കാവാലം: ജല മലിനീകരണം ഉയര്‍ത്തുന്ന ഭീഷണിയില്‍ നിന്ന് കുട്ടനാടിനെ രക്ഷിക്കാന്‍ യുവതീ-യുവാക്കള്‍ രംഗത്തിറങ്ങണമെന്ന് കാവാലം സൂര്യ യുവജനക്ഷേമ കേന്ദ്രത്തിന്റെ 20-ാം വാര്‍ഷികത്തോടനുബന്ധിച്ച് സംഘടിപ്പിച്ച വികസന സെമിനാര്‍ ആഹ്വാനം ചെയ്തു.
ജലസ്രോതസുകളുടെ മലിനീകരണം കുട്ടനാടിനെ രോഗാവസ്ഥയിലേക്ക് എത്തിക്കുകയാണ്. വിവിധ പഞ്ചായത്തുകളില്‍ അര്‍ബുദരോഗം പടരുന്നതിന് കാരണമിതാണ്. വികസനത്തിനൊപ്പം ജലവും പ്രകൃതി വിഭവങ്ങളും സംരക്ഷിക്കാന്‍ യുവാക്കള്‍ മുന്നിട്ടിറങ്ങിയുള്ള ബോധവല്‍ക്കരണമാണ് ആവശ്യം. ജൈവകൃഷിയെ പ്രോത്സാഹിപ്പിക്കാനുള്ള പരിശ്രമവും കുട്ടനാടിന്റെ നിലനില്‍പിന് ആവശ്യമാണെന്ന് പ്രതിഭാഹരി പറഞ്ഞു. കുട്ടനാടിന്റെയാകെ ഗതാഗതവികസനത്തിന് വഴിയൊരുക്കുന്ന കാവാലം തട്ടാശേരി പാലം നിര്‍മിക്കാന്‍ സര്‍ക്കാര്‍ തയാറകണമെന്ന് സെമിനാറില്‍ ഐകകണ്ഠമായി അഭിപ്രായമുയര്‍ന്നു.
മറ്റ് അപ്രധാനമായ പാലങ്ങള്‍ക്ക്‌പോലും സര്‍ക്കാര്‍ അനുമതിയായിട്ടും കാവാലം പാലത്തെ അവഗണിക്കുകയാണെന്ന് പ്രതിഷേധമുയര്‍ന്നു. കുട്ടനാട് കുടിവെള്ള പദ്ധതി വേഗത്തില്‍ നടപ്പാക്കുക, നെല്‍പ്പാടങ്ങളിലെ വിഷപ്രയോഗം നിയന്ത്രിക്കുക തുടങ്ങിയ ആവശ്യങ്ങളും സെമിനാര്‍ മുന്നോട്ടുവച്ചു. ജില്ലാ പഞ്ചായത്ത് പ്രസിഡന്റ് യു. പ്രതിഭാഹരി ഉദാഘാടനം ചെയ്തു. കാവാലം പഞ്ചായത്ത് പ്രസിഡന്റ് എം.ജെ ഓമനക്കുട്ടന്‍ അധ്യക്ഷത വഹിച്ചു.
കാവാലം സൂര്യയുടെ വെബ് സൈറ്റ് ഉദ്ഘാടനവും അമ്മമാര്‍ക്കുള്ള ഓണക്കിറ്റ് വിതരണവും വെളിയനാട് ബ്ലോക്ക് പഞ്ചായത്ത് പ്രസിഡന്റ് പി.സി മോനിച്ചന്‍ നിര്‍വഹിച്ചു. മിനി ലൈബ്രറിക്കുള്ള പുസ്തകങ്ങള്‍ കാവാലം പഞ്ചായത്ത് പ്രസിഡന്റ് എം.ജെ ഓമനക്കുട്ടന്‍ കൈമാറി. കെഎസ്ആര്‍ടിസി ഡയറക്ടര്‍ ബോര്‍ഡംഗം സണ്ണി തോമസ് മുഖ്യാതിഥിയായിരുന്നു. കാവാലം ഗോപകുമാര്‍ മോഡറേറ്ററായിരുന്നു. കാവാലം സൂര്യ സെക്രട്ടറി ജി. ഹരികൃഷ്ണന്‍ സ്വാഗതവും ജോയിന്റ് സെക്രട്ടറി പി.ആര്‍. വിഷ്ണുകുമാര്‍ കൃതജ്ഞതയും പറഞ്ഞു.
