തിരുവനന്തപുരം: ഓണത്തിനോടനുബന്ധിച്ച് നഗരവാസികള്‍ക്ക് എല്ലാവിധ സുരക്ഷയും ഒരുക്കുന്നതിലേക്കായി തിരുവനന്തപുരം സിറ്റിപോലീസ് പദ്ധതികള്‍ ആസൂത്രണം ചെയ്തുവരുന്നു. ഓണനാളുകളില്‍ തലസ്ഥാനനഗരിയിലെ വീഥികളില്‍ കണ്ടുവരുന്ന തിരക്ക് ഒഴിവാക്കുന്നതിനും വാഹനഗതാഗതം സുഗമമാക്കുന്നതിനും പ്രഥമ പരിഗണന നല്‍കും. നഗരത്തിലെ ഓരോരോ പോലീസ് സ്റ്റേഷന്‍ പരിധിയിലും വാഹനങ്ങള്‍ പാര്‍ക്ക് ചെയ്യേണ്ടതും പാര്‍ക്കിംഗ് ഒഴിവാക്കേണ്ടതുമായ സ്ഥലങ്ങള്‍ അതാത് സ്റ്റേഷന്‍ ഹൗസ് ഓഫീസര്‍മാരുടെ നേതൃത്വത്തില്‍ കണ്ടെത്തുന്നുണ്ട്. വാഹനഗതാഗതത്തേയും കാല്‍നടയാത്രക്കാരെയും തടസ്സപ്പെടുത്തുന്ന രീതിയിലുള്ള എല്ലാവിധ കയ്യേറ്റങ്ങളും 21,22 തീയതികളില്‍ ഒഴിപ്പിക്കും. മുന്നോടിയായി കയ്യേറ്റങ്ങള്‍ കണ്ടെത്തി ബന്ധപ്പെട്ട ആള്‍ക്കാര്‍ക്ക് സ്വമേധയാ ഒഴിയുന്നതിന് ആവശ്യപ്പെട്ട് നോട്ടീസ് നല്‍കിയിട്ടുണ്ട്. മുന്‍കാലങ്ങളില്‍ ഓണക്കാലത്ത് നടപ്പാതകളും പൊതുവീഥികളും കയ്യേറി നിരവധി താത്ക്കാലിക കച്ചവട കേന്ദ്രങ്ങള്‍ സ്ഥാപിക്കുന്നതിനാല്‍ കാല്‍നടയാത്രക്കാര്‍ വളരെയധികം ബുദ്ധിമുട്ടുകള്‍ അനുഭവിക്കുന്നുണ്ട്. ഇത്തരം കയ്യേറ്റങ്ങള്‍ വാഹനഗതാഗതത്തെ തടസ്സപ്പെടുത്തുന്നതോടൊപ്പം തന്നെ കാല്‍നടയാത്രക്കാരെ അപകടങ്ങളില്‍പ്പെടുത്തുന്നതിനാല്‍ കയ്യേറ്റങ്ങള്‍ക്കെതിരെ കര്‍ശന നടപടികള്‍ സ്വീകരിക്കുമെന്ന് സിറ്റിപോലീസ് അറിയിച്ചു. എല്ലാത്തരം സാമൂഹ്യവിരുദ്ധ പ്രവര്‍ത്തനങ്ങളും തടയുന്നതിനുവേണ്ടി 24 മണിക്കൂറും ശക്തമായ പോലീസ് പെട്രോളിംഗ് ഏര്‍പ്പെടുത്തുവാന്‍ നഗരത്തിലെ പ്രധാനപ്പെട്ട എല്ലാ കേന്ദ്രങ്ങളിലും, കൂടാതെ ജനത്തിരക്ക് കൂടുതല്‍ അനുഭവപ്പെടുന്ന സ്ഥലങ്ങളിലും സുരക്ഷാ ക്യാമറകള്‍ സ്ഥാപിക്കുന്നതിനും ഷാഡോ പോലീസിനെ വിന്യസിക്കുന്നതിനുമുള്ള നടപടികള്‍ സ്വീകരിച്ചു വരുന്നു.
പ്രതികരിക്കാൻ ഇവിടെ എഴുതുക: