കൊച്ചി: ദര്ബാര് ഗ്രൗണ്ടിലെ ലൈറ്റുകള് അണച്ച് ശ്രീകൃഷ്ണജയന്തി ശോഭായാത്രക്കെതിരെ ജില്ലാ ടൂറിസം പ്രമോഷന് കൗണ്സിലിന്റെ അവഹേളനം. സംഭവത്തില് പ്രതിഷേധിച്ച് ബാലഗോകുലം പ്രവര്ത്തകര് ജില്ലാ കളക്ടറുടെ ക്യാമ്പ്ഓഫീസിലേക്ക് മാര്ച്ചും ധര്ണയും നടത്തി.
വര്ഷങ്ങളായി കൊച്ചി മഹാനഗരത്തിലെ ശോഭായാത്രകള് സംഗമിക്കുന്നത് ദര്ബാര്ഹാള് ഗ്രൗണ്ടിലാണ്. എന്നാല് പതിനായിരക്കണക്കിന് ആളുകള് പങ്കെടുത്ത ശോഭായാത്ര ദര്ബാര്ഹാള് ഗ്രൗണ്ടില് എത്തിയപ്പോള് ഗ്രൗണ്ടിലെ മുഴുവന് ലൈറ്റുകളും അണച്ചിരിക്കുകയായിരുന്നു. നൂറുകണക്കിന് കൊച്ചുകുട്ടികള് പങ്കെടുത്ത ശോഭായാത്ര ദര്ബാര്ഹാള് ഗ്രൗണ്ടില് ഇരുട്ടില് തപ്പിത്തടഞ്ഞാണ് പ്രവേശിച്ചത്.
ജില്ലാ ടൂറിസം പ്രമോഷന് കൗണ്സിലിന്റെ അധീനതയിലാണ് ദര്ബാര് ഹാള് ഗ്രൗണ്ട്. ജില്ലാ കളക്ടറാണ് ഡിടിപിസിയുടെ ചെയര്മാന്. ലൈറ്റ് അണച്ച് ശോഭായാത്രയെ അവഹേളിച്ചതില് പ്രതിഷേധിച്ച് ബാലഗോകുലം പ്രവര്ത്തകര് ക്യാമ്പ്ഓഫീസിന് മുന്നിലേക്ക് മാര്ച്ച് നടത്തി.
തുടര്ന്ന് നടന്ന ധര്ണയില് ബാലഗോകുലം ഭാരവാഹികളായ മേലേത്ത് രാധാകൃഷ്ണന്, വി. സതീഷ്കുമാര്, വിഎച്ച്പി സംസ്ഥാന പ്രസിഡന്റ് എസ്.ജെ.ആര്. കുമാര്, കൗണ്സിലര് സുധാദിലീപ്, കെ.പി. ഹരിഹരകുമാര്, പി.വി. അതികായന്, സി.ജി. രാജഗോപാല് എന്നിവര് സംസാരിച്ചു. ഡിടിപിസിയുടെ നടപടിക്കെതിരെ ബാലാവകാശ കമ്മീഷനും മനുഷ്യാവകാശ കമ്മീഷനും പരാതി നല്കുമെന്ന് നേതാക്കള് പറഞ്ഞു.
