തുറവൂര്‍: തീരദേശ മേഖലയില്‍ ദേശസാത്കൃത ബാങ്കുകള്‍ക്ക് ശാഖകളില്ലാത്തത് പ്രദേശവാസികള്‍ക്ക് ദുരിതമാകുന്നു.പട്ടണക്കാട്,തുറവൂര്‍,കൂത്തിയതോട് പഞ്ചായത്തുകളുടെ തീര മേഖലയായ ആറാട്ടുവഴി,അന്ധകാരനഴി, പള്ളിത്തോട്, ചെല്ലാനം തുടങ്ങിയ സ്ഥലങ്ങളിലുള്ളവര്‍ക്ക് ദേശസാല്‍കൃത ബാങ്കുകള്‍ വഴി മാത്രം നടത്താന്‍ കഴിയുന്ന ഇടപാടുകള്‍ നടത്തണമെങ്കില്‍ കിലോമീറ്ററുകള്‍ സഞ്ചരിച്ച് പൊന്നാംവെളി,തുറവൂര്‍, കുത്തിയതോട് എന്നിവിടങ്ങളിലെത്തണം. ക്ഷേമ പെന്‍ഷനുകളും മറ്റ് സര്‍ക്കാര്‍ ആനുകുല്യങ്ങളും ബാങ്ക് അക്കൗണ്ട് വഴിയാക്കിയതോടെ തീരദേശത്തുള്ള കടലിനെമാത്രം ആശ്രയിച്ച് കഴിയുന്ന മത്സ്യത്തൊഴിലാളികള്‍ അടക്കമുള്ളവര്‍ ഇടപാടുകള്‍ നടത്താനാവതെ പ്രതിസന്ധിയിലാണ്.
വര്‍ഷങ്ങള്‍ മുമ്പ് അന്ധകാരനഴിയില്‍ സ്റ്റേറ്റ് ബാങ്ക് ഓഫ് ട്രവന്‍കൂറിന്റെ ശാഖ പ്രവര്‍ത്തിച്ചിരുന്നു. പല കാരണങ്ങളാല്‍ ഈ ശാഖ ഇവിടെ നിന്ന് മാറ്റിയിരുന്നു. വിശേഷാവസരങ്ങളില്‍ തീരദേശവാസികള്‍ക്ക് ബാങ്കിങ് ഇടപാടുകള്‍ നടത്താന്‍ ദിവസങ്ങള്‍ തന്നെ നഷ്ടപ്പെടുന്ന സ്ഥിതിയാണ്. തീരമേഖല കേന്ദ്രീകരിച്ച് ഏതെങ്കിലുമൊരു ദേശസാല്‍കൃത ബാങ്കിന്റെ ശാഖ തുറക്കാന്‍ നടപടി സ്വീകരിക്കണമെന്നാണ് നാട്ടുകാരുടെ ആവശ്യം.
