കലവൂര്: വിവിധ സര്ക്കാര് ആശുപത്രികളുടെ ശോച്യാവസ്ഥ പരിഹരിക്കണമെന്ന് ആവശ്യപ്പെട്ട് ബിഎംഎസ് മാരാരിക്കുളം തെക്ക് പഞ്ചായത്ത് കമ്മറ്റിയുടെ നേതൃത്വത്തില് 24 മണിക്കൂര് ഉപവാസ സമരത്തിന് തുടക്കമായി. കാട്ടുര് നെടിയാംപുരയ്ക്കല് ജോണ്സന്റെ മകന് ഏഴുവയസ്സുകാരന് നിഖില് വിദഗ്ധ ചികിത്സ കിട്ടാതെ കഴിഞ്ഞ ദിവസം മരിച്ചിരുന്നു. ഈ പശ്ചാത്തലത്തിലായിരുന്നു ബിഎംഎസ് സമരം. ജില്ലാ സെക്രട്ടറി സി. ജി. ഗോപകുമാര് ഉദ്ഘാടനം ചെയ്തു. ജില്ലാ ജോയിന്റ് സെക്രട്ടറി ബിനീഷ് ബോയി. ആലപ്പുഴ മേഖലാ സെക്രട്ടറി അനിയന് സ്വാമിച്ചിറ തുടങ്ങിയവര് സംസാരിച്ചു. മേഖലാ വൈസ്പ്രസിഡന്റ് വി. വി. ലാലപ്പന് അദ്ധ്യക്ഷത വഹിച്ചു.
മെഡിക്കല് കോളേജ് ആശുപത്രിയിലെയും, മറ്റു സര്ക്കാര് ആശുപത്രികളിലെയും ഡോക്ടര്മാരുടെയും നഴ്സുമാരുടെയും ഒഴിവുകള് അടിയന്തരമായി നികത്തുക, മെഡിക്കല് കോളേജ് ആശുപത്രിയിലെ സ്കാനിങ് മെഷീന് പതിവായി തകരാറാകുന്നതിന്റെ കാരണം കണ്ടെത്തി കുറ്റക്കാര്ക്കെതിരെ നടപടിയെടുക്കുക, അത്യാഹിതവിഭാഗം 24 മണിക്കൂറും പ്രവര്ത്തിക്കുക, ചെട്ടികാട് ആശുപത്രിയുടെ നിലവാരം മെച്ചപ്പെടുത്തുക, കുട്ടികളുടെ ഒപി 24 മണിക്കൂറും പ്രവര്ത്തിക്കുക, ചെട്ടികാട് ആശുപത്രിയില് ആധുനിക സൗകര്യങ്ങളുള്ള ആംബുലന്സ് സൗകര്യം ഏര്പ്പെടുത്തുക തുടങ്ങിയ ആവശ്യങ്ങളാണ് സമരക്കാര് ഉന്നയിച്ചത്.
ഇന്ന് ചേരുന്ന സമാപന സമ്മേളനം സംസ്ഥാന വൈസ്പ്രസിഡന്റ് അഡ്വ. എം. പി. ഭാര്ഗവന് ഉദ്ഘാടനം ചെയ്യും. അഡ്വ. വി. എസ്. രാജേഷ് അദ്ധ്യക്ഷത വഹിക്കും. ആര്എസ്എസ് താലൂക്ക് സേവാ പ്രമുഖ് ഓമനക്കുട്ടന്, എന്. വേണുഗോപാല് എന്നിവര് സംസാരിക്കും. സാലി വേലായുധന്, അഭിലാഷ് ബേര്ളി തുടങ്ങിയവരാണ് ഉപവാസ സമരം നടത്തുന്നത്.
