733. ധനദാ – ധനം തരുന്നവൾ. ധനം എന്ന പദത്തിന് ‘സന്തോഷിപ്പിക്കുന്നത്’ എന്നും ‘ഫലം ഉണ്ടാക്കുന്നത്’എന്നും ആചാര്യന്മാർ അർത്ഥം പറയുന്നു. സന്തോഷിപ്പിക്കുന്നതും നല്ല ഫലം തരുന്നതുമായ എല്ലാം ധനമാണ്. വിദ്യാധനം, യശോധനം, തപോധനം തുടങ്ങിയ പ്രയോഗങ്ങൾ നോക്കുക. ആരോഗ്യവും കുടുംബവും സ്നേഹിതരും ഭൂമിയും ഗൃഹവും വളർത്തുമൃഗങ്ങളും എല്ലാം ധനത്തിന്റെ രൂപങ്ങളാണ്. ഏതു ധനമാണ് ആഗ്രഹിക്കുന്നതെങ്കിലും സുരഭിയോട് അഭ്യർത്ഥിച്ചാൽ അതു ലഭിക്കും. സുരഭിയെ സമീപിക്കാനുള്ള യോഗ്യത അർത്ഥിക്കുണ്ടായാൽ ഏതു ധനവും ഉടനടി ലഭിക്കും.
734. ഭദ്രാ – മംഗളം രൂപമായവൾ. ആശ്രയിക്കുന്നവർക്ക് സുഖവും തൃപ്തിയും ഐശ്വര്യവും കൊടുക്കുന്നവൾ.
ഭദ്രാ എന്ന പദത്തിന് ‘തുളസി’ എന്നും അർത്ഥം. ഈ സ്തോത്രത്തിൽ മൂകാംബികാദേവിയെ തുളസിയുടെ രൂപത്തിൽ മുമ്പു സ്തുതിച്ചിരുന്നു.
735. കല്പവൃക്ഷസ്വരൂപിണി – കല്പവൃക്ഷത്തിന്റെ സ്വരൂപം സ്വീകരിച്ചവൾ. സ്വർഗത്തിലുള്ള അഞ്ചു വൃക്ഷങ്ങളെ പൊതുവെ കുറിക്കുന്ന പദമാണ് കല്പവൃക്ഷം. മന്ദാരം, പാരിജാതം, കല്പവൃക്ഷം, സന്താനം, ഹരിചന്ദനം എന്നിവയാണ് കല്പവൃക്ഷങ്ങൾ. കാമധേനുവിനെപ്പോലെ കല്പവൃക്ഷങ്ങളും അർത്ഥികൾക്ക് അവർ ആഗ്രഹിക്കുന്നതെല്ലാം കൊടുക്കുന്ന സ്വഭാവമുള്ളവയാണ്. ലോകത്തിന്റെ നേർക്കുള്ള മാതൃവാത്സല്യംകൊണ്ടാണ് ദേവി കാമധേനുവായും കല്പവൃക്ഷമായും സ്വരൂപം സ്വീകരിക്കുന്നത് കാമധേനു തന്നെയാണു കല്പവൃക്ഷം എന്നാണു സ്തോത്രം സ്ഥാപിക്കുന്നത്.
