പുരോഗമിച്ചുകൊണ്ടിരിക്കുന്നത്.
കോട്ടയം ജില്ലയുടെ അടിസ്ഥാന പ്രശ്നങ്ങള്ക്ക് പരിഹാരം നിര്ദ്ദേശിക്കാന് കഴിയാത്ത പ്രകടന പത്രികയാണ് പുറത്തിറക്കിയിരിക്കുന്നത്. എടുത്ത്പറയത്തക്ക ഒരു പദ്ധതിയും മുന്നോട്ട് വയ്ക്കാന് ജില്ലയിലെ എല്ഡിഎഫ് നേതൃത്വത്തിന് കഴിഞ്ഞിട്ടില്ല.
