സുകേതു എന്നൊരു യക്ഷന് സന്താനമുണ്ടാകാനായി ബ്രഹ്മാവിനെ തപസ്സുചെയ്തു. ബ്രഹ്മാവ് സുന്ദരിയായ ഒരു യക്ഷകന്യകയെ സൃഷ്ടിച്ച് സുകേതുവിന് പുത്രിയായി സമ്മാനിച്ചു. ഇവള്ക്ക് ആയിരം ആനയുടെ ശക്തിയുണ്ടായിരിക്കുമെന്നു വരവും കൊടുത്തു. താടക വളര്ന്ന് യൗവനയുക്തയായപ്പോള് സുന്ദന് എന്നൊരു യക്ഷന് അവളെ വിവാഹം ചെയ്തു.
അവര്ക്ക് മാരീചന്, സുബാഹു എന്നീ പുത്രന്മാരുമുണ്ടായി. ഒരിക്കല് മദോന്മത്തനായ സുന്ദന് താടകയുടെ പിന്ബലത്താല് അഗസ്ത്യ മഹര്ഷിയെ ആക്രമിക്കാന് ശ്രമിച്ചു. മഹര്ഷിയുടെ കോപാഗ്നിയില് സുന്ദന് മരിച്ചു. കൂടാതെ താടകയും മക്കളും രാക്ഷസരായിപ്പോകട്ടെയെന്നു മഹര്ഷി ശപിക്കുകയും ചെയ്തു. അന്നുമുതല് അവര് ഈ കൊടും വനത്തില് വാസമുറപ്പിച്ച് മഹര്ഷിമാരെയും സജ്ജനങ്ങളെയും ഉപദ്രവിച്ചുവരുന്നു.
കാടിതുകണ്ടായോ നീ? കാമരൂപിണിയായ
താടകാ ഭയങ്കരീ വാണീടും ദേശമല്ലോ
ഇവളെപ്പേടിച്ചാരും നേര്വഴി നടപ്പീല
ഭുവനവാസി ജനം ഭുവനേശ്വരാ പോറ്റി.
ശ്രീരാമന് ആദ്യം അല്പം ആലോചിച്ചുനിന്നു. സ്ത്രീ വധം ചെയ്യാമോ? ഇതു മനസ്സിലാക്കിയ വിശ്വാമിത്രന് പറഞ്ഞു: ഇവള് സ്ത്രീയാണെന്നു കരുതി കൊല്ലാതിരിക്കരുത്. അത്രമാത്രം ഭീകരിയാണിവള്. ഇതുകേട്ട് ശ്രീരാമന് വില്ലുകുലച്ച് ഒരു ഞാണൊലിയിട്ടു. ഞാണൊലി ശബ്ദം കേട്ട് ഭയന്നും കോപിച്ചുവിറച്ചുംകൊണ്ട് താടക ഓടിയെത്തി. ശ്രീരാമനെ ആക്രമിക്കാന് മുതിര്ന്നു. രാമന് അസ്ത്രം പ്രയോഗിച്ച് അവളുടെ രണ്ടു കരങ്ങളും ഛേദിച്ചു. അവളെ വധിക്കാതെ വിടണമെന്നാഗ്രഹിച്ചുവെങ്കിലും അവള് വായും പിളര്ന്ന് രാമലക്ഷ്മണന്മാരെ വിഴുങ്ങാന് ഓടിയടുത്തു. അപ്പോള് ഒരസ്ത്രം അവളുടെ മാറിലേക്കു തന്നെ തൊടുത്തുവിട്ടു.
ചെന്നു താടകമാറില് കൊണ്ടിതു രാമബാണം
പാരതില് മല ചിറകറ്റു വീണതുപോലെ
ഘോരരൂപിണിയായ താടക വീണാളല്ലോ
അസ്ത്രമേറ്റ് മരിക്കാന് സമയത്ത് രത്നാഭരണങ്ങളിഞ്ഞ് അതിസുന്ദരിയായ ഒരു യക്ഷസ്ത്രീ അവളില്നിന്നു പുറത്തുവന്നു. അഗസ്ത്യ ശാപത്തില്നിന്നും മോചിതയായ താടക പഴയപോലെ യക്ഷസ്ത്രീയായി മാറി. ശ്രീരാമനെ വന്ദിച്ചിട്ട് ദേവലോകം പൂകി.
… തുടരും
