ന്യൂദല്ഹി: ചിപ്സ്, ശീതളപാനീയങ്ങള്, ഇന്സ്റ്റന്റ് നൂഡില്സ്, പിസ, കേക്കുകള്, ബിസ്ക്കറ്റുകള് എന്നിവയടക്കം പന്ത്രണ്ടുതരം ഭക്ഷണ പദാര്ഥങ്ങള് രാജ്യമൊട്ടാകെ സ്കൂളുകളില് വിലക്കണമെന്ന് ഉന്നതതല സമതി ശുപാര്ശ ചെയ്തു. ഈ ഉല്പന്നങ്ങള് സ്കൂള് കാന്റീനുകളിലും വില്ക്കരുത്. ശുപാര്ശയില് പറയുന്നു.
ഇവയ്ക്കു പകരം പുലാവ്, ചോറ്, പരിപ്പ്, ഹല്വ, രാജ്മാ, പായസം, ഇഡലി, വട, സാമ്പാര്, തേങ്ങ ചേര്ത്ത ആഹാരം തുടങ്ങിയവ വിളമ്പണം. ശുപാര്ശയില് പറയുന്നു. മെയ് മാസത്തില് വനിതാശിശു വികസന മന്ത്രാലയം നിയമിച്ച, ദേശീയ പോഷകാഹാര ഇന്സ്റ്റിറ്റിയൂട്ട് റയറക്ടര് ടി. ലോംഗ്വ അധ്യക്ഷനായ സമിതിയാണ് ഈ ശുപാര്ശകള് സമര്പ്പിച്ചിരിക്കുന്നത്. സ്കൂളുകളുടെ 200 മീറ്റര് ചുറ്റളവില് തെരുവു കച്ചവടക്കാരെ അനുവദിക്കരുതെന്നും ശുപാര്ശയുണ്ട്.
പ്രോട്ടീന്, വിറ്റാമിന്, ധാതുലവണങ്ങള്, നാരുകള് എന്നിവ കുറഞ്ഞ, ഉപ്പ്, പൂരിത കൊഴുപ്പുകള്, പഞ്ചസാര തുടങ്ങി ആരോഗ്യത്തിന് ഹാനികരമായവ കൂടുതലുള്ള പാക്ക് ചെയ്തതും അല്ലാത്തതുമായ ഭക്ഷണം, പാനീയം എന്നിവ നിരോധിക്കാനാണ് നിര്ദ്ദേശം. ഇത്തരം ഭക്ഷണങ്ങള്ക്ക് ഇന്ന് നിരോധനമില്ല. കാന്റീനുകളില് വില്ക്കുന്ന വസ്തുക്കളിലെ പോഷകങ്ങളുടെ മൂല്യമനുസരിച്ച് അവയ്ക്ക് പച്ച, മഞ്ഞ, ഓറഞ്ച് കളര് കോഡുകള് നല്കണമെന്നും ശുപാര്ശയുണ്ട്.
