ആലപ്പുഴ: ഹൃദയത്തിന് അസുഖം ബാധിച്ച ഒന്പത് ദിവസം മാത്രം പ്രായമുള്ള കുഞ്ഞിനെ മുഖ്യമന്ത്രിയുടെ നിര്ദ്ദേശ പ്രകാരം പോലീസ് സഹായത്തോടെ വണ്ടാനം മെഡിക്കല് കോളേജ് ആശുപത്രിയില് നിന്നും തിരുവനന്തപുരം എസ്എടി ആശുപത്രിയില് 1298 ആംബുലന്സില് എത്തിച്ചത് വെറും രണ്ടു മണിക്കൂറും ആറു മിനിറ്റ് കൊണ്ട്.
ഹരിപ്പാട് പീടികയില് കലേഷ്-ശരണ്യ ദമ്പതികള്ക്ക് കഴിഞ്ഞ 17നാണ് ഹരിപ്പാട് ജനറല് ആശുപത്രിയില് വെച്ച് ഒരു പെണ്കുഞ്ഞ് പിറന്നത്.
എന്നല് കുഞ്ഞിന്റെ ശരീരത്തിന് നിറ വ്യത്യാസം കണ്ടതിനെ തുടര്ന്ന് ഇന്നലെ രാവിലെ വണ്ടാനം മെഡിക്കല് കോളേജ് ആശുപത്രിയിലേയ്ക്ക് മാറ്റി. വിശദമായ പരിശോധനയില് കുഞ്ഞിന്റെ ഹൃദയ ധമനികള്ക്കും രണ്ട് ഹൃദയ വാല്വുകള്ക്കും തകലാറുള്ളതായി കണ്ടെത്തി. എത്രയും പെട്ടെന്ന് കുഞ്ഞിനെ തിരുവനന്തപുരം എസ്എടിയില് എത്തിക്കാന് ഡോക്ടര്മാര് നിര്ദ്ദേശിച്ചു.
എന്നാല് ഇതിനുള്ള സാഹചര്യങ്ങള് ഒരുക്കാനോ തുടര് ചികിത്സ നടത്താനോ നിര്വ്വാഹമില്ലാത്തതിനാല് ബന്ധുക്കള് മുഖ്യമന്ത്രിയെ വിവരം ധരിപ്പിക്കുകയായിരുന്നു. ഉടന്തന്നെ മുഖ്യമന്ത്രിയുടെ ഓഫീസില് നിന്നും കുഞ്ഞിനെ എസ്എടിയില് എത്തിക്കാനുള്ള സൗകര്യമൊരുക്കാന് പോലീസ് മേധാവി സുരേഷ്കുമാറിനെ നിര്ദ്ദേശമെത്തി. കുഞ്ഞുമായി പോകുന്ന ആംബുലന്സ് ട്രാഫിക്ക് കുരുക്കില്പെടാതെ വഴി ഒരുക്കാന് വേണ്ട നടപടികള് ഉണ്ടായി.
ആംബുലന്സ് കടന്നുപോകുന്ന കൊല്ലത്തും തിരുവനന്തപുരത്തും ഇത്തരത്തില് പോലീസ് വഴിയൊരുക്കിയിരുന്നു. ആംബുലന്സിലെ ഡ്രൈവര് അജിത്ത്, എമര്ജന്സി ടെക്നീഷ്യന് രാഹുല് എന്നിവരുടെ മനോധൈര്യവും മുഖ്യമന്ത്രിയുടെയും പോലീസിന്റെയും അവസരോചിതമായ ഇടപെടലും കൊണ്ടാണ് ഇത്രയും വേഗം കുഞ്ഞിനെ എസ്എടി ആശുപത്രിയില് എത്തിക്കാന് കഴിഞ്ഞത്.
