477. ഗന്ധരൂപാ – ഗന്ധം രൂപമായവള്. 470-ാം നാമം ഘ്രാണരൂപാ എന്നായിരുന്നു. ഗന്ധങ്ങളെ വേര്തിരിച്ചറിയാന് ശരീരത്തിലുളള ഉപകരണമാണ് മൂക്ക്. മൂക്കുകൊണ്ടു ബാഹ്യലോകത്തെ അറിയുന്നതിനുപകരിക്കുന്ന മണമായി വര്ത്തിക്കുന്ന മൂകാംബികയെ നാമം സ്തുതിക്കുന്നു.
478. ജ്ഞാനരൂപാ – ജ്ഞാനം രൂപമായവള്. 471-ാം നാമം ജ്ഞാതൃരൂപാ എന്നായിരുന്നു. പഞ്ചേന്ദ്രിയങ്ങളിലൂടെ ലോകത്തെ അറിയുന്ന ജ്ഞാതാവ് ആ അറിവുകളെ അപഗ്രഥിച്ചുണ്ടാക്കുന്ന അവബോധമാണ് ജ്ഞാനം. പഞ്ചേന്ദ്രിയങ്ങളിലൂടെ ലഭിക്കുന്ന അനുഭവങ്ങളുടെ പരസ്പരബന്ധം, കാര്യകാരണബന്ധം, ആധാരാധേയബന്ധം തനിക്കും മറ്റു മനുഷ്യര്ക്കും മറ്റു ജീവികള്ക്കും ഇവയൊക്കെ എങ്ങനെ പ്രയോജനപ്പെടുത്താമെന്ന ചിന്ത തുടങ്ങിയവയുടെ ആകെത്തുകയാണ് ജ്ഞാനം എന്നു പറയാം. ജ്ഞാനം ദേവിയുടെ ഒരു രൂപമാണ്. മനുഷ്യരും മറ്റു ജീവികളും ദേവിയുടെ ഉപകരണങ്ങള്മാത്രം.
479. പഞ്ചതന്മാത്രരൂപിണി – പഞ്ചതന്മാത്രരൂപിണീ എന്ന ഈ നാമത്തെ ലളിതാസഹസ്രനാമത്തിലെ പഞ്ചതന്മാത്രസായകാ എന്ന നാമവുമായി താരതമ്യപ്പെടുത്തി ചിന്തിക്കുന്നത് പ്രയോജനപ്രദമായ അഭ്യാസമാണ്. രൂപം, ശബ്ദം, സ്പര്ശം, രസം, ഗന്ധം എന്നിവയാണ് പഞ്ചതന്മാത്രകള്. ഇവ ദേവിയുടെ ആയുധങ്ങളാണെന്നു ലളിതാസഹസ്രനാമം. ദേവിയുടെ സങ്കല്പവികല്പരൂപമായ മധുരമുള്ള കരിമ്പുവില്ലില് നിന്നും പുറപ്പെടുന്ന പഞ്ചതന്മാത്രകളായ സായകങ്ങള് ത്രിമൂര്ത്തികള് തൊട്ടു സൂക്ഷ്മജീവികള് വരെയുള്ള സമസ്തപ്രമാണികളെയും കീഴ്പ്പെടുത്തുന്നു.
മൂകാംബികാസഹസ്രനാമം പഞ്ചതന്മാത്രകളെ ദേവിയുടെ അഞ്ചുരൂപങ്ങളായി അവതരിപ്പിക്കുന്നു. പഞ്ചതന്മാത്രകളെ സ്വീകരിച്ചനുഭവിക്കുന്ന കണ്ണ്, കാത്, ത്വക്ക്, നാക്ക്, മൂക്ക് എന്നീ ജ്ഞാനേന്ദ്രിയങ്ങളെയും ദേവിയുടെ രൂപങ്ങളായി സ്വീകരിക്കുന്നു. മനുഷ്യനും മനുഷ്യശരീരവും അതിലുള്ള ഇന്ദ്രിയങ്ങളും ഇന്ദ്രിയാനുഭവങ്ങളും അനുഭവങ്ങള്ക്കു കാരണമായ പ്രപഞ്ചവും പ്രപഞ്ചഘടകങ്ങളും എല്ലാം മൂകാംബികാദേവിയുടെ പല രൂപങ്ങള്. അങ്ങനെയുള്ള ദേവിയെ നാമം സ്തുതിക്കുന്നു.
… തുടരും
