ന്യൂദല്ഹി: ഇന്ത്യയുടെയും പാകിസ്താന്റെയും സുരക്ഷാ ഉപദേഷ്ടാക്കളുടെ ചര്ച്ച വേണമോയെന്ന് ഇന്ത്യക്ക് തീരുമാനിക്കാമെന്ന് പാക് സുരക്ഷാ ഉപദേഷ്ടാവ് സര്താജ് അസീസ് പറഞ്ഞു. അതേസമയം, ചര്ച്ചയിലെ മുഖ്യവിഷയം കശ്മീരായിരിക്കുമെന്നും അദ്ദേഹം വ്യക്തമാക്കി. പാകിസ്ഥാന് ഇന്ത്യയുമായി ചര്ച്ചയ്ക്ക് തയ്യാറാണ്. ഈ ചര്ച്ചയ്ക്ക് പാക്കിസ്ഥാന് ഉപാധികള് വച്ചിട്ടില്ല.
ദല്ഹിയിലെത്തുന്ന സര്താജ് അസീസുമായി ചര്ച്ച നടത്താന് കാശ്മീര് വിഘടനവാദി നേതാക്കളെ ക്ഷണിച്ചതില് ഇന്ത്യ അതൃപ്തി അറിയിച്ചിരുന്നു. എന്നാല് ഇന്ത്യയുടെ അതൃപ്തി മറികടന്നും കൂടിക്കാഴ്ചയുമായി മുന്നോട്ടുപോകാനാണ് പാക് തീരുമാനം. സര്താജ് അസീസുമായുളള ചര്ച്ചയ്ക്ക് ദല്ഹിയിലെത്തിയ വിഘടനവാദി നേതാവ് ഷബീര് ഷായെ ദല്ഹിയില് കരുതല് തടങ്കലിലെടുത്തിരിക്കുകയാണ്. ഇതിന് പിന്നാലെയാണ് സര്താജ് അസീസിന്റെ വാക്കുകള്.
ചര്ച്ചയ്ക്ക് പാകിസ്ഥാന് യാതൊരു മുന്കൂര് ഉപാധിയും വെച്ചിട്ടില്ല. ഹൂറിയത് നേതാക്കളുമായി ചര്ച്ച നടത്തരുതെന്ന ഉപാധി വെച്ചത് ഇന്ത്യയാണ്. ഹൂറിയത് നേതാക്കളുമായുള്ള കൂടിക്കാഴ്ചയില് പുതുമയില്ലെന്നും താന് മുന്പും അവരുമായി കൂടിക്കാഴ്ച നടത്തിയിട്ടുള്ളതാണെന്നും സര്താജ് അസീസ് കൂട്ടിച്ചേര്ത്തു.
നിലവിലുളള എല്ലാ വിഷയങ്ങളിലും ചര്ച്ചയാകാമെന്നായിരുന്നു ഉഫയില് ഇന്ത്യ നല്കിയിരുന്ന ഉറപ്പ്. ഇന്ത്യയും പാകിസ്ഥാനും തമ്മില് നിലനില്ക്കുന്ന ഏറ്റവും സങ്കീര്ണമായ പ്രശ്നമാണ് കാശ്മീര്. അതുകൊണ്ടു തന്നെ ആ വിഷയവും ചര്ച്ച ചെയ്യണമെന്ന് സര്താജ് അസീസ് പറഞ്ഞു.
പാകിസ്ഥാനിലെ തീവ്രവാദ പ്രവര്ത്തനങ്ങളില് റോയ്ക്ക് പങ്കുണ്ടെന്ന് വ്യക്തമാക്കുന്ന മൂന്ന് നിര്ണായക തെളിവുകളും കൊണ്ടാണ് താന് ഇന്ത്യയിലേക്ക് വരാനിരിക്കുന്നത്. ഇപ്പോള് ഈ തെളിവുകള് കൈമാറാന് കഴിഞ്ഞില്ലെങ്കില് അടുത്ത മാസം ന്യൂയോര്ക്ക് യുഎന് വാര്ഷിക ഉച്ചകോടിക്ക് എത്തുമ്പോള് പ്രധാനമന്ത്രി നരേന്ദ്രമോദിക്ക് കൈമാറുമെന്നും സര്താജ് അസീസ് പറഞ്ഞു.
