ചെങ്ങന്നൂര്: പാണ്ടനാട് ഗ്രാമം ഒന്നാകെയെത്തി, നെടുമ്പറമ്പ് കുടുബാംഗങ്ങളെ യാത്രയാക്കാന്. ഒരു കുടുംബത്തെ ഒന്നാകെ വിധി കവര്ന്നെടുത്ത നടുക്കത്തില് നിന്ന് ഗ്രാമവാസികള് ഇപ്പോഴും മുക്തരായിട്ടില്ല. ഇതിന്റെ തെളിവായിരുന്നു ഇന്നലെ പാണ്ടനാട്ട് നെടുമ്പറമ്പ് വീട്ടിലെത്തിയ ജനസഞ്ചയം.
20നാണ് ചേര്ത്തല മായിത്തറയിലായിരുന്നു അപകടം. പാണ്ടനാട് കീഴ്വന്മഴി നെടുമ്പറമ്പില് അനീഷ് എബ്രഹാം(32), ഭാര്യ വാഴയില് വീട്ടില് ബിബിനി (26), അച്ഛന് എന്.എ. എബ്രഹാം (കുഞ്ഞുമോന്-66), കാര് ഓടിച്ചിരുന്ന പാണ്ടനാട് പനച്ചിമൂട്ടില് തുണ്ടില് പി.സി. ഏബ്രഹാം (മനു-39) എന്നിവരാണ് മരണപ്പെട്ടത്. അനീഷ്, ബിബിനി, ഏബ്രഹാം എന്നിവരുടെ സംസ്ക്കാരമാണ് ഇന്നലെ നടന്നത്. മനുവിന്റെ സംസ്ക്കാരം ഇന്ന് നടക്കും. രാവിലെ എട്ടിന് വീട്ടില് പൊതുദര്ശനത്തിന് വയ്ക്കുകയും, ഉച്ചയ്ക്ക് രണ്ടിന് പാണ്ടനാട് സെന്റ് തെരാസസ് മലങ്കര കത്തോലിക്കപ്പള്ളി സെമിത്തേരിയില് സംസ്ക്കാരവും നടക്കും.
ഇതോടെ ഈ നെടുമ്പറമ്പില് കുടുംബംതന്നെ ഇല്ലാതാവുകയായിരുന്നു. ഒന്നര വര്ഷം മുന്പ് അനീഷിന്റെ അമ്മ ആലീസ് മരിച്ചിരുന്നു. വിദേശത്ത് ജോലിചെയ്തിരുന്ന അനീഷ് ഒണത്തിന് നാട്ടിലേക്ക് മടങ്ങി വരുംവഴിയാണ് അപകടം സംഭവിച്ചത്. നെടുമ്പാശ്ശേരിയില് നിന്ന് അനീഷിനെ കൂട്ടിക്കൊണ്ടുവരവെ മറ്റൊരു കാര് ഇടിച്ച് നിയന്ത്രണം വിട്ട കെഎസ്ആര്ടിസി ബസ് ഇവരുടെ കാറിന്റെ മുകളിലേക്ക് മറിയുകയായിരുന്നു.
ചെങ്ങന്നൂരിലെ സ്വകാര്യ ആശുപത്രി മോര്ച്ചറിയില് സൂക്ഷിച്ചിരുന്ന മൃതദേഹങ്ങള് ഇന്നലെ 10.30ന് വന് ജനാവലിയുടെ സാന്നിദ്ധ്യത്തില് വീട്ടിലെത്തിച്ചു.
തുടര്ന്ന് ഉച്ചക്ക് 12മണിയോടെ മൃതദേഹങ്ങള് അനീഷിന്റെ ഭാര്യ ബിബിനിയുടെ വീട്ടിലെത്തിച്ച് പൊതുദര്ശനത്തിന് വെച്ചു. തുടര്ന്ന് പാണ്ടനാട് സെന്റ് തെരാസസ് മലങ്കര കത്തോലിക്കപ്പള്ളിയിലെത്തിച്ച് അന്ത്യശുശ്രൂഷകള് നല്കിയ ശേഷം പളളിസെമിത്തേരിയില് അടക്കംചെയ്തു.
എം.പി കൊടിക്കുന്നില് സുരേഷ്, പി.സി. വിഷ്ണുനാഥ് എംഎല്എ, ഗ്രാമപഞ്ചായത്ത് പ്രസിഡന്റ് വത്സലാ മോഹന്, ബിജെപി ജില്ലാ സെക്രട്ടറി എം.വി. ഗോപകുമാര് തുടങ്ങി രാഷ്ട്രീയ സാമൂഹ്യ, സാംസ്ക്കാരിക രംഗത്തെ നൂറുകണക്കിന് ആളുകളാണ് പൊതുദര്ശനത്തിനും അന്ത്യോപചാരം അര്പ്പിക്കുവാനും എത്തിച്ചേര്ന്നത്.
