കലണ്ടറിലെ ശകവര്ഷത്തിലെ ചൈത്രാദി ദിവസങ്ങളും സംസ്കൃതി പേജിലെ ചൈത്ര ദിനവും തമ്മില് വായനക്കാരില് ചിലര്ക്ക് ആശയക്കുഴപ്പം ഉണ്ടാക്കിയതായി ശ്രദ്ധയില് പെടുത്തിയതിനെ തുടര്ന്നാണ് ഈ കുറിപ്പ്. ഇന്ന് (2015 ആഗസ്റ്റ് 14 വെള്ളിയാഴ്ച) ജന്മഭൂമി കലണ്ടറില് ശ്രാവണം 23 ആണ്. അതേസമയം സംസ്കൃതി പേജില് ആഷാഢം 29 ആണ്. എന്താണ് ഈ വ്യത്യാസത്തിനു കാരണം എന്നാണ് ചിലര് ചോദിക്കുന്നത്.
ആദ്യം സംസ്കൃതി പേജിലെ കാര്യം എടുക്കാം. അവിടെ ശക വര്ഷ, മാസവും തിഥിയും നക്ഷത്രവും ഒക്കെ ഹൈന്ദവ ആചാരാനുഷ്ടാനങ്ങളുമായി ബന്ധപെട്ടതാണ്. അതായത് അവിടെ കൃത്യമായും ശകവര്ഷം തുടങ്ങുന്നത് കണക്കാക്കിയിരിക്കുന്നതും ചേര്ത്തിരിക്കുന്നതും, മീനമാസത്തിലെ (മീനം രാശിയില് സൂര്യനുള്ള കാലം) കറുത്ത വാവ് കഴിഞ്ഞു വരുന്ന പ്രഭാതത്തില്, പ്രഥമാ തിഥി ഉള്ളപ്പോള് ആണ്. പിന്നീടുള്ള എല്ലാ മാസവും ആരംഭിക്കുന്നത് അടു ത്ത കറുത്തവാവ് കഴിഞ്ഞുള്ള പ്രഥമ മുതല് ആണ്. അതിനെ ചന്ദ്രമാന വര്ഷം എന്നാണു പറയുക. കലിവര്ഷം സൗരമാനവും ആണ് (സൂര്യന് ഓരോ രാശിയിലും പ്രവേശിക്കുന്ന ദിവസം മുതല് ആണ് സൗരമാനത്തില് വര്ഷാരംഭവും മാസാരംഭവും). ചന്ദ്രമാന ത്തില് വര്ഷത്തില് ഏകദേശം 360 ദിവസം ദിവസം ആണ് ഉണ്ടാകുക.
ഒരു വര്ഷം 365 ഉം പിന്നെ കാല് ദിവസവുമാണല്ലോ. ബാക്കിവരുന്ന അഞ്ചേകാല് ദിവസങ്ങള് കൂടിച്ചേര്ന്ന് അഞ്ചാമത്തെ വര്ഷം അധിമാസം എന്ന പേരില് പതിമൂന്നാമതൊരു മാസം കൂടി ഉണ്ടാകും. അതാണ് ഈ വര്ഷം ആഷാഢം രണ്ടെണ്ണം വന്നത്, ഒന്ന്, അധിമാസാഷാഢവും, രണ്ടാമത്തേത് നിജാഷാഢവും. എല്ലാ ഹൈന്ദവാചാരാനുഷ്ടാനങ്ങള്ക്കും ഈ വര്ഷ/മാസങ്ങളിലെ തിഥിയും നക്ഷത്രവും ആണ് ഉപയോഗിക്കുക. പഞ്ചാംഗങ്ങളില് നാളത്തെ ദിവസം നോക്കിയാല് ‘ശ്രാവണ മാസാരംഭം’എന്ന് കാണാം. ഇന്ന് അമാവാസി ആണല്ലോ, നാളെ പ്രഭാതത്തില് പ്രഥമ തിഥി ഉള്ളതിനാല് അടുത്തമാസം ആരംഭിക്കുന്നു.
ഇനി നമ്മുടെ കലണ്ടറില് ഉള്ള ശകവര്ഷമാസങ്ങളെക്കുറിച്ചു പറയാം. ഭാരതസര്ക്കാര് ഔദ്യോഗികമായി സ്വീകരിച്ചിട്ടുള്ള ദേശീയ കാലഗണനാരീതിയാണ് ഈ ശകവര്ഷം. ഭാരത സര്ക്കാരിന്റെ ഗസറ്റിലും മറ്റും ഉപയോഗിക്കുന്നത് ഈ കലണ്ടര് ആണ്. അതില് കൃത്യമായും സൗരമാന രീതിയില് 365 ദിവസം ആണ് വര്ഷത്തില് ഉള്ളത്. എല്ലാവര്ഷവും മാര്ച്ച് 22നാണ് അതില് വര്ഷം ആരംഭിക്കുന്ന ത്. (അധിവര്ഷം- ലീപ് ഇയര്- ഉള്ളപ്പോള് മാര്ച്ച് 21 ആയിരിക്കും വര്ഷാരംഭം). ഒരുതരത്തിലുമുള്ള ആചാരാനുഷ്ടാനങ്ങളുമായും ആ കലണ്ടറിലെ ദിവസങ്ങള്ക്ക് ബന്ധം ഇല്ല;അതായത് അത് ക്രിസ്തുവര്ഷം പോലെ കേവലം കാലഗണനയ്ക്ക് മാത്രമുള്ളതാണ് എന്നര്ത്ഥം. എങ്കിലും അതില് ഉപയോഗിക്കുന്ന മാസങ്ങളുടെ പേരും മറ്റും ഹൈന്ദവ ചാന്ദ്രമാസത്തിലെ പേരുകള് തന്നെയാണു താനും. (എന്താണ് ആ വര്ഷാരംഭത്തിനു അടിസ്ഥാനം എന്ന് വ്യക്തമല്ല.ഒരു പക്ഷെ സായന സൂര്യന് മേട/മേഷ രാശിയിലേക്ക് പ്രവേശിക്കുന്ന ദിനം ആയതു കൊണ്ടാവാം).
ചുരുക്കത്തില് ഒന്ന് ജ്യോതിശാസ്ത്രപരവും രണ്ടാമത്തേത് കാലനിര്ണ്ണയത്തിന് മാത്രമുള്ളതും ആകുന്നു എന്ന് സാരം.
