തലശ്ശേരി: കേരളത്തില്‍ കമ്മ്യൂണിസ്റ്റ് പാര്‍ട്ടി തകര്‍ന്നു കഴിഞ്ഞുവെന്നും ആ പാര്‍ട്ടിയുടെ ശവപ്പെട്ടിക്ക് അവസാനത്തെ ആണിയടിക്കാന്‍ സമയമായിക്കഴിഞ്ഞുവെന്നും ബിജെപി സംസ്ഥാന സെല്‍ കണ്‍വീനര്‍ അഡ്വ.ബി.ഗോപാലകൃഷ്ണന്‍ അഭിപ്രായപ്പെട്ടു.
ഹിന്ദു ഐക്യവേദിയുടെ ആഭിമുഖ്യത്തില്‍ നടക്കുന്ന പദയാത്രയുടെ ഉദ്ഘാടനം മാടപ്പീടികയില്‍ നിര്‍വഹിച്ച് സംസാരിക്കുകയായിരുന്നു അദ്ദേഹം. ഇന്ത്യന്‍ പ്രധാനമന്ത്രി നരേന്ദ്രമോദി ലോക രാജ്യങ്ങള്‍ മുഴുവന്‍ നിറഞ്ഞു നില്‍ക്കുന്നതില്‍ വിറളിപൂണ്ട് സിപിഎമ്മും കോണ്‍ഗ്രസ്സും വ്യാജ പ്രചരണങ്ങള്‍ നടത്തിവരികയാണെന്നും എന്‍ഡിഎ സര്‍ക്കാര്‍ നടപ്പിലാക്കുന്ന വിവിധ ക്ഷേമ പദ്ധതികള്‍ ജനഹൃദയങ്ങളില്‍ സ്ഥാനം പിടിച്ചുകഴിഞ്ഞുവെന്നും അദ്ദേഹം അഭിപ്രായപ്പെട്ടു. മുദ്ര ബാങ്ക്, വിദ്യാഭ്യാസ ബാങ്ക് വായ്പാ പദ്ധതി എന്നിവ കേരളത്തിലെ ലക്ഷക്കണക്കിന് യുവാക്കള്‍ക്ക് ഗുണം ചെയ്യുന്നതാണെന്നും അദ്ദേഹം കൂട്ടിച്ചേര്‍ത്തു. ചടങ്ങില്‍ ആര്‍എസ്എസ് വിഭാഗ് കാര്യവാഹ് വി.ശശിധരന്‍, അഡ്വ.ജയപ്രകാശ്, കെ.ലിജേഷ്, രഞ്ചിത്ത് തുടങ്ങിയവര്‍ സംസാരിച്ചു. ജാഥ ഇന്ന് രാവിലെ ശ്രീറാം പുന്നോലില്‍ നിന്നാരംഭിച്ച് വൈകുന്നേരം തലശ്ശേരിയില്‍ സമാപിക്കും. സമാപന സമ്മേളനത്തില്‍ ഹിന്ദു ഐക്യവേദി സംസ്ഥാന ജനറല്‍ സെക്രട്ടറി കുമ്മനം രാജശേഖരന്‍ സംസാരിക്കും.
പ്രതികരിക്കാൻ ഇവിടെ എഴുതുക: